لاہور (خصوصی رپورٹ) پنجاب پولیس نے لاہور سمیت پنجاب کے 63 خطرناک اشتہاریوں کے نام بلیک بک میں شامل کر دیئے، اس کے علاوہ مزید 27 نام محکمہ داخلہ کو بھجوادیئے گئے۔ انویسٹی گیشن برانچ کی جانب سے خطرناک اشتہاریوں کے لیے بنائی گئی بلیک بک میں رواں سال مزید 63 اشتہاریوں کے نام شامل کیے گئے ہیں۔ ساتھ ہی ایڈیشنل آئی جی انویسٹی گیشن مزید 27 اشتہاریوں کے ناموں کی بلیک بک میں شامل کرنے کی منظوری کے لیے سرفہرست محکمہ داخلہ کو بھجوا دی۔ بلیک بک میں شامل ہونے والے اشتہاریوں میں سے چودہ اشتہاری لاہور کے ہیں جن کے سروں کی قیمت 34 لاکھ روپے مقرر ہے، قبل ازیں بائیس اشتہاریوں کے نام پہلے ہی بک میں شامل ہیں جن کی سر کی قیمت چھپن لاکھ روپے مقرر ہے۔ اس کے علاوہ پنجاب بھر کے 225 اشتہاریوں کے نام بلیک لسٹ میں شامل ہیں۔ ان اشتہاریوں کے سروں کی قیمت دو سے بیس لاکھ روپے مقرر ہے۔
