اسلام آباد (خصوصی رپورٹ) ایسی بین الاقوامی این جی اوز جنہیں پاکستان میں کام کرنے کی اجازت دینے سے انکار کرد یا گیا ہے ، ان کو عام انتخابات تک پاکستان میں رہنے کی مہلت مل گئی ۔ وزارت داخلہ کے ذرائع کے مطابق ایسی غیر ملکی این جی اوز کی تعداد 23کے قریب ہے جنہیں ان کی مشکوک سرگرمیوں یا اپنے کام سے ہٹ کر دوسرے کاموں میں ملوث ہونے کی وجہ سے پاکستان میں اپنے دفاتر ختم کرکے ملک چھوڑنے کے لئے جنوری کے اختتام کی مہلت دی گئی تھی اب بین الاقوامی دباﺅ پر انہیں اپیل دائر کرنے کے لئے تین ماہ کا وقت دے دیا گیا ہے جبکہ اپیلوں پر فیصلے کے لئے کوئی وقت مقرر نہیں کیا گیا۔ اس طرح اب یہ این جی اوز آئندہ مئی کے بعد تک پاکستان میں ”آپریٹ“ کرسکیں گی، اور اس مدت کے گزرنے کے بعد انہیں واپسی کے لئے مزید ایک ماہ کا وقت دیا جائے گا جس کا مطلب یہ ہے کہ ایسی این جی اوز اب موجودہ حکومت کی مدت ختم ہونے کے بعد تک یہاں رہ سکیں گی اور ان کے مستقبل کا فیصلہ عبوری حکومت یا آئندہ منتخب ہونے والی حکومت کرے گی۔ ایسی بین الاقوامی این جی اوز جنہیں پاکستان میں کام کرنے کا اجازت نامہ دے دیا گیا ہے ان کی تعداد 73 اور وزارت داخلہ میں رجسٹر ڈ ہیں جبکہ بیس کے قریب این جی اوز ایسی ہیں جن کی رجسٹریشن کی درخواستیں زیر التوا ہیں۔
