بہاولنگر(تحصیل رپورٹر) بہاولنگر کے نواحی بستی کے رہائشی علی احمد کھرل نے خبریں ہیلپ لائن سے رابطہ کیا اور اپنے ساتھ ہونے والے ظلم کے متعلق بتایا جس پر خبریں کی ٹیم ملک مقبول احمد چک مدرسہ کی نواحی بستی نہالکا میں پہنچی تو پولیس کے ہاتھوں ظلم کا شکار ہونے والے متاثرہ خاندان نے بتایا کہ نہالکا میں قبضہ گروپ نے تھانہ مدرسہ کی پولیس کے ہمراہ محنت کش خاتون عذرا بی بی کے گھر رات کی تاریکی میں دھاوا بول دیا ،بوڑھے ،خواتین اور بچوں پر تشدد مکان کو زمین بوس کر دیا کارروائی کر نے کی صورت میں ہمیںجان سے مارنے کی دھمکیاں دیں اور تھانہ مدرسہ پولیس نے ہمارے دو بندوں کو بھی پولیس حراست میں رکھا اور چوبیس گھنٹوں کے بعد انہیں رہا کیا گیا۔ اس بارے میں جب ایس ایچ او تھانہ مدرسہ سرفراز تارڑ سے پوچھا گیاتو ایس ایچ او نے اپنا مو¿قف دینے سے انکار کر دیا اور کہا کہ ہمیں آئی جی پولیس پنجاب کی جانب سے ہدایت ہے کہ کسی بھی میڈیا نمائندے کو اپنا بیان ریکارڈ نہ کروائیں مظلوم خاندان کی آئی جی پولیس پنجاب سے انصاف کی اپیل ۔تفصیلات کے مطابق تھانہ مدرسہ کی حدود میں واقع بستی نہالکا کے رہائشی علی احمد کھرل نے خبریں ہیلپ لائن کی ٹیم کو بتایا کہ اس کی ہمشیرہ عذرا بی بی اپنے بچوں اور والدین کے ہمراہ گھر میں سو رہی تھی کہ رات دس بجے کے قریب قبضہ گروپ کا سر غنہ بشیر ڈھڈی ،محمد منیر محمد حاکم علی ،امین ماچی اور تھانہ مدرسہ کی پولیس کے ہمراہ چادر چار دیواری کا تقدس پامال کرتے ہوئے گھر میں داخل ہوئے اور خواتین اور بچوں کو مار مار کر گھر سے نکال دیا اسکے بعد ٹریکٹر کی مدد سے سارے گھر کو مسمار کر دیا اس دوران شور واویلا کرنے پر اہل علاقہ علی اختر ولد اللہ دتہ،غلام حسن منور، محمد نعیم، محمد عقیل ،امیر علی،مبشر وغیرہ اکٹھے ہو گئے اور احتجاج کرنے لگے تو ایس ایچ او تھانہ مدرسہ سرفراز تارڑ اور دیگر پولیس ملازمین نے ان پر اسلحہ تان لیا اور کہا کہ اگر اب تم نے شور مچایا تو جعلی پولیس مقابلہ میں تمہیں مار دیں گے علی احمد نے بتایا کہ بشیر ڈھڈی قبضہ گروپ ہے اور میری ہمشیرہ کی جگہ پر قبضہ کرنا چاہتا ہے جس کے لیے اس نے تھانہ مدرسہ کے ایس ایچ او کو بھی اپنے ساتھ ملا لیا ہے قبضہ گروپ بشیر ڈھڈی اور تھانہ مدرسہ کی پولیس نے چادر چار دیواری کا تقدس پامال کر کے ہمارے ساتھ سخت زیادتی کی ہے ہم خبریں ہیلپ لائن کے توسط سے وزیر اعلی پنجاب میاں شہباز شریف،آئی جی پولیس پنجاب اور ڈی پی او بہاولنگر سے قبضہ گروپ بشیر ڈھڈی اور تھانہ مدرسہ کے ایس ایچ او کے خلاف فوری قانونی کاروئی کا مطالبہ کرتے ہیں ہمیں انصاف دیا جائے وگرنہ ہم ڈی پی او آفس کے سامنے بچوں سمیت خود سوزی کر لیں گے ۔
