اسلام آباد (خصوصی رپورٹ) انٹرپول نے بلوچ قوم پرست براہمداغ بگٹی کی گرفتاری کے لئے اس کے ریڈ وارنٹ جاری کرنے سے انکار کردیا اس سے قبل انٹرپول نے حکومت پاکستان کی درخواست پر بانی ایم کیو ایم الطاف حسین کے ریڈ وارنٹ بھی جاری کرنے سے انکار کیا تھا۔ ذرائع کے مطابق محکمہ داخلہ بلوچستان کی درخواست پر وفاقی وزارت داخلہ نے براہمداغ بگٹی کی بیرون ملک سے گرفتاری کے لئے انٹرپول کو ریڈ وارنٹ کے اجراءکی درخواست کی تھی تاہم انٹرپول نے حکومت پاکستان کو جواب دیا ہے کہ براہمداغ بگٹی کے ریڈ وارنٹ جاری نہیں کئے جاسکتے۔انٹرپول کی طرف سے کہا گیا ہے کہ براہمداغ بگٹی کو سیاسی انتقام کا نشانہ بنایا جاسکتا ہے اور انٹرپول کے ضابطہ کار کے مطابق جن لوگوں کو سیاسی انتقام کے لئے گرفتار کیا جائے انٹرپول ان کی مدد نہیں کرتا۔
