لاہور (اپنے سٹاف رپورٹر سے) نواز شریف کی سیاست ختم ہو گئی، ماڈل ٹاو¿ن آفس میں زکوٰة کے چیئرمین اور دیگر اداروں کے سربراہوں کو بلایا جا رہا ہے، 480 گھرانے ہیں جن کو زکوٰة دی جاتی ہے، کہا جا رہا ہے کہ ہم سے زکوٰة لیتے ہیں اس لئے ووٹ بھی ہمیں دیں، ڈاکٹر یاسمین راشد کے حکومت پر پری پول رگنگ کے الزامات۔ حلقہ این اے 120 میں ہونے والے ضمنی انتخاب کیلئے تحریک انصاف کی امیدوار ڈاکٹر یاسمین راشد نے الزام عائد کیا ہے کہ ماڈل ٹاو¿ن آفس میں زکوٰة کے چیئرمین اور دیگراداروں کے سربراہوں کو بلایا جا رہا ہے، 480 گھرانے ہیں جن کو زکوٰة دی جاتی ہے، زکوٰة کے ذریعے 4 ہزار ووٹ خریدنے کا منصوبہ بنا رہے ہیں۔ یاسمین راشد نے بتایا کہ زکوٰة لینے والے خاندانوں سے کہا جا رہا ہے کہ ہم سے زکوٰة لیتے ہیں اس لئے ووٹ بھی ہمیں دیں۔ رہنماءپی ٹی آئی کا یہ بھی کہنا تھا کہ نواز شریف کی سیاست ختم ہو چکی ہے، اگلی بار عمران خان وزیر اعظم ہوں گے۔ پی ٹی آئی کی امیدوار ڈاکٹر یاسمین راشد نے مریم نواز پر الزام لگایا ہے کہ انہوں نے ہدایات دی ہیں کہ زکوٰة لینے والوں کو کہا جائے کہ وہ شیر پر مہر لگائیں۔ لاہور میں اعجاز چوہدری کے ہمراہ پریس کانفرنس کرتے ہوئے ڈاکٹر یاسمین راشد کاکہنا تھا کہ مریم نواز نے سرکاری مشینری استعمال کرتے ہوئے اپنی والدہ کی مہم چلائی، ان کی طبیعت ایسی نہیں کہ وہ گلی گلی گھوم سکے، وہ تو شہزادی ہے۔ ان کا مزید کہنا تھا کہ 30 سال میں ن لیگ نے حلقے کے لیے کچھ نہیں کیا جبکہ انتخابی مہم کے دوران یہاں ترقیاتی کام کروا کے لوگوں کی توجہ حاصل کرنے کی کوشش کی گئی ہے۔ اعجاز چوہدری کاکہنا تھا کہ زکوٰة کے ذریعے کمپین انتہائی غلط حرکت ہے، ووٹ مقدس امانت ہے، پی ٹی آئی کی کمپین سے بھی مسلم لیگ ن خوفزدہ ہوچکی ہے۔

لاہور (خصوصی رپورٹ) سپریم کورٹ سے نااہلی کیس میں نظرثانی کی اپیل خارج ہونے کے بعد شریف خاندان نے احتساب عدالتوں میں پیش ہونے یا نہ ہونے کے حوالے سے حکمت عملی بنالی۔ مصدقہ ذرائع کا کہنا ہے کہ حسن نواز اور حسین نواز کو عدالتوں میں پیش نہیں کیا جائے گا اور ان کی طرف سے وکیل پیش ہوکر ان کے پاکستان سے باہر ہونے کے حوالے سے کہہ کر وقت نکالنے کی کوشش کرے گا اور اس میں ساتھ یہ کہا جائے گا کہ وہ اپنی والدہ کی بیماری کی وجہ سے پیش نہیں ہوسکتے۔ ان کے علاج کے لئے ان کے ساتھ بیرون ملک ہیں۔ نوازشریف اور مریم نواز کی پیشی کے حوالے سے بھی اس بات پر غور کیا جارہا ہے کہ ان کو بھی پیش ہونا چاہئے یا نہیں۔ ذرائع کا کہنا ہے کہ اس پر دو تجاویز رکھی گئی ہیں۔ ایک تجویز کہ اگر مریم نواز پیش ہوتی ہیں تو ان کے ساتھ وکلاءکی بھاری تعداد‘ مسلم لیگی اہم رہنما اور متحرک پارٹی کارکن بھی ساتھ جائیں گے اور دوسری اس تجویز پر بھی غور کیا جارہا ہے کہ پہلی پیشیوں پر صرف وکلاءکو بھیجا جائے یا پھر مکمل بائیکاٹ کیا جائے۔ ذرائع کا کہنا ہے کہ اس ضمن میں مریم نواز اور نوازشریف نے اپنے وکلاءسے قانونی رائے بھی مانگی کہ اس کا مکمل بائیکاٹ کریں تو پھر کیا پوزیشن ہوگی۔ مصدقہ ذرائع کے مطابق نیب میں پیش ہونے کے حوالے سے اسحاق ڈار اور شریف خاندان دونوں میں اختلاف بھی ہے۔ اسحاق ڈار عدالتوں میں پیش ہوکر اس کیس کو لمبا کرنے کی تجویز دے رہے ہیں جبکہ دوسری طرف شریف خاندان اسحاق ڈار کو واضح طور پر کہہ چکا ہے کہ جو فیصلہ ہم کریں گے اس پر ہی آپ کو عمل کرنا ہوگا۔ ذرائع کے مطابق پہلی پیشی پر پیش نہ ہونے کے بعد مریم نواز اور اسحاق ڈار کے وارنٹ گرفتاری جاری ہوسکتے ہیں اور پولیس کی بجائے دیگر قانون نافذ کرنے والے اداروں کو ان کو گرفتار کرکے پیش کرنے کے احکامات بھی جاری ہوسکتے ہیں۔ مصدقہ ذرائع کا کہنا ہے کہ ایک وفاقی وزیر اور ان کے قانونی مشیروں نے شریف خاندان کو یہ واضح طور پر بتا دیا ہے کہ اگر یہ سمجھا جائے کہ ہم اب عدالتوں کے پراسیکیوٹر کو اپروچ کرلیں گے یا ان سے کوئی مدد لے لیں گے تو یہ موجودہ حالات میں ممکن ہوتا نظر نہیں آرہا۔ ذرائع کے مطابق شریف خاندان احتساب عدالتوں کے حوالے سے پیش ہونے یا نہ ہونے کیلئے فیصلہ آئندہ چوبیس گھنٹوں میں کرلیں گے اور اس سے پہلے ان کے وکلاءمیڈیا کو بھی اس حوالے سے بتائیں گے۔