انگلینڈ کے فاسٹ بولر مارک ووڈ نے مسلسل انجریز کے باعث انٹرنیشنل کرکٹ سے ریٹائرمنٹ کا اعلان کردیا۔
36 سالہ مارک ووڈ نے انگلینڈ کی جانب سے 11 سالہ کیریئر میں 38 ٹیسٹ، 70 ون ڈے انٹرنیشنل اور 38 ٹی20 انٹرنیشنل کھیلے اور مجموعی طور پر 253 وکٹیں حاصل کیں۔
مارک ووڈ نے بتایا کہ طبی مشورے کے بعد ان کے لیے ٹیسٹ اور 50 اوورز کی کرکٹ جاری رکھنا ممکن نہیں رہا۔ وہ اپنے کیریئر کے دوران ٹخنے، کہنی اور گھٹنے کی انجریز سے مسلسل متاثر رہے۔
وہ 2019 کے ون ڈے ورلڈ کپ اور 2022 کے ٹی20 ورلڈ کپ جیتنے والی انگلش ٹیم کا حصہ بھی رہے۔ 2019 ورلڈ کپ میں انہوں نے 10 میچز میں 18 وکٹیں حاصل کی تھیں۔
ووڈ نے آخری بار نومبر 2025 میں آسٹریلیا کے خلاف ایشز کے پہلے ٹیسٹ میں انگلینڈ کی نمائندگی کی تھی۔ انجری کے باعث وہ طویل عرصے تک میدان سے باہر رہے اور واپسی پر بھی گھٹنے کی تکلیف نے ان کا ساتھ نہ چھوڑا۔
مارک ووڈ نے کہا کہ انہیں انگلینڈ کی نمائندگی کرنے پر ہمیشہ فخر رہے گا اور وہ مستقبل میں کسی نہ کسی حیثیت سے کرکٹ سے وابستہ رہنے کی خواہش رکھتے ہیں۔
