نئی دہلی (اے پی پی) پاکستان نے بلائنڈ ٹی 20 ورلڈ کپ کے اپنے چھٹے میچ میں جنوبی افریقہ کو 9 وکٹوں سے شکست دے کر ایونٹ میں مسلسل چھٹی کامیابی حاصل کر لی۔ پاکستان بلائنڈ نے 101 رنز کا ہدف بآسانی ایک وکٹ کے نقصان پر حاصل کر لیا، بدر منیر نے 60 رنز کی ناقابل شکست اننگز کھیلی۔ تفصیلات کے مطابق کرناٹکا اسٹیٹ کرکٹ ایسوسی ایشن گراﺅنڈ پر کھیلے گئے میچ میں جنوبی افریقہ بلائنڈ نے پہلے بیٹنگ کرتے ہوئے 9 وکٹوں کے نقصان پر 100 رنز بنائے۔ تیفو لیسلے 19 رنز کے ساتھ ٹاپ سکورر رہے جبکہ جنوبی افریقہ کے آٹھ بلے باز دوہرا ہندسہ بھی عبور نہ کر سکے۔ انیس جاوید نے دو جبکہ بدر منیر اور ریاست خان نے ایک ایک وکٹ حاصل کی۔ جواب میں پاکستان بلائنڈ نے ہدف بآسانی 5.1 اوورز میں ایک وکٹ کے نقصان پر حاصل کر لیا، بدر منیر نے جارحانہ بیٹنگ کا مظاہرہ کیا اور 20 گیندوں پر 60 رنز کی ناقابل شکست اننگز کھیلی جس میں دو چھکے اور دس چوکے شامل تھے۔ محمد جمیل 29 رنز کے ساتھ ناٹ آﺅٹ رہے۔ یہ پاکستان بلائنڈ کی ایونٹ میں مسلسل چھٹی کامیابی ہے۔ پاکستان بلائنڈ کر کٹ ٹیم ٹورنامنٹ میں تاحال ناقابل شکست ہے۔پاکستان اپنا ساتواں میچ (آج)منگل کو بنگلہ دیش کیخلاف کھیلے گا۔

لاہور(نیوز ایجنسیاں) انڈین ٹینس ثانہ مرزا نے پاکستانی سٹار بلے باز شعیب ملک کےساتھ اپنی کامیاب ازدواجی زندگی کے راز سے پردہ اٹھا دیا ہے۔ انڈین نجی ٹیلی ویژن کے مشہور کافی ون کرن میں گفتگو کرتے ہوئے انڈین ٹینس سٹار ثانیہ مرزا نے کہا ہے کہ شعیب ملک کے ساتھ ان کی کامیاب ازدواجی زندگی کا راز یہ ہے کہ ہم دونوں اکثر ایک دوسرے سے دور رہتے ہیں۔ ثانیہ نے کہا کہ ان کے والد اکثر مذاق کرتے ہیں کہ میری والدہ سے ان کی 31 سالہ رفاقت کا راز بھی ٹینس ہی ہے۔ کچھ عرصہ قبل میڈیا میں یہ افواہیں گردش کر رہی تھیں کہ ثانیہ اور شعیب میں علیحدگی ہو چکی ہے اور نوبت طلاق تک پہنچ گئی ہے تاہم اب ثانیہ نے موضوع پر کھل کر بات کرکے ان افواہوں کو ہی رد کر دیا ہے۔ ثانیہ سے جب شادی سے قبل بالی ووڈ ایکٹر شاہد کپور کے ساتھ تعلقات کے بارے میں بات کی گئی تو انہوں نے کہا کہ اس کو بہت دیر ہو چکی ہے، اب مجھے کچھ یاد نہیں، ان کا کبھی کسی اداکار کے ساتھ کوئی تعلق نہیں رہا۔

لاہور(نیوزایجنسیاں)پاکستان کرکٹ ٹیم کے سابق کپتان ظہیرعباس نے پاکستان کرکٹ بورڈ (پی سی بی) کو مشورہ دیا ہے کہ وہ ہوم سیریز کی میزبانی کے لیے انگلینڈ کو غیرجانب دار مقام کے طور پر استعمال کرے۔راولپنڈی میں گورنمنٹ وقارالنسا کالج برائے خواتین میں ویمن کرکٹ اکیڈمی کی افتتاحی تقریب کے دوران ظہیرعباس نے کہا کہ ‘متحدہ عرب امارات میں کھیلنے سے ٹیم کی کارکردگی بہتر نہیں ہورہی ہے اور خصوصاً باو¿لرز کی کارکردگی بہتر نہیں ہوئی’۔متحدہ عرب امارات کے بجائے انگلینڈ کو متبادل مقام کے طور پر چننے کا مشورہ دیتے ہوئے انھوں نے کہا کہ ‘انگلینڈ میں ہمارے تماشائیوں کی ایک بڑی تعداد موجود ہے اور انگلینڈ میں کھیلنے کے نتیجے میں ٹیم کی کارکردگی بہتر ہوگی’۔انھوں نے پی سی بی پر زور دیا کہ کرکٹ کی بہتری کے لیے سابق مقامی کھلاڑیوں سے بھی اس حوالے سے مشورہ لیں۔پی سی بی کی جانب سے گول میز کانفرنس بلائے جانے کے حوالے سے ایک سوال پر انھوں نے کہا کہ کانفرنس میں کھلاڑیوں کی جانب سے دیے گئے مشوروں پر اگر عمل ہوا تو حقیقی معنوں میں کرکٹ کی بہتری ہوگی۔ظہیرعباس نے راولپنڈی میں ویمن کرکٹ اکیڈمی کے قیام پر خوشی کا اظہار کرتے ہوئے پنجاب اسپورٹس کی جانب سے نوجوانوں خصوصاً خواتین کو کھیلوں کے میدان میں تعاون کرنے پر داد دی۔ان کا کہنا تھا کہ ‘امید ہے کہ ہم بہت جلد قارالنسا کالج سے کھلاڑیوں کو قومی ویمن ٹیم میں کھیلتے ہوئے دیکھیں گے’۔سری لنکن ٹیم پر 2009 میں لاہور میں ہونے والے دہشت گردوں کے حملے کے بعد غیرملکی ٹیمیں پاکستان کا دورہ نہیں کرررہی ہیں جس کی وجہ سے پاکستان کو ہوم سیریز کی میزبانی متحدہ عرب امارات میں کرنا پڑرہی ہے۔

دبئی(آئی این پی) پاکستان سپر لیگ (پی ایس ایل)کے دوسرے ایڈیشن کی ٹرافی کی تقریب رونمائی دبئی میں ہوئی جب کہ اس موقع پر لیگ میں شریک پانچوں ٹیموں کے کپتان موجود تھے۔تقریب رونمائی کے دوران گفتگو کرتے ہوئے چیرمین پی ایس ایل نجم سیٹھی نے کہا کہ ایونٹ کیلئے دنیا کی بہترین کمپنی سے ٹرافی تیار کروائی گئی ہے۔ ٹرافی آرٹ کا بہترین اور منفرد نمونہ ہے جس کا نام اسپرٹ ٹرافی رکھا گیا ہے اور اس کی تیاری میں50 ہزار کرسٹلز کا استعمال کیا گیا ہے۔ نجم سیٹھی نے کہا کہ امید ہے کہ پہلے ایڈیشن کی طرح دوسرا ایڈیشن بھی دلچسپ ہو گا۔ پی ایس ایل کے ذریعے پاکستان میں کرکٹ واپس لا رہے ہیں، دوسرے ایڈیشن کا فائنل لاہور میں ہی ہو گا۔ انہوں نے کہا کہ فاتح ٹرافی کے علاوہ دیگر تین ٹرافیز بھی دی جائیں گی۔ ایونٹ کے بہترین بیٹسمین کو ”حنیف محمد ٹرافی“ دی جائے گی۔ بہترین وکٹ کیپر ”امتیاز احمد ٹرافی“ کا حقدار ٹھرے گا جبکہ بیسٹ بولر ”فضل محمود ٹرافی“ اپنے نام کرے گا۔دفاعی چیمپئن اسلام آباد یونائیٹڈ کے کپتان مصباح الحق نے کہا کہ پہلا ایڈیشن جیتنے سے ہماری ٹیم بہت پراعتماد ہے، ٹیم کا کمبی نیشن اچھا ہے، اس بار بھی ٹرافی اپنے نام کریں گے۔ یو اے ای میں زیادہ کھیلنے کا فائدہ قومی کرکٹرز کو ہوگا، اچھی کرکٹ کھیلنے کی کوشش کریں گے جب کہ کوئٹہ گلیڈی ایٹرز کے کپتان سرفراز احمد نے کہا کہ گزشتہ سال کی طرح اب بھی اچھا کھیلنے کی کوشش کریں گے، پچھلا ٹائٹل اپنے نام نہیں کر سکے لیکن اس سال ٹرافی لے کر جائیں گے۔کراچی کنگز کے قائد سنگا کارا نے کہا کہ کراچی کنگز کی ٹیم نوجوان اور تجربہ کار کھلاڑیوں پر مشتمل ہے، ماہر کوچز کی زیر نگرانی اپنی صلاحیتوں کو بھرپور طریقے سے استعمال کریں گے، لاہور قلندرز کے کپتان میک کولم نے کہا کہ ایونٹ میں اچھی کرکٹ کھیلنے کی کوشش کریں گے جب کہ پشاور زلمی کے کپتان ڈیرن سیمی نے کہا کہ ایونٹ میں نئے جوش و جذبے کے ساتھ کھیلیں گے اور ٹرافی اپنے نام کریں ۔