اسلام آباد (مانیٹرنگ ڈیسک) پاکستان کے بعد لندن میں بھی تلاشی، نااہل نواز شریف اور ان کے خاندان کےلئے ایک اور مشکل کھڑی ہو گئی۔ شریف خاندان کی لندن میں جائیداد برطانوی حکومت کے ریڈار پر آ گئی ہے۔ نئے قانون کے تحت ایون فیلڈ کی جائیداد کو مشتبہ ملکیت کی فہرست میں شامل کیا گیا ہے۔ نجی ٹی وی کے مطابق 5 مشتبہ جائیدادوں کی فہرست ٹرانسپیرنسی انٹرنیشنل نے برطانوی حکومت کو فراہم کی۔ نئے قانون کے مطابق اگر شریف خاندان برطانوی حکومت کو مطمئن نہ کر سکا تو جائیداد قرق کر لی جائے گی۔ لندن میں مشتبہ جائیدادوں کی فہرست میں ایون فیلڈ بھی شامل ہے۔ ٹرانسپیرنسی انٹرنیشنل کے کمیونیکیشن منیجر نے تصدیق کر دی۔ نجی ٹی وی سے گفتگو میں منیجر ڈومینک کواکب نے کہا کہ برطانوی حکومت جائزہ لے گی کہ جائیداد کےلئے رقم کہاں سے آئی اگر آمدنی کرپشن کا نتیجہ ثابت ہوئی تو جائیداد ضبط کی جا سکتی ہے۔
