اسلام آباد (مانیٹرنگ ڈیسک) عوامی مسلم لیگ کے سربراہ شیخ رشید نے کہا ہے کہ اس وقت نواز شریف کے خلاف میدان میں عمران خان اور شیخ رشید کھڑے ہیں عدالتوں میں دینے کے لئے نواز شریف کے پاس کوئی ثبوت نہیں پاکستان میں حقیقی اپوزیشن عمران خان کر رہے ہیں۔ انہوں نے کہا کہ تیس دسمبر سے قبل اصلاحات اور حدیبیہ کا کیس اپنے انجام کو پہنچ جائے گا، نیب کے پاس ایک لسٹ ہے جس میں بڑے بڑے لوگوں کے نام ہیں شہباز شریف اندر سے اپنے بھائی کے اتنے مخالف ہیں جتنا میںہوں لیکن منہ پر کچھ نہیں کہتے شہباز شریف بزدل انسان ہیں۔ نجی ٹی وی کے ساتھ گفتگو میں انہوں نے کہاکہ نواز شریف تو کہتے ہیں انڈیا اور پاکستان کا بارڈر ہی ختم کردو۔ نواز شریف کی پوری کوشش ہے کہ فوج آ جائے۔ ختم نبوت کا معاملہ حکومت نے خود کھڑا کیا۔ یہ پاکستان سے دشمنی پر اتر آئے ہیں ان کی جھوٹ کی سیاست زیادہ دیر نہیں چل سکتی، زرداری کے قریبی ساتھی نے بتایا کہ نواز شریف سے کسی صورت بات نہیں ہوگی ،گورنر ہاﺅس سندھ میں ن لیگ کا میڈیا ہاﺅس ہے۔ پیپلز پارٹی اگر ن لیگ سے ہٹ کر سیاست کرے تو یہ قوم پر احسان ہو گا۔ انہوں نے بتایا کہ نواز شریف پاکستان کے دشمنوں کے ساتھ مل کر لڑائی کر رہے ہیں لیکن نواز شریف جو لڑائی لڑ رہے ہیں اس کی قیمت ان کو ادا کرنا پڑے گی۔ ملک کے اصل دشمن یہ لوگ ہیں کیونکہ ان کا پیٹ نہیں بھر رہا یہ لوگ نمائندے نہیں کاروباری ہیں ان کی سب سے بڑی انڈسٹری سیاست ہے یہ بس کمانے کے لئے ہیں ان کے منہ سے جو بچ کر گر جائے وہ قوم کے لئے ہے جن کی انیس کمپنیاں نکلیں وہ کہتے ہیں ہمیں کوئی بھی پوچھنے والا نہیں ۔ شیخ رشید نے کہا کہ نواز شریف تو اس نظریے کا نام ہے کہ کھاﺅ پیو اور بھاگ جاﺅ۔ ڈر ہے نواز شریف کی وجہ سے سیاست میں مزید انتشار پیدا نہ ہو۔ وزیر اعظم شاہد خاقان عباسی اسحاق ڈار کو وزیر خزانہ دیکھنا نہیں چاہتے تھے۔ ایم این ایز بے چارے بڑے کمزور ہوتے ہیں انہوں نے خود کو بھی بچانا ہوتا ہے۔ پنجاب میں مقابلہ ن لیگ اور پی ٹی آئی کے درمیان ہے۔
