کراچی(ویب ڈیسک) انٹرنیشنل کرکٹر رومان رئیس رشتہ ازدواج میں منسلک ہو گئے۔رومان رئیس ان کی اہلیہ کا نام عائشہ ہے، شادی کی تقریب کراچی کے مقامی لان میں منعقد ہوئی، جمعرات کو دعوت ولیمہ کا انعقاد ہوگا، واضح رہے کہ رومان رئیس چیمپئنز ٹرافی کے فاتح پاکستانی اسکواڈ کا  حصہ تھے۔

لاہور(ویب ڈیسک) ورلڈ الیون سے سیریز کیلیے آن لائن ٹکٹ خریدنے والے الجھن میں پڑ گئے اور طریقہ کار پیچیدہ ہونے کی وجہ سے شائقین غیر یقینی صورتحال کا شکار ہیں جب کہ بک کرائے گئے ٹکٹ حاصل کرنے کیلیے طویل مسافت طے کرنا پڑے گی۔پاکستان اور ورلڈ الیون میں میچز کیلیے 500 اور 8 ہزار روپے والے آن لائن ٹکٹوں کی فروخت مکمل ہوگئی تھی، 2500، 4000 اور6000 ہزار کے ٹکٹوں کی بکنگ جاری رہی، آن لائن ٹکٹ خریدنے والے طریقہ کار پیچیدہ ہونے کی وجہ سے الجھن کا شکار ہیں، کمپنی کی طرف سے پی سی بی کے ٹویٹر اکاؤنٹ پر ہدایت کی گئی کہ جن لوگوں نے آن لائن بکنگ  کرا رکھی ہیں، وہ جمعرات اور جمعے کو رائیونڈ روڈ پرگل نشان پارک میں واقع دفتر سے ٹکٹ حاصل کرلیں، دوسرا طریقہ یہ بھی ہے کہ کوریئر کے ذریعے وصول کرنے کیلیے رقم ادا کریں۔ رائیونڈ روڈ مرکزی شہر سے خاصا دور ہونے پر شائقین پریشانی کا شکار نظر آتے ہیں، ان میں سے کئی ایک شکوہ کرتے نظر آئے کہ بکنگ کے مراحل سے گزرنے کے باجود دفتر تک طویل مسافت تکلیف دہ بات ہے۔ لاہور کے 2بڑے شاپنگ مالز میں نقد ادائیگی پر فروخت جاری رہی لیکن بیشتر شائقین 500روپے والا ٹکٹ نایاب ہونے کا شکوہ کرتے نظر آئے، دریں اثنا ٹکٹوں کے حصول کیلیے بینک آف پنجاب کی برانچز کی  فہرست جاری کردی گئی، مین بلیوارڈ گلبرگ، نیو گارڈن ٹاؤن، ماڈل ٹاؤن، صدر بازار، والٹن روڈ، مسلم ٹاؤن، کریم بلاک، فیصل ٹاؤن، شوکت خانم اسپتال، باغبانپورہ، راوی روڈ اور میکلوڈ روڈ کی برانچز سے ٹکٹ حاصل کیے جا سکتے ہیں۔

کولمبو(اے این این ) سری لنکا کرکٹ بورڈ کے موجودہ صدر تھالنگا سماتھی پالا نے جوئے کے کاروبار سے تعلق کا اعتراف کرلیا ہے۔کافی عرصے سے سابق کپتان ارجنا راناٹنگا ان کے بیٹنگ بزنس سے تعلق پر بات کرتے رہے اور وہ خود کو اس سے لاتعلق قرار دیتے تھے، مگر حال ہی میں ان کا رانا ٹنگا کیخلاف ہرجانے کا دعوی مسترد ہوا جس کی مکمل تفصیل بھی سامنے آئی ہے، اس میں دوران جرح سماتھی پالا نے تسلیم کیا کہ شرطوں کا کاروبار کرنے والی کمپنی اسپورٹنگ اسٹار سے ان کا اور ان کی فیملی کا تعلق ہے۔ سری لنکا کی حالیہ شرمناک پرفارمنس کے بعد ویسے بھی سماتھی پالا پر مستعفی ہونے کے لیے دبا ﺅ بہت زیادہ بڑھ چکا ہے۔

لاہور (نیوزایجنسیاں )ورلڈالیون کا دورہ پاکستان، میچ دیکھنے کیلئے صدر، وزیر اعظم اور آرمی چیف مدعو ۔ پی سی بی نے میچ کے لئے اہم ملکی اور غیر ملکی شخصیات کو لاہور مدعو کرلیا ہے جن میں سابق کپتان عمران خان بھی شامل ہیں۔ذرائع کا کہنا ہے کہ آئی سی سی کے چیف ایگزیکٹیو آفیسر ڈیو رچرڈسن اور انگلش بورڈ کے صدر جائیلز کلارک بھی میچ دیکھنے لاہور آرہے ہیں۔پی سی بی نے ٹیسٹ کھیلنے والے کئی ملکوں کے سربراہوں کوبھی مدعو کیا ہے ان میں صدر پاکستان ممنون حسین، وزیر اعظم شاہد خاقان عباسی اور آرمی چیف جنرل قمر جاوید باجوہ شامل ہیں۔ورلڈ الیون دبئی میں2 دن پر یکٹس کرنے کے بعد 10ستمبر کی رات دبئی سے لاہور کے لئے روانہ ہوگی اور گیارہ ستمبر کو صبح 3بجے لاہور پہنچے گی۔صبح گیارہ بجے فاف ڈوپلیسی مقامی ہوٹل میں پریس کانفرنس کریں گے جبکہ شام کو پہلا پریکٹس سیشن ہوگا۔ورلڈ الیون کے دورے کے موقع پر گراﺅنڈ کے ساتھ موجود پارکنگ ایریا میں سی سی ٹی وی کیمرے لگائے جائیں گے اورہاکی اسٹیڈیم میں مشترکہ کنٹرول روم بنایا جائے گا جہاں پرتمام متعلقہ اداروں کے نمائندے کنٹرول روم میں مانیٹرنگ کرینگے۔ واضح رہے کہ ورلڈ الیون میچز میں سیکیورٹی انتظامات کے پیش نظر نشتر اسپورٹس کمپلیکس لاہور کے ایریا میں موجود کاروباری مراکز کو 9 تا 16 ستمبرتک بند کرنے کا فیصلہ کرلیا گیا۔ذرائع کے مطابق آزادی کپ میں ورلڈ الیون کے میچ 12، 13 اور 15ستمبر کو قذافی اسٹیڈیم لاہور میں کھیلے جائیں گے جس میں اہم غیر ملکی کھلاڑی شریک ہوں گے، ورلڈ الیون ٹیم کے میچز کے لیے لاہور اور بالخصوص قذافی اسٹیڈیم کے اطراف سکیورٹی کے غیر معمولی انتظامات کیے جارہے ہیں۔انٹرنیشنل کرکٹ کونسل کی 2 رکنی اسپیشل سیکیورٹی ٹیم نے گزشتہ روز قذافی اسٹیڈیم کا دورہ کیا اور سیکیورٹی انتظامات کاجائزہ لیا۔ پاکستان کرکٹ بورڈ کے حکام نے قذافی اسٹیڈیم میں آئی سی سی کی ٹیم کو ورلڈ الیون کے سیکیورٹی پلان پر بریفنگ دی۔دوسری جانب 9سے 16ستمبر تک قذافی اسٹیڈیم کمپلیکس میں کاروباری مراکز بند کرنے کا فیصلہ کیا گیا ہے جس کا نوٹیفکیشن بھی جاری کردیا گیا۔