کراچی(شوبز ڈیسک)اداکار احسن خان کا کہنا ہے کہ پاکستانی فلموں کا معیار پہلے سے بہتر ہورہا ہے۔خصوصی انٹرویو میں احسن خان نے بتایا کہ پاکستانی فلموں کا معیار پہلے سے بہتر ہوگیا ہے، یہاں فلمیں ٹی وی کے مقابلے میں زیادہ نہیں چلتیں، لیکن اب یہ رواج بدل رہا ہے اور سینما گھروں میں پاکستانی فلمیں بھی دیکھی جارہی ہیں جبکہ کافی اداکار بھی اب ٹی وی سے فلموں کی طرف رخ کر رہے ہیں۔فلم ‘چھپن چھپائی’ پاکستانی کامیڈی فلم ہے جس میں ایکشن، رومانس اور کامیڈی ایک ساتھ دیکھنے کو ملے گی، اس فلم کی کاسٹ میں احسن خان اور نیلم منیر شامل ہیں۔فلم کی کہانی آج کے بے روزگار نوجوانوں کے گرد گھومتی ہے جو شارٹ کٹ لے کر پیسے کمانے کی کوشش میں لگے ہوئے ہیں، فلم کا ٹریلر دیکھنے کے بعد مداحوں کو بے صبری سے فلم کے ریلیز ہونے کا انتظار ہے۔احسن خان نے بتایا کہ فلم ”چھپن چھپائی“نئے ٹیلنٹ کو سامنے لائے گی کیونکہ اس میں نیشنل اکیڈمی آف پرفارمنگ آرٹس(ناپا) کے ایک طالب علم نے اداکاری کے جوہر دکھائے ہیں۔ان کا کہنا تھا کہ لالی وڈ کو نئے ٹیلنٹ کی ضرورت ہے اور ہمیں چاہیے کہ نئے آنے والوں کے ساتھ ہم پورا تعاون کریں۔

کراچی(شوبز ڈیسک ) دل دل پاکستان سے دلوں کو جیتنے والے جنید جمشید کی پہلی برسی عقیدت و احترام کیساتھ منائی گئی۔ سانحہ حویلیاں کو ایک سال ہونے پر سوگواروں کے زخم پھر تازہ ہوگئے، دل دل پاکستان کے گیت گانے والے جنید جمشید کی دھڑکنیں بھی فضاﺅں میں ان کے ملی نغمے کے ساتھ گونج اٹھی ہیں، جنید جمشید کےلئے 7 دسمبر 2016 کو پی آئی اے کے بدقسمت طیارے کا سفر ہی سفر آخرت ثابت ہوا۔جنید جمشید آج اس دنیا میں نہیں لیکن اپنے بابا کے ساتھ گزرے لمحات کو یاد کرکے ان کے بچوں کا دل تڑپ اٹھتا ہے، خاندان سے جڑی خوشیاں ہوں یا کوئی بھی مشکل آئے بچوں کو اپنے بابا کی کمی محسوس ہوتی ہے جس سے ان کی آنکھیں نم ہو جاتی ہیں۔سانحہ حویلیاں نے 47 خاندانوں کو رلا دیا ہے لیکن تمام لواحقین کے دلوں میں اپنے پیاروں کی یادیں آج بھی زندہ ہیں، وہیں جنید جمشید کے بچوں نے کم عمری میں ہی گھر والوں کی ذمہ داری سنبھال لی ہے۔ اور اپنے بابا کی طرح اللہ تعالی کا پیغام دنیا بھرمیں پھیلانے کو ہی اپنا مشن بنالیا ہے۔

ممبئی (شوبز ڈیسک) بالی وڈ اداکارہ شردھا کپور نے کہا ہے کہ فلم انڈسٹری میں خواتین کے لئے یہ بہترین وقت ہے۔ بھارتی میڈیا کے مطابق اداکارہ شردھا کپور نے کہا ہے کہ وہ خواتین کی فلم انڈسٹری میں منزل کے تعین اور اہم مقام حاصل کرنے کے حوالے سے فرضی داستانوں کو ختم کرتے ہوئے بہت جوش و جذبے اور پھرتی سے کام کر رہی ہیں اور فلم انڈسٹری میں خواتین کے لئے یہ بہترین وقت ہے۔اداکارہ شردھا کپور ہدایتکار راج اور ڈی کے کی ہارر کامیڈی فلم میں اداکار راج کمار راﺅ کے ساتھ نظر آئیں گی جس کا نام ابھی نہیں رکھا گیا۔

گوجرانوالہ(شوبز ڈیسک) سٹیج ڈرامے میں ڈانس کے دوران فحش حرکات کرنے پر اداکارہ آفرین خان کو نوٹس جاری کردیا گیاجبکہ دوبارہ ضابطہ اخلاق کی خلاف ورزی کرنے پر فوری کارروائی کی تنبیہ کر دی گئی ہے۔میڈیا رپورٹس کے مطابق سٹیج ڈرامہ ”پٹرول پمپ “میں ضابطہ اخلاق کی خلاف ورزی کی مانیٹرنگ رپورٹ پر آرٹس کونسل نے سٹیج اداکارہ آفرین خان کو وارننگ نوٹس جاری کر دیا ہے جس میں کہا گیا کہ سٹیج پرفارمنس کی سی ڈی میں ضابطہ اخلاق کی خلاف ورزی کا مکمل ریکارڈ موجود ہے اسلئے وہ مستقبل میں ایسی حرکات نہ کریں ورنہ انکے خلاف سخت کارروائی عمل میں لائی جائیگی۔ ذرائع کے مطابق وارننگ لیٹر کی کاپی ڈپٹی کمشنر سمیت دیگر افسروں کو بھی بھجوادی گئی ہے۔

لاہور (شوبز ڈیسک )ایسا پہلی دفعہ نہیں ہوا کہ اداکاروں کو اپنے ملبوسات کی وجہ سے تنقید کا نشانہ بنایا گیا ہو اکثر ہی دیکھنے میںآیا ہے کہ مداح اداکاروں کو تنقید کا نشانہ بناتے ہیں۔پاکستان کی معروف اداکارہ ارمینہ خان کے ساتھ بھی کچھ ایسا ہی ہوا۔میڈیاکے مطابق معروف اداکارہ ارینہ خان نے سماجی رابطے کی ویب سائٹ پر اپنی تصویر لگائی تھی جس میں اداکارہ نے مغربی طرز کا لباس پہنا تھا جس پر ایک مداح نے ارمینہ کو شدید تنقید کا نشانہ بناتے ہوئے کہا کہ ان کو ایسے ملبوسات نہیں پہنے چائیں کیونکہ ایک دن ان کو مرنا بھی ہے۔ جس پر اداکارہ نے مداح کو کھری کھری سناتے ہوئے کہا کہ پریانکا بنوں ،انجلینا بنوں یا سانٹا کلاز بنوں ،آپ میری پھپھو نہ بنیں تو بہتر ہے ۔