لاہور(سپورٹس ڈیسک) پاکستان کرکٹ بورڈ نے دورہ نیوزی لینڈ سے قبل فٹنس کیمپ کے لیے 18 ممکنہ کھلاڑیوں کا اعلان کردیا ہے۔پی سی بی نے دورہ نیوزی لینڈ سے قبل فٹنس کیمپ کیلئے 18 ممکنہ کھلاڑیوں کا اعلان کردیا ہے جس میں عامر یامین، احمد شہزاد، صہیب مقصود اور عمرامین بھی شامل ہیں جب کہ کیویز کے خلاف ون ڈے سیریز کا آغاز 6 جنوری سے ہوگا۔ہفتہ سے شروع ہونے والے فٹنس کیمپ میں سرفراز احمد، فخرزمان،امام الحق، بابر اعظم، شعیب ملک، حارث سہیل، فہیم اشرف،عماد وسیم، محمد عامر، حسن علی، رومان رئیس، عامر یامین،عمر امین، صہیب مقصود، احمد شہزاد،محمد نواز کو مدعو کیا گیا ہے، محمد حفیظ اور اظہر علی قائد اعظم ٹرافی فائنل کھیلنے کے بعد دیگر کھلاڑیوں کو جوائن کریں گے جب کہ شاداب خان اس وقت آسٹریلوی بگ بیش لیگ کھیل رہے ہیں۔

اسلام آباد (سپورٹس ڈیسک) پاکستان کرکٹ بورڈ کے زیر اہتمام قائد اعظم ٹرافی فائنل میچ میں سوئی نادرن گیس پائپ لائن لمیٹڈ (ایس این جی پی ایل) نے واپڈا کے خلاف پہلے روز کھیل کے اختتام تک اپنی پہلی اننگز میں 6 وکٹوں پر 215 رنز بنا لئے، افتخار احمد 71 اور یاسرشاہ 11 رنز کے ساتھ وکٹ پر موجود ہیں، وہاب ریاض نے 3 کھلاڑیوں کو آﺅٹ کیا۔ جمعرات کو نیشنل سٹیڈیم کراچی میں شروع ہونے والے پانچ روزہ فائنل میچ کے پہلے روز ایس این جی پی ایل نے واپڈا کے خلاف اپنی پہلی اننگز میں 6 وکٹوں کے نقصان پر 215 رنز بنا لئے، ایس این جی پی ایل کی اننگز کا آغاز مایوس کن تھا اور 16 کے سکور پر اسے کپتان محمد حفیظ کا نقصان اٹھانا پڑا جو 12 رنز بنا کر وقاص مقصود کی گیند پر بولڈ ہوئے، 22 کے سکور پر اظہر علی 9 رنز بنا کر وہاب ریاض کی گیند کا نشانہ بنے، خرم شہزاد اور اسد شفیق نے مل کر ٹیم کو سہارا دینے کی کوشش کی تاہم 80 کے مجموعی سکور پر شفیق 23 رنز بنا کر محمد آصف کی گیند پر کیچ آﺅٹ ہوئے، خرم شہزاد 29 رنز بنا کر وہاب ریاض کی گیند پر ایل بی ڈبلیو ہوئے، اس موقع پر افتخار احمد نے محمد رضوان کے ساتھ مل کر پانچویں وکٹ کی شراکت میں 89 قیمتی رنز جوڑ کر ٹیم کا سکور 183 تک پہنچا کر اسے مکمل تباہی سے بچا لیا۔ یہاں پر وہاب ریاض نے رضوان کو آﺅٹ کر کے اہم پارٹنرشپ توڑ ڈالی، انہوں نے 42 رنز بنائے، عمران خالد 4 رنز بنا کر چلتے بنے، اس کے بعد افتخار احمد اور یاسرشاہ نے مزید نقصان نہ ہونے دیا، افتخار احمد 71 اور یاسرشاہ 11 رنز کے ساتھ وکٹ پر موجود ہیں، وہاب ریاض نے 3 جبکہ محمد آصف، وقاص مقصود اور زاہد منصور نے ایک، ایک وکٹ لی۔

کراچی(سپورٹس ڈیسک) پاکستان کے عالمی پروفیشنل باکسر محمد وسیم شدید مالی مشکلات سے دوچار ہوگئے جب کہ ان کے کورین پروموٹر نے بھی مزید مدد کرنے سے معذرت کرلی ہے۔مشکلات سے دوچار پاکستان کے عالمی پروفیشنل باکسر محمد وسیم مزید مالی مسائل کا شکار ہوگئے ہیں جب کہ ان کے کورین پروموٹر نے بھی مزید مدد کرنے سے معذرت کرلی ہے، ان حالات میں محمد وسیم ورلڈ نمبر ون رینکنگ سے محروم ہونے کے قریب پہنچ گئے ہیں، اگر مخصوص مدت کے دوران محمد وسیم نے بڑی فائٹ نہ لڑی تو وہ اپنے عالمی نمبر ون رینکنگ سے محروم ہوجائیں گے۔ورلڈ باکسنگ کونسل کی سلور فلائی ویٹ بیلٹ کے حامل محمد وسیم سے یہ اعزاز بھی چھن جانے کا امکان بڑھ گیا ہے، ان کے کورین پروموٹر اینڈی کم کا کہنا ہے کہ اب میں وسیم کا مزید مالی بوجھ برداشت نہیں کر سکتا۔

دبئی (سپورٹس ڈیسک) آئی سی سی نے سال کی بہترین ون ڈے اور ٹی ٹونٹی ویمنز ٹیموں کا اعلان کر دیا، لیفٹ آرم بھارتی سپنر اکتا بشت واحد کھلاڑی ہیں جو دونوں ٹیموں میں جگہ بنانے میں کامیاب رہیں جبکہ پاکستان کی کوئی بھی کھلاڑی ٹیموں میں جگہ نہ بنا سکی۔ انگلینڈ کی ہیتھر نائٹ کو ون ڈے اور ویسٹ انڈیز کی سٹیفنی ٹیلر کو ٹی ٹونٹی ٹیم کا کپتان مقرر کیا گیا۔ ویمنز ون ڈے ٹیم آف دی ایئر میں ہیتھرنائٹ، ٹامی بیوماﺅنٹ ، میگ لیننگ، متھالی راج، ایمی سیٹرتھویٹ ، علیزے پیری، سیرا ٹیلر، ڈین وان نائیکرک، مریزن کیپ، اکتا بشت اور ایلکس ہارٹلے شامل ہیں۔