شور کوٹ(این این آئی) رکن قومی اسمبلی جمشید دستی نے کہا ہے کہ کرپشن کی سزا صرف موت ہونی چاہیے ،یہ ہمارے ملک کودیمک کی طرح چاٹ رہی ہے۔ شورکوٹ میں جلسے سے خطاب کرتے ہوئے ان کا کہنا تھا کہ پانامالیکس میں حکمران اب بری طرح پھنس چکے ہیں ،عوام کی نظریں عدلیہ پرہیں۔اگر پولیس مخلص ہو تو جرائم بھی نہ ہوں گے لیکن پنجاب پولیس بھی اب سٹیٹ بن چکی ہے۔کشمیریوں سے یکجہتی پر بات کرتے ہوئے ان کا کہناتھا کہ نہتے کشمیریوں پر ڈھائے جانے والے مظالم کی مثال کہیں اور نہیں ملتی، کشمیر پاکستان کی شہ رگ ہے۔

اسلام آباد(صباح نیوز) سپریم کورٹ کے سینئرجج جسٹس عظمت سعید شیخ کو ڈاکٹروں کے مشورے کے بعد اسپتال سے ڈسچارج کردیا گیا ہے۔ سپریم کورٹ کے سینئر جج اور پاناما کیس سے متعلق مقدمے کی سماعت کرنے والے بینچ میں شامل جسٹس عظمت سعید شیخ کو ڈاکٹروں نے گھر جانے کی اجازت دے دی ہے۔ جسٹس عظمت سعید شیخ کو دل میں تکلیف کے باعث 31 جنوری کو راولپنڈی کے ادارہ برائے امراض قلب(راولپنڈی انسٹیٹیوٹ آف کارڈیالوجی) میں لایا گیا جہاں ان کی اینجیوپلاسٹی کی گئی اور انہیں ایک ہفتے آرام کا مشورہ دیا گیا۔ڈاکٹرز کے پینل نے جسٹس عظمت سعید کا طبی معائنہ کیا اور ان کی صحت تسلی بخش قراردی جس کے بعد انہیں گھر جانے کی اجازت دے دی گئی تاہم ڈاکٹروں نے انہیں مکمل صحت یاب ہونے تک آرام کا مشورہ دیا جب کہ انہیں 10 فروری کو دوبارہ طبی معائنے کے لئے بھی بلایا گیا ہے۔واضح رہے کہ جسٹس عظمت سعید شیخ پاناما لیکس سے متعلق مقدمے کی سماعت کرنے والے بینچ میں شامل ہیں جو روزانہ کی بنیاد پر کیس کی سماعت کررہا تھا تاہم ان کی بیماری کے باعث کیس کی سماعت ان کے صحت یاب ہونے تک ملتوی کردی گئی۔

پشاور (ویب ڈیسک ) پاکستان تحریک انصاف کے رہنما اور و زیر اعلیٰ کے پی کے پرویز خٹک کے قریبی دوست محمد طاہر خان عمرزئی نے مسلم لیگ (ن) میں شمولیت اختیار کرلی،طاہر خان عمرزئی کا کہنا ہے کہ تحریک انصاف میں بنیادی نظریئے کی وجہ سے شامل ہوا تھا،تحریک انصاف اپنے بنیادی نظرئیے اور اصولوں سے ہٹ چکی ہے۔پیر کو وزیراعظم کے مشیر امیر مقام کے ہمراہ پشاور میں نیوز کانفرنس کرتے ہوئے طاہر خان عمرزئی نے کہاکہ تحریک انصاف میں بنیادی نظریئے کی وجہ سے شامل ہوا تھا،تحریک انصاف اپنے بنیادی نظرئیے اور اصولوں سے ہٹ چکی ہے۔انہوں نے کہاکہ 20سال سے عمران خان کے ساتھ تھا،عمران خان کی وجہ سے میرے کئی دیرینہ ساتھی مجھے چھوڑ گئے۔اس موقع پر امیر مقام نے کہاکہ عمران خان کے نئے اور پرانے ساتھی انہیں چھوڑ کر جارہے ہیں۔

اسلام آباد(صباح نیوز) 14سال سے امریکی قید ناحق میںڈاکٹر عافیہ صدیقی کی ہمشیرہ ڈاکٹر فوزیہ صدیقی نے امریکی اور پاکستانی میڈیا میں شائع ہونے والی ان خبروں پر تشویش کا اظہار کیا ہے جس کے مطابق حکومت پاکستان غدار وطن شکیل آفریدی کو امریکہ کے حوالے کرنے کی تیاریاں کررہی ہے۔ عافیہ موومنٹ میڈیا انفارمیشن سیل سے جاری کردہ بیان میںڈاکٹر فوزیہ نے کہا ہے کہ حکومت سے پوری پاکستانی قوم عافیہ کی وطن واپسی کیلئے ایک خط لکھنے کا مطالبہ کر کرکے تھک گئی لیکن حکومت ٹس سے مس نہیں ہوئی۔ اب ایک امریکی نیوز چینل کی رپورٹ سے ظاہر ہوتا ہے کہ حکومت ڈاکٹر عافیہ صدیقی کو بھول گئی ہے اور حکمران ذاتی مفادات کے تابع ہو گئے ہیں۔ شکیل آفریدی کے حوالے سے قوم کی متفقہ رائے ہے کہ وہ ملک دشمن ہے لیکن عافیہ صدیقی کے بارے میں پوری پاکستانی قوم یکسو ہے کہ وہ نہ صرف بے گناہ ہے بلکہ اس کی واپسی سے قوم کا وقار بلند ہوگا۔ ڈاکٹر فوزیہ صدیقی نے پاک فوج کے سربراہ جنرل قمر جاوید باجوہ سے اپیل کی کہ وہ اس معاملے کا نوٹس لیںاور عافیہ کو وطن واپس لاکر قوم کا وقار بلند کریں۔انہوں نے قومی سیاسی جماعتوں کے قائدین سے بھی اپیل کی کہ قوم کی بیٹی کی جلد از جلد رہائی کیلئے اپنا کردار ادا کریں۔ ہم بار بار یہ بات صدرمملکت، وزیراعظم ، متعلقہ وزارتوں کو خطوط لکھ کراور میڈیا کے توسط سے سامنے لا چکے ہیں کہ عافیہ کی رہائی صرف ایک خط کے ذریعے ممکن تھی لیکن حکومت نے خط نہیںلکھا۔ اب حکومت ڈاکٹر شکیل آفریدی کو بلاوجہ رہا کررہی ہے۔ پاکستانی میڈیا، سیاسی جماعتیںاور پاک فوج اس کا نوٹس لیںاور حکومت کو اس طرح قومی غیرت کا سودا کرنے سے روکیں۔ ڈاکٹر فوزیہ نے مزید کہا کہ عوام 2018 ءکے انتخابات میں عافیہ کو وطن واپس لانے میںناکامی پر حکمرانوں کا احتساب کریں اور اب جو ان کے پاس ووٹ مانگنے آئے وہ ان سے سوال ضرور کریں کہ عافیہ کو واپس لانے کیلئے انہوں نے کیا کیا؟ڈاکٹر فوزیہ نے کہا کہ اگر حکومت نے عافیہ کی واپسی کیلئے کوئی اقدام نہیں کیا تو عافیہ موومنٹ عوامی تحریک شروع کردے گی۔