لاہور( خصوصی رپورٹ) سوشل میڈیا کی مقبول ترین ویب سائٹ فیس بک نے 27کروڑ جعلی اکاﺅنٹس کا اعتراف کرلیا۔میڈیا رپورٹس کے مطابق فیس بک نے اس بات کو تسلیم کیا ہے کہ سوشل میڈیا کے اس پلیٹ فام کو استعمال کرنے والے صارفین کے27کروڑ اکاﺅنٹس جعلی ہیں جبکہ جعلی اکاﺅنٹس کی تعداد میں مسلسل اضافہ ہورہا ہے جس پر حکام میں شدید تشویش پائی جاتی ہے۔ رواں ہفتے فیس بک نے مالی سال کے سہ ماہی رپورٹ شائع کی تھی جس میں بتایا گیا تھا کہ گزشتہ سال کی نسبت رواں سال اسی دورانیے میں جعلی اکاﺅنٹس کی تعداد میں ہوشربا اضافہ دیکھا گیا ہے۔فیس بک کا کہنا ہے کہ اس کے مجموعی صارفین میں سے 10فیصد اصلی اکاﺅنٹ ہولڈر ز ایسے ہیں جو ڈپلیکیٹ اکاﺅنٹس چلا رہے ہیں۔ فیس بک انتظامیہ ان جعلی اور ڈپلیکیٹ اکاﺅنٹس کی بھرمار سے پریشان ہے اور وہ قانونی ماہرین کی مدد سے مذکورہ اکاﺅنٹس کے خلاف قانونی کارروائی کا سوچ رہی ہے۔
