لاہور (خصوصی رپورٹ)بکرا عید میں چند روز باقی لاہور کی مویشی منڈیوں میں خریدار جانوروں کے مہنگے دام سن کر مایوس نظر آنے لگے جبکہ مناواں مویشی منڈی میں 18لاکھ کا بیل سب کی توجہ کا مرکز بنا ہوا ہے۔ عید سے قبل آخری چھٹی کے روز شہری قربانی کا جانور خریدنے کیلئے مناواں اور سگیاں مویشی منڈی میں امڈ آئے۔ کہیں بچھڑے کا بیوپار اور کہیں بکروں کی خریداری کی جارہی ہیں۔ کوئی مایوس نظر آیا اور کسی کے چہرے پر خوشی رہی۔ منڈیوں میں دنبہ 25ہزار روپے، چھترہ اور بکرا 30سے 35ہزار جبکہ بچھڑا کم ازکم 60ہزار سے لاکھوں روپے تک منڈیوں میں فروخت ہورہا ہے۔ مناواں منڈی میں 18لاکھ روپے میں سفید رنگ کا بچھڑا لوگوں کی توجہ کا مرکز بنارہا۔ بچھڑے کا مالک کہتا ہے کہ اس کو دیسی گھی دودھ کھلاکر پلالا ہے،اتنے دام تو اس کا حق بتناہے۔ خریداری کیلئے آئے شہری کہیں حکومت سے قیمتوں کے تعین اور چیکنگ کا مطالبہ کرتے دکھائی دئیے تو کہیں بچے والدین سے جانور نہ لے کر دینے کا شکوہ کرتے رہے۔ منڈیوں میں آئے گاہکوں کا کہنا ہے کہ اس قدر مہنگے دام منڈیوں میں ڈیمانڈ کرنا نہایت غلط ہے۔ حکومت کو اس بارے بہتر حکمت عملی اپنانی چاہئے۔ مویشی مالکان کا کہنا ہے کہ محنت اور لاگت کے بعد وہ اپنے جانور مناسب دام میں ہی فروخت کررہے ہیں۔
