لاہور( شوبز ڈیسک)معروف صوفی گلوکارہ عابدہ پروین کے نئے سال کے گیت ”ملک ِخدا“ کو سوشل میڈیا پر بھرپور پذیرائی مل رہی ہے ۔ گلوکارہ عابدہ پروین نے پاکستانی قوم کو گیت کی صورت میں نئے سال کا تحفہ دیا ہے ۔”ملک ِخدا“کا میوزک امانت علی نے ترتیب دیا جس میں فارسی اور اردو دونوں زبانوں کا استعمال کیا گیا۔امر اشرف کی فلمائی جانے والی اس ویڈیو کی ہدایات اطہر اور بلال نے دی ہیں۔ویڈیو میں پاکستان کی جنوب سے شمال تک کی خوبصورتی کو پیش کیا گیا۔ویڈیو اطہر بلال نے اپنے فیس بک پر بھی شیئر کی جسے شائقین کی طرف سے بیحد پذیرائی مل رہی ہے ۔

لاہور(کلچرل رپورٹر) ڈائریکٹر عدیل پی کے اپنی فلم”جنگ“تیزی سے مکمل کرنے میں مصروف ہیں جس کی شوٹنگ نوے فیصد سے زائد مکمل ہوگئی ہے۔عدیل پی کے فلمی صنعت اور شائقین کو سرپرائز دینے کے لئے اپنی اس فلم میں اداکارہ زاراشیخ کو آئٹم گرل کے طور پر کاسٹ کیا ہے جنہوں نے آئٹم سانگ کےساتھ ساتھ ایک چھوٹاساکرداربھی اداکیا ہے۔اس فلم کی زیادہ تر شوٹنگ اندورن لاہورکی گئی جبکہ اب اس کا ایک سپیل کراچی میں کیا جائے گا۔ عدیل پی کے کی ڈائریکشن میں بننے والی فلم”جنگ“میں عمران بخاری لیڈ رول کررہے ہیں ۔جبکہ دیگرکاسٹ میں شازیہ شاہ،سفیر،مصطفےٰ کاظمی اور صائمہ سلیم شامل ہیں۔ ذرائع نے بتایا ہے کہ عدیل پی کے اس فلم کو جلد ریلیز کرنے کا ارادہ رکھتے ہیں۔ زاراشیخ پر پکچرائز ہونےو الے آئٹم سانگ کی شوٹنگ بھی چندروزپہلے مکمل کرلی گئی ہے۔

ممبئی(شوبز ڈیسک) فلم گینگسٹر سے شہرت کی بلدیوں کو چھونے والی بالی ووڈ اداکارہ کنگنا رناوت نے بھی 2017میں شادی کرنے کا اعلان کر دیا ہے۔تفصیلات کے مطابق کنگنا رناوت نے کہا ہے کہ 2017میں شادی کرنے کا ارادہ رکھتی ہیں۔انہوںنے کہا کہ وہ نئے سال کی آمد پر ایک نئی شروعات کرنا چاہتی ہوں ۔ انہوںنے کہا کہ جو خط انھوں نے بالی ووڈ اداکار ہیرتک روشن کو لکھے، انھیں بری طرح دنیا کے سامنے بے نقاب کیا گیا۔ اس وقت میں اپنے آپ کو پوری دنیا کے سامنے برہنہ محسوس کر رہی تھی اور اس کی وجہ سے میں راتوں کو روتی بھی تھی۔

لاہور(شوبز ڈیسک) اداکارہ وماڈل سارہ لورین نے کہا ہے کہ فنکاروں کی اکثریت کی اپنے کام سے زیادہ غیرسنجیدہ سرگرمیوں میں مصروف ہے،پاکستان فلم اورسینما انڈسٹری کی ترقی کے لیے ایسے لوگوں کی اشد ضرورت ہے، جواپنے کام سے عشق کرتے ہوں۔ فلمسازی کوصرف پیسہ کمانے اورشہرت پانے کا ذریعہ ماننے والے وہ مقام نہیں پاتے، جوعاشقوں کوملتا ہے عشق کی بھٹی میں جلنے والے ہی ہیرے کی طرح چمکتے ہیں۔ سارہ لورین نے کہا کہ فلم انڈسٹری سے بے لوث محبت، پیار اور چاہت رکھنے والے لوگ ماضی میں تھے ، اسی لیے توپاکستانی فلم اورسینما کے شعبے کوقدر کی نگاہ سے دیکھا جاتا تھا۔ خصوصا لیجنڈ فنکاروں سنتوش، درپن، محمد علی، وحید مراد، ندیم، شبنم، زیبا ، شمیم آرا اورصبیحہ خانم سمیت دیگرفنکاروں نے جس طرح سے لوگوں کے دلوں پرراج کیا، اس کی ایک بھی مثال موجودہ دورمیں نہیں ملتی۔ ان عظیم فنکاروں نے ایک طرف تواپنے کام سے عشق کیا اورمختلف کرداروں میں حقیقت کے رنگ بڑی مہارت کے ساتھ بھرے ، جن کولوگ آج بھی یاد کرتے ہیں۔ یہ عظیم فنکارجب کسی پروگرام میں شرکت کے لیے جاتے توان کی ایک جھلک دیکھنے والوں کاہجوم لگ جاتا جب کہ آج ایسی مثالیں نہیں ملتیں۔ادکارہ کا کہنا تھا کہ میں سمجھتی ہوں کہ اس کی بڑی وجہ فنکاروں کی اکثریت کی اپنے کام سے زیادہ غیرسنجیدہ سرگرمیوں میں مصروفیت ہے۔ اگر ایسے لوگوں کوکام کے لیے تلاش کیا جائے جواپنے کام کی عزت کرتے ہوں اور اس کے ذریعے اپنی منفرد پہچان بنانے کاعزم رکھتے ہوں، وہی لوگ پاکستانی فلم کی ترقی اوربحالی میں اہم کردارادا کرسکتے ہیں۔ نام، شہرت اوردولت کما کردوسرے پروفیشنز میں سرمایہ کاری کرنے والے پروڈیوسر اور فنکار پہلے بھی فلم انڈسٹری کی تباہی کے ذمے دار تھے اوراگرآج بھی ایسا ہی ہوا توپھرحالات جوں کے توں رہیں گے۔