اسلام آباد (مانیٹرنگ ڈیسک) پنجاب کی طرح اب سندھ سے بھی بدمعاشوں کا صفایا ہونے جا رہا ہے۔ نواز شریف کی نااہلی کے بعد اب پی پی پی کے رہنماﺅں کی بھی باری آنے والی ہے۔ تجزیہ کار ڈاکٹر شاہد مسعود نے نجی ٹی وی کے پروگرام میں انکشاف کیا ہے کہ میاں محمد نواز شریف کرپشن پر نااہل ہوئے ہیں جبکہ بانی ایم کیو ایم کو کرائم پر نکالا گیا ہے۔ آصف زرداری کرپشن اور کرائم دونوں کا مجموعہ ہیں۔ فریال تالپور پر دونوں قسم کے کیسز ہی کرپشن بھی اور کرائم بھی۔ پی پی پی کے لیڈروں کو ڈر ہے کہ نواز شریف کے بعد بینظیر کیس نہ کھل جائے اور یہ انکی پکڑ نہ آ جائے کیس اب کھلنے جا رہے ہیں انکی باری آ چکی ہے۔ پنجاب کی طرح اب سندھ میں بدمعاشیاں صاف ہونے جا رہی ہیں۔ عوام کا اصل اعتماد اب عدالتوں پر ہے۔ عدالت نے چیئرمین نیب کے ساتھ شیروں والا حال کر دیا۔ اب معاشی دہشت گردی ختم ہو رہی ہے ملک آگے جا رہا ہے۔ نجم سیٹھی بدل گئے ہیں نہ نواز شریف ”تھینک یو“ نہ وزیر اعلیٰ ”تھینک یو“ قذافی سٹیڈیم ہی اصل میں فوج نے میچ کروایا ہے۔ شکریہ کی حقدار فوج ہے لیکن وہ حکومت کو کریڈٹ دے رہی ہے۔

لاہور (نیٹ نیوز) لاہور کے حلقہ این اے 120 میں سابق وزیراعظم نواز شریف کی نااہلی کی وجہ سے خالی ہونے والی قومی اسمبلی کی نشست کے لیے 17 ستمبر کو ضمنی انتخاب ہو رہا ہے اور حلقے میں سیاسی مہم کے آخری دور میں سرگرمیاں اپنے عروج پر ہیں۔ بائیومیٹرک ڈیوائسز سے پاکستان میں الیکشن کے طریق کار میں تو بدلاو¿ آ رہا ہے لیکن کیا روایتی انتخابی مہم میں بھی کوئی تبدیلی آئی ہے؟بی بی سی کی ٹیم نے این اے 120 کا دورہ کیا تو ایسا معلوم ہوتا ہے کہ کچھ بھی نہیں بدلا۔ اب بھی مختلف سیاسی جماعتوں کی جانب سے ووٹ مانگنے کے وہی طریقے اپنائے جا رہے ہیں جو گذشتہ کئی دہائیوں سے رائج ہیں۔ کسی کو پیٹرول کا لالچ دیا جا رہا ہے تو کسی کو مفت دوائیاں اور کہیں روایتی کھابے کے چسکے پورے کیے جا رہے ہیں۔ ووٹرز کو ان کے مزاج کے مطابق مختلف طریقوں سے قائل کیا جا رہا ہے۔ حلقے کے ووٹرز نے دعویٰ کیا کہ نواز لیگ کی جانب سے رہائشیوں کو خوش کرنے کے لیے مفت پٹرول دیا جا رہا ہے۔ مقامی کمپنی میں ملازم وقاص محمد نے بتایا ‘بغیر کسی وعدے کے اور شناختی کارڈ دکھائے، میں اپنے علاقے میں موجود مسلم لیگ نواز کے دفتر گیا۔ سب ہمیں وہاں جانتے ہیں، تو انھوں نے میری موٹر سائیکل کی پیٹرول کی ٹینکی فل کروا دی۔ بدلے میں کچھ مانگا نہیں لیکن ان کہی سی بات ہے کہ وہ چاہتے ہیں کہ ہم بدلے میں ان کو ووٹ دیں۔’جب اس بارے میں مسلم لیگ نواز کے مقامی یونین کونسل 58 کے چیئرمین شہاب بشارت سے پوچھا گیا تو انھوں نے انکار کرتے ہوئے شکوہ کیا کہ پارٹی تو انھیں سیاسی مہم کی لیے کوئی پیسے ہی نہیں دے رہی۔’سب خرچہ ہم اپنی جیب سے کر رہے ہیں، چاہے وہ دس ہزار کی لاگت کی سٹریٹ لائٹس ہوں یا پول پر لگی خراب بجلی کی تاروں کی تبدیلی یا سڑکوں کی تعمیر۔ ہم کسی کو پٹرول نہیں دے رہے۔ ہاں اپنے علاقے کے لوگوں کے کام ضرور کروا رہے ہیں، لیکن صرف پارٹی کے لیے۔’حجام کی دکان کے باہر کرسیوں پر اپنی محفل سجائے نون لیگ کے سپورٹرمرتضیٰ رسول اور پی ٹی آئی کے کارکن جاوید کوثر سیاسی بحث میں مصروف تھے۔مرتضیٰ رسول نے بتایا کہ علاقے میں موجود پی ٹی آئی کے دفاتر میں روز صبح کے ناشتہ کے ساتھ دوپہر اور رات کا کھانا کسی لنگر سے کم نہیں ہوتا۔ ‘کھاتے سب ہیں لیکن ووٹ تو ہماری نون لیگ کو ہی دیں گے، آپ دیکھیے گا۔ یہ پی ٹی آئی والے کھانا دے کر یا ہزار، پندرہ سو روپے میں ہمارا ووٹ نہیں خرید سکیں گے۔’مرتضیٰ رسول کی بات کی تائید مسلم لیگ نون کی دیرینہ ووٹر ربیعہ نصرت نے کی۔ ان کا کہنا ہے کہ پی ٹی آئی والے علاقے میں ووٹ خرید رہے ہیں۔’پی ٹی آئی والے میرے پاس آئے اور کہا کہ فی ووٹر دو ہزار روپے دیں گے، آپ حلفیہ بیان دی دیں کہ آپ ووٹ ہمیں ہی دیں گی۔ تو میرا جواب تھا کہ میرا ووٹ بکاو¿ نہیں، اگر ضمیر ہی بیچنا ہے تو دو ہزار روپے بہت کم قیمت ہے۔’ان سوالوں کے جواب ڈھونڈنے جب سنت نگر میں پی ٹی آئی کے آفس پہنچے تو علاقے میں مہم سازی کرنے والی ٹیم سے ملاقات ہوئی۔ماضی میں مسلم لیگ نواز اور اب پی ٹی آئی کے کارکن محمد آفتاب نے الزامات مسترد کرتے ہوئے کہا کہ کھانے اور مہم سازی کے تمام اخراجات پارٹی نہیں، ممبران ذاتی فنڈز کے ذریعے پورے کر رہے ہیں۔’پی ٹی آئی کے پاس نون لیگ جتنا کھلا پیسہ نہیں۔ ہم تو اپنے خرچے مشکل سے پورے کرتے ہیں۔ جبکہ نون لیگ والے ووٹرز کو نوکریوں کا لالچ اور دھمکیاں دے کر اپنی طرف کھینچ رہے ہیں۔’پاکستان میں سیاست کے روایتی انداز کو برقرار رکھتے ہوئے الیکشن میں شامل ہر سیاسی پارٹی کی کوشش ہے کہ مخالف پارٹی کی کمزوری ڈھونڈ کر حلقے کے ووٹر کو کسی نہ کسی طرح اپنی جانب کھینچ لیں۔ایسے میں ایک نئی پارٹی منظر عام پر آئی ہے جو اب تک الیکشن کمیشن میں رجسٹرڈ بھی نہیں۔جماعت الدعوہ کی سیاسی پارٹی ملی مسلم لیگ آزاد امیدوار محمد یعقوب شیخ کی حمایت کر رہی ہے اور ان کے لیے علاقے میں مہم بھی چلا رہی ہے۔مسلم لیگ نواز کے کارکن شہاب بشارت کا کہنا ہے کہ ‘لوگوں کے خدمت کرنے کا سلوگن لے کر ملی مسلم لیگ مفت دوائیاں، شربت اور پھلوں کے تحائف دے کر علاقے میں ووٹرز کو گھیر رہی ہے۔’دوسری جانب ملی مسلم لیگ کے ترجمان تابش قیوم کا کہنا ہے کہ صرف عوام کی خدمت کر رہے ہیں۔’ہم گھر گھر جا کر آگاہی پھیلا رہے ہیں، سامان نہیں۔ ہماری پارٹی نئی ہے اس لیے لوگوں کو مل کر بتا رہے ہیں کہ ہم ان کے مسائل حل کرنا چاہتے ہیں لیکن ووٹرز کو کسی قسم کا لالچ نہیں دے رہے۔

اسلام آباد (صباح نیوز‘آئی این پی) عوامی مسلم لیگ کے سربراہ شیخ رشید احمد نے کہا ہے کہ نیب نے سپریم کورٹ آف پاکستان کے سامنے وعدہ کیا ہے کہ وہ حدیبیہ پیپرز مل کیس فیصلہ کے خلاف ایک ہفتے کے اندر سپریم کورٹ میں اپیل دائر کر دے گا۔ تاریخ یاد رکھے گی کہ جرائم کی ماں حدیبیہ پیپرز مل کیس ہے۔ سپریم کورٹ کے باہر میڈیا سے گفتگو کرتے ہوئے شیخ رشید احمد کا کہنا تھا کہ دوسرا کیس بھی عوامی مسلم لیگ نے جیت لیا۔ سپریم کورٹ کے سامنے نیب سے وعدہ لیا گیا ہے کہ سات روز کے اندر اندر حدیبیہ پیپر مل فیصلہ کے خلاف سپریم کورٹ میں اپیل دائر کر دی جائے گی۔ یہ ایک کیس ہے جس میں 1242 ملین روپے ملوث ہیں۔ 1242 ملین کی منی لانڈرنگ جب تک آگے نہیں چلے گی۔ ان کا کہنا تھا کہ تاریخ یاد رکھے گی کہ جرائم کی ماں حدیبیہ پیپر مل کیس ہے۔ سپریم کورٹ نے فیصلہ دے دیا ہے کہ یہ کیس سات روز کے اندر اندر دائر کیا جائے۔ ان کا کہنا تھا کہ اب تیسرے کیس کی تیاری ہے وہ ایل این جی ہے۔ ایل این جی 200 ارب روپے کا گھپلا ہے جس سے 10 ارب ڈالرز کی ایکسپورٹس کم ہوئی ہیں اور 10 ارب ڈالرز کی امپورٹس زیادہ ہوئی ہیں۔ شیخ رشید نے کہا کہ سخت تجارتی خسارہ ہے اس میں میں ثابت کروں گا کہ وزیراعظم شاہد خاقان عباسی پارٹنر ہے۔ اس میں بڑے بڑے ٹائیکون شامل ہیں۔انہوں نے کہا کہ میری زندگی کو بھی خطرہ ہے لیکن اس کے باوجود اللہ کو منظور ہوا تو یہ تیسرا کیس بھی اللہ تعالیٰ کی مدد اور پاکستانی ماں، بیٹیوں، بہنوں اور بھائیوں کی دعاں سے میں ایل این جی کیس بھی جیتوں گا اور ثابت کروں گا کہ شاہد خاقان عباسی پارٹنر ہے اور اس میں بڑے بڑے 200 ارب روپے کے گھپلے ہیں۔انہوں نے کہا کہ پاناما میں وہ اکیلے تھے ، بعد میں جو لوگ آئے ان کے شکر گزار ہیں، اسی حدیبیہ میں بھی ہم اکیلے ہیں۔انہوں نے کہا کہ ان کا مقصد پیڑ گننا نہیں بلکہ آم کھانا ہے، وہ بہت جلد دوحہ جائیں گے جہاں سے ایل این جی منصوبے کے اصل کاغذات حاصل کرکے الیکشن کمیشن اور سپریم کورٹ میں جمع کرائیں گے، اگر اصل کاغذات مل گئے تو یہ ہماری تیسری فتح ہوگی۔انہوں نے کہا کہ پاناما مونگ پھلی کا دانہ جبکہ حدیبیہ پیپز ملز مدر آف دی کرائم ہے حدیبیہ پیپرز ملز شریف خاندان کے لیے مہلک ثابت ہو گا۔

لاہور (وقائع نگار) پاکستان تحریک انصاف کی جانب سے قومی اسمبلی میں اپنا قائد حزب اختلاف لانے کے لیے دیگر سیاسی جماعتوں کے ساتھ رابطوں کا آغاز کیا گیا ہے ۔اس وقت ایوان میں پاکستان تحریک انصاف کے 32، متحدہ قومی موومنٹ کے24، جماعت اسلامی کے4 اور پاکستان مسلم لیگ کے دو ارکان موجود ہیں یوں مجموعی تعداد 62 بنتی ہے جن کی حمایت پی ٹی آئی کے متوقع امیدوار شاہ محمود قریشی کو حاصل ہوسکتی ہے ۔اسی طرح پاکستان پیپلز پارٹی کے47 ارکان ہیں جبکہ انہیں عوی نیشنل پارٹی کے2، قومی وطن پارٹی(شیرپاﺅ)کے ایک رکن کی حمایت حاصل ہے ۔اپوزیشن لیڈر کے انتخاب کے وقت سید خورشید شاہ کو کل58 ووٹ دستیاب تھے ۔اصل اہمیت آزاد ارکان کی ہوگی جن کی کل تعداد 10ہے اور دونوںاپوزیشن جماعتیں ان کا اعتماد حاصل کرنے کی کوشش کریں گی۔

اسلام آباد (آئی این پی) سپریم کورٹ نے قومی احتساب بیورو (نیب ) کی جانب سے حدیبیہ پیپر ملز کیس پر اپیل دائر کر نے کی یقین دہانی کے بعد عدالت نے شیخ رشید کی درخواست نمٹا دی جبکہ نواز شریف کے بچوں کے وکیل سلمان اکرم راجہ نے دلائل د یئے کہ لندن فلیٹس سے متعلق کیپٹن صفدر کے خلاف ریفرنس کا حکم دیا گیا ، لندن فلیٹس سے کیپٹن صفدر کا کوئی تعلق نہیں ،جے آئی ٹی رپورٹ میں کیپٹن صفدر کا فلیٹ سے تعلق سامنے نہیں آیا، کیپٹن صفدر نے بطور گواہ ٹرسٹ ڈیڈ پر دستخط کئے ،اس پرجسٹس آصف سعید کھوسہ نے ریمارکس دیئے کہ جے آئی ٹی کے مطابق مریم نواز کمپنی کی بینی فیشل مالک ہیں۔ مریم نواز نے پہلے لندن فلیٹس سے تعلق کا انکار کیا تھا۔ معاملے کی تحقیقات ہونی چاہئیں۔

اسلام آباد (آن لائن) وزیراعظم شاہد خاقان عباسی نے وفاقی وزیر خزانہ سینیٹر اسحاق ڈار کو عہدہ سے ہٹانے کے لئے ہوم ورک مکمل کر لیا ہے۔ مفتی اسماعیل کو مشیر خزانہ بنانے کی تجویز زیر غور ہے۔ معلومات کے مطابق پانامہ کیس میں وفاقی وزیر خزانہ اسحاق ڈار کو نامزد ملزم قرار دینے اور پھر نیب میں ریفرنس دائر ہونے رپ حکومت کے لئے اسحاق ڈار کو وزارت خزانہ کے عہدہ پر برقرار رکھنا مشکل ہو گیا ہے۔ دوسری جانب وزیراعظم کے سپیشل اسسٹنٹ مفتی اسماعیل نے 13نومبر کو اپنے عہدہ سے استعفیٰ دیدیا تھا جس کو وزیراعظم نے منظور بھی کر لیا ہے۔ ذرائع وزیراعظم ہا¶س کے مطابق وزیراعظم شاہد خاقان عباسی نے مفتی اسماعیل سے مشاورت کر کے وزیر خزانہ اسحاق ڈار کو بھی آگاہ کر دیا ہے۔ توقع کی جا رہی ہے کہ آئندہ2روز میں اسحاق ڈار اپنے عہدہ وزارت سے استعفیٰ دے دیں گے۔ ذرائع کا کہنا ہے کہ وزیراعظم نے سابق وزیراعظم سے بھی ٹیلی فونک مشاورت کر لی ہے جس کی انہوں نے بھی فیصلہ کی توثیق کی ہے۔ واضح رہے کہ حدیبیہ پیپر ملز کیس اگر دوبارہ کھول دیا گیا تو اس میں اسحاق ڈار کا اہم کردار ہو گا اور اس مقدمہ میں اہم گرفتاریاں بھی متوقع ہیں۔