اسلام آباد(ویب ڈیسک) سپریم کورٹ نے میموگیٹ کیس کی سماعت کے دوران سابق پاکستانی سفیر حسین حقانی کے حالیہ بیان کے تناظر میں رجسٹرار آفس سے اس بات کی وضاحت طلب کرلی کہ یہ کیس چار سال بعد کیوں لگایا گیا۔دوسری جانب عدالت عظمیٰ نے سیکریٹری داخلہ، سیکریٹری خارجہ اور فیڈرل انویسٹی گیشن ایجنسی (ایف آئی اے) سے ایک ہفتے میں رپورٹ طلب کرلی۔چیف جسٹس آف پاکستان میاں ثاقب نثار کی سربراہی میں جسٹس عمر عطاءبندیال اور جسٹس اعجاز الاحسن پر مشتمل سپریم کورٹ کے 3 رکنی بنچ نے میموگیٹ کیس کی سماعت کی۔سماعت کے دوران وزارت داخلہ، وزارت خارجہ اور ایف آئی اے کے اعلیٰ حکام پیش ہوئے۔سماعت کے بعد عدالت عظمیٰ نے سیکریٹری داخلہ، سیکریٹری خارجہ اور ایف آئی اے سے ایک ہفتے میں رپورٹ طلب کرتے ہوئے کیس کی سماعت ایک ہفتے کے لیے ملتوی کردی۔
