لاہور (وقائع نگار) تحریک انصاف کے چیئرمین عمران خان نے کہا ہے کہ لاہور میں فائنل کی مخالفت تین وجو ہات کی بنیاد پر کی ،پہلی بات یہ کہ اتنی زیادہ سکیورٹی میں میچ کرا کے ہم دنیا کو اچھا پیغام نہیں دے رہے۔ دوسری وجہ یہ کہ ہمیں جلسے سے بھی منع کیا گیا لیکن اس صورتحال میں میچ کرایا جا رہا ہے اور تیسری وجہ یہ ہے کہ نواز شریف کی نیت خراب ہے ۔نجی ٹی وی پروگرام میںگفتگو کرتے ہوئے عمران خان نے کہا کہ پی ایس ایل فائنل کے لیے ہم اتنی محنت کر رہے ہیں ،کرفیولگا دیا ،سڑکیں بند کررہے ہیں ،علاقے میں گیس بند کردی اور تیس ہزار پولیس والے سکیورٹی دیں گے ،ان اقدامات سے دنیا کو اچھا پیغام نہیں جا رہا ،حکومت دنیا کو پیغام دے رہی ہے کہ پاکستان بہت ہی خطرناک جگہ ہے۔انہوں نے کہا کہ میں پاکستان میں کرکٹ کا حامی ہوں لیکن موجودہ صورتحال میں یہاں کرکٹ نہیں ہونی چاہیے۔ ان کا کہنا تھا کہ ہمیں خفیہ اداروں کی طرف سے کہا جا رہا ہے کہ سکیورٹی رسک بہت زیادہ ہے جلسے جلوس نہ کریں ،ہم نے جلسے بند کر دیئے لیکن اس صورتحال میں پی ایس ایل کا میچ کرایا جا رہا ہے۔ عمران خان نے کہا کہ نواز شریف کی نیت خراب ہے ،ن لیگی کارکنان کو ٹکٹ دے دیئے گئے ہیں۔ تاکہ میچ کے ساتھ ساتھ ن لیگ کا جلسہ بھی ہو جائے اور وزیر اعظم نواز شریف کے نعرے لگیں تاکہ عدلیہ کو پیغام جائے کہ عوام نواز شریف کو چاہتی ہے ۔
