لاہور (خصوصی رپورٹ)روہنگیا مسلمانوں سے اظہار یکجہتی کے لیے کراچی سمیت ملک کے مختلف شہروں میں احتجاجی ریلیوں اور مظاہروں کا سلسلہ جاری ہے،چمن، ڈیرہ بگٹی، نوشکی، کوئٹہ، پختونخوا سمیت ملک کے دیگر شہروں کے عوام نے روہنگیا مسلمانوں پر ڈھائے جانے والے مظالم بند کروانے کا مطالبہ کیا ہے۔تفصیلات کے مطابق میانمار میں حکومتی سرپرستی میں روہنگیا مسلمانوں پر ڈھائے جانے والے مظالم کے خلاف آل پاکستان مسلم لیگ (اے پی ایم ایل) کراچی ڈویژن کی جانب سے پریس کلب کے باہر احتجاجی مظاہرہ کیا گیا جس میں مظاہرین نے دوری طور پر مظالم بند کروانے اور سلامتی کونسل کا اجلاس طلب کرنے کا مطالبہ کیا ہے۔پاکستان تحریک انصاف بلوچستان کے زیر اہتمام کچہری چوک پر شدید احتجاج کیا گیا،چمن میں جمعیت علما اسلام(ف)کے زیراہتمام ریلی نکالی گئی اور شرکا نے شہر کی مختلف شاہراہوں پر گشت کیا،ڈیرہ بگٹی میں بھی ضلعی امیر جے یو آئی (ف)کی قیادت میں شہید بوگرا کالونی سے بگٹی کالونی تک ریلی نکالی گئی جب کہ نوشکی میں بھی روہنگیا مسلمانوں کے حق میں مظاہرہ ہوا۔خیبرپختونخوا میں بھی میانمار میں مسلمانوں پر ڈھائے جانے والے مظالم کے خلاف احتجاج کا سلسلہ جاری رہا، کوہاٹ میں جے یو آئی (ف) کے زیر اہتمام انڈس ہائی وے پر لاچی کے قریب احتجاجی مظاہرہ کیا گیا۔بنوں میں جماعت اسلامی کی جانب سے پریس کلب کے باہر مظاہرہ کیا گیا جب کہ لکی مروت میں بھی مختلف سیاسی و مذہبی جماعتوں کی جانب سے احتجاج کیا گیا۔
