لاہور (خصوصی رپورٹ) تحریک انصاف نے آئندہ انتخابات میں لاہور میں کئی موجودہ امیدواروں کے انتخابی حلقے تبدیل کرنے کا فیصلہ کر لیا۔ چیئرمین تحریک انصاف عمران خان این اے 125‘ میاں اسلم اقبال 122سے امیدوار ہو سکتے ہیں۔ علیم خان اور چودھری سرور ڈیفنس سے پنجاب اسمبلی کی نشست کیلئے الیکشن کریں گے۔ ڈاکٹر یاسمین راشد کا بھی حلقہ تبدیل ہونے کا امکان۔ ذرائع کے مطابق تحریک انصاف آئندہ عام انتخابات میں تمام حلقوں کے سیاسی حالات کو مدنظر رکھ کر ہی قومی اور صوبائی اسمبلی کے امیدواروں کو میدان میں لاناچاہتی ہے اور عمران خان کا ٹارگٹ ہے کہ وہ قومی اسمبلی کا لاہور سے نہ صرف الیکشن لڑیں بلکہ اس میں کامیاب بھی ہوں‘ اس لئے وہ سب سے پڑھے لکھے علاقے ڈیفنس سے الیکشن لڑنا چاہتے ہیں جبکہ صوبائی نشست پر چودھری سرور اور علیم خان امیدوار ہوں گے۔ اسی طرح این اے 122میں میاں اسلم اقبال اور پی پی 140میں آجاسم شریف کو ٹکٹ ملنے کا امکان ہے جبکہ این اے 121میں حماد اظہر امیدوار ہوں گے جبکہ دیگر حلقوں میں بھی 2013ءکے انتخابات میں حصہ لینے والے امیدواروں کا ٹکٹ دینے کا فیصلہ تحریک انصاف کے پارلیمانی بورڈ میں حالات دیکھ کر ہی کیا جائے گا۔
حلقے تبدیل
