اسلام آباد(ویب ڈیسک)وزیر داخلہ چوہدری نثار علی خان نے وفاقی دارالحکومت میں اپلائیڈ فار اور مشکوک نمبر پلیٹس کی حامل گاڑیوں کے داخلے کا نوٹس لے لیا۔ترجمان وزارت داخلہ کے مطابق وزیرداخلہ نے ہدایت کی ہے کہ بغیر رجسٹریشن گاڑی چلانا نہ صرف قانونا جرم ہے بلکہ اس سے سیکیورٹی سے متعلق کئی مسائل بھی جنم لیتے ہیں۔انھوں نے مزید کہاکہ اس لئے اس روش کی قطعا اجازت نہیں دی جا سکتی۔ وزیر داخلہ نے اسلام آباد ٹریفک پولیس کو غیر رجسٹرڈ گاڑیوں کے مالکان کو پندرہ دنوں کی مہلت دینے کی ہدایت کرتے ہوئے کہا ہے کہ معینہ مدت کے بعد قانون شکنی کے مرتکب گاڑی مالکان کے خلاف سخت قانونی کارروائی اور بھاری جرمانے کے ساتھ ساتھ ایسی گاڑیاں بلا تفریق و امتیاز بند کر دی جائیں گی۔
