اسلام آباد(صباح نیوز) اپیلیٹ کورٹ نے ماڈل ایان علی کے وکیل لطیف کھوسہ کی مسلسل عدم حاضری پر ماڈل ایان علی کی 5 کروڑ روپے جرمانے کے خلاف اپیل خارج کردی۔پیر کو جسٹس ملک منظور کی سربراہی میں 2 رکنی بینچ نے ڈالر گرل ماڈل ایان علی کی جرمانے کے خلاف درخواست پر کیس کی سماعت کی لیکن ماڈل ایان علی کے وکیل عدالت میں پیش نہ ہوئے جس پر عدالت کا کہنا تھا کہ لگتا ہے کہ ملزمہ کے وکیل لطیف کھوسہ کو اب کیس میں کوئی دلچسپی نہیں رہی اور وہ مسلسل غیر حاضری کا مظاہرہ کررہے ہیں۔ عدالت نے ایان علی کے خلاف 5 کروڑ روپے جرمانے کی سزا کو برقرار رکھتے ہوئے ملزمہ کی جرمانے کے خلاف اپیل خارج کردی۔واضح رہے کہ ماڈل ایان علی اس وقت بیرون ملک جاچکی ہیں اور انہوں نے کسٹم کورٹ کی جانب سے 5 کروڑ روپے جرمانے کی سزا کو ایپلیٹ کورٹ میں چیلنج کر رکھا تھا۔
