کراچی (خصوصی رپورٹ)مقتول نقیب اللہ محسود کے والدین کو دیت دے کر منانے کی راﺅ انوار کی کوشش ناکام ہوگئی۔ اعلی سرکاری ذرائع سے خبر سامنے آئی تھی کہ مفرور سابق ایس ایس پی ملیر راﺅ انوار نے نقیب اللہ کے خاندان کو دیت کی پیش کش کرادی ہے ۔ان کا ارادہ ہے کہ سپریم کورٹ میں اگلی سماعت سے پہلے یہ بات سامنے لے آئیں کہ راﺅ انوار اور نقیب اللہ کے والدین میں مصالحت ہوگئی ہے۔ تاہم اس خبر کے آنے کے کچھ ہی دیر بعد نقیب اللہ کے کزن نور رحمان کا بیان سامنے آگیا کہ نقیب اللہ کا پورا خاندان چاہتا ہے کہ نقیب کے قاتل کو سزا ملے ، دیت نہیں لیں گے۔نقیب کے والد کا بھی کہنا ہے کہ ڈیل کی باتیں جھوٹی ہیں، انصاف چاہیے ، نقیب اللہ پیسے سےنہیں انصاف سے زندہ ہوگا ۔ دریںاثنا ماورائے عدالت قتل کئے گئے نقیب اللہ محسود کے خاندان نے سابق ایس ایس پی ملیر راﺅ انوار سے دیت کے لئے معاملات طے ہونے کی اطلاعات کو غلط قرا ر دیا ہے۔ نقیب اللہ کے کزن نوررحمان کا کہنا ہے کہ نقیب اللہ کے قاتل کی سزا چاہتے ہیں دیت نہیں لیں گے۔
