کراچی (آئی این پی) قومی کر کٹ ٹیم کے سابق کپتان اور وکٹ کیپر راشد لطیف نے سرفراز احمد کو ٹیسٹ ٹیم کا کپتان بنانے کی مخالفت کرتے ہوئے کہا ہے کہ سرفراز کیلئے ٹیسٹ ٹیم کی قیادت کا یہ مناسب وقت نہیں ہوگا۔سرفراز ابھی صرف 29سال کا ہے، ٹیسٹ ٹیم کی قیادت دینے میں جلدی پی سی بی کیلئے نقصان کا سبب بن سکتی ہے،سرفراز ٹی 20میں فتوحات سمیٹ رہا ہے، البتہ ون ڈے کرکٹ میں اسے بہت سیکھنے کے عمل سے گزرنا ہوگا۔اپنے ایک انٹرویو میں سابقو کپتان نے کہا کہ کپتانی اور پاکستان کرکٹ ہمیشہ ایک مشکل اور کٹھن کام رہا ہے اور میں اس تجربے سے بخوبی واقف ہوں۔پاکستان کے لیے 6ٹیسٹ میں کپتان کی حیثیت سے 4ٹیسٹ جیتنے والے راشد لطیف کا کہنا تھا کہ اہم بات ہے کہ سرفراز ابھی صرف 29سال کا ہے،البتہ باوجود اس کے اسے ٹیسٹ ٹیم کی قیادت دینے میں جلدی پاکستان کرکٹ کے لیے نقصان کا سبب بن سکتی ہے۔، وجہ سیدھی ہے،مصباح اور یونس کے جانے کے بعد اس ٹیم کو نئی شروعات کا چیلنج درپیش ہوگا۔انہوں نے کہا کہ یہ درست ہے کہ سرفراز ٹی 20میں فتوحات سمیٹ رہا ہے، البتہ ون ڈے کرکٹ میں اسے بہت سیکھنے کے عمل سے گزرنا ہوگا، کیوں کہ اس کی کپتانی میں مختصر فارمیٹ کی جھلک نمایاں ہے۔راشد لطیف کا خیال ہے کہ سرفراز کی کپتانی کو لے کر کمنٹری بکس سے ہونے والے تبصرے ان کے لیے حیران کن ہیں جن کے بارے میں وہ سمجھتے ہیں کہ یا تو کمنٹری کرنے والوں کی سوچ محدود ہے یا پھر وہ کسی سوچے سمجھے ایجنڈے کے ساتھ سرفراز کو موضوع بحث بنا کر غیر ضروری انداز میں نئے کپتان پر دباﺅ بڑھانے کی کوشش کر رہے ہیں۔سرفراز احمد کپتانی میں کتنی دور جائیں گے اس بارے میں راشد لطیف کا کہنا ہے کہ کچھ کہنا مشکل ہوگا، البتہ وکٹ کیپر کو غیر ضروری دباﺅ سے بچنا ہوگا جو وکٹ کیپنگ اور کپتانی کے ساتھ اتنا آسان ہرگز نہیں ہوگا۔سن2003ءکے ورلڈ کپ کے بعد قومی ٹیم کی قیادت سنبھالنے والے راشد لطیف کا خیال ہے کہ سرفراز احمد کی جگہ ٹیسٹ ٹیم کی قیادت اسد شفیق کو دینا قدرے مناسب فیصلہ ہوگا۔
