لاہور (نیااخبار رپورٹ) عابد باکسر کی گرفتاری کے بعد دبئی میں مفرور مزید 170اشتہاریوں کی گرفتاری کا فیصلہ کر لیا گیا۔ ان 170افراد میں سے 72کا تعلق لاہور‘ 12کا تعلق گوجرانوالہ‘ 27کا سیالکوٹ‘ 23کا قصور اور 5کا شیخوپورہ سے ہے۔ اسی طرح پنجاب کے دیگر اضلاع سے مختلف مقدمات میں دبئی میں مفرور ملزمان اس لسٹ میں شامل ہیں۔ ذرائع کے مطابق پنجاب سے اکثر جرائم پیشہ افراد کسی بھی بڑی واردات کے بعد باآسانی دبئی فرار ہو جاتے تھے اور دبئی میں پاکستان کے چار بڑے گروہ موجود ہیں جو ان مفروروں کو پناہ دیتے ہیں اور پھر ان سے پناہ کے عوض مزید ٹارگٹ کلنگ کرائی جاتی ہے۔ ذرائع کے مطابق دبئی‘ اجمان اور شارجہ میں یہ اشتہاری مختلف گروپوں کی صورت میں رہتے ہیں اور پھر ان کو پناہ دینے والے نہ صرف ان سے ٹارگٹ کلنگ اور دیگر کام کراتے ہیں بلکہ دبئی کے ہوٹلوں میں پاکستانی اور بھارتی ڈانسرز کو لانے والے گروپوں سے بھی رقم وصول کی جاتی ہے۔ پاکستانی گروپوں سے تو اس طرح رقم وصول کی جاتی ہے کہ اگر کوئی گروپ پیسے دینے سے انکار کرے تو پاکستان کے اندر ان کے گھروں پر فائرنگ یا ان کے قریبی عزیزوں کا اغوا کر لیا جاتا ہے۔ ذرائع کا کہنا ہے کہ پولیس کا بھی ایک بڑا بااثر گروہ ان کے ساتھ رابطوں میں ہوتا ہے۔ اشتہاریوں کو پناہ دینے والے بااثر مافیا پولیس کو خوش کرنے کیلئے اور اپنے تعلقات کو بہتر کرنے کیلئے کئی مرتبہ ایسے افراد کو بھی پولیس کے ہاتھوں گرفتار کروا دیتے ہیں جن کیلئے ان پر زیادہ پریشر ہوتا ہے۔ ذرائع کا کہنا ہے کہ دبئی میں موجود گروپوں کے خلاف سخت کارروائی کیلئے سب سے پہلے پولیس کے اندر ان کے حمایتیوں کو کھڈے لائن لگایا گیا ہے اور اس کے بعد باقاعدہ ٹیمیں تشکیل دی گئی ہیں جن کا ٹارگٹ صرف دبئی سے پکڑ کر لانا ہے۔ ذرائع کے مطابق اب تک 23افراد کو وہاں سے لایا جا چکا ہے اور مزید کیلئے کام جاری ہے۔ ان کو گرفتار کرنے کے حوالے سے باقاعدہ پولس کا ایک گروپ اور ان کے مخبر دبئی میں موجود ہیں۔ ذرائع کا کہنا ہے کہ عابد باکسر‘ باسط چیمہ اور دیگر افراد کی گرفتاری کے بعد دبئی میں موجود انڈر ورلڈ سے تعلق رکھنے والے چاروں گروپ اور اشتہاری انڈر گراﺅنڈ ہو گئے ہیں اور اکثر نے اپنے ٹھکانوں کے ساتھ ساتھ موبائل نمبرز بھی بدل لئے ہیں۔ ذرائع کا کہنا ہے کہ عابد باکسر کو پاکستان لانے کیلئے جانے والی ٹیم کو سخت دشواریوں کا سامنا ہے۔ لاہور پولیس کے ایک اعلیٰ افسر کے مطابق 5سال قبل بھی عابد باکسر کو گرفتار کیا گیا تھا مگر دبئی کے قوانین اور عابد باکسرز کے تگڑے وکیلوں کی طرف سے وہاں کی عدالتوں سے ملنے والے حکم امتناعی کی بنا پر اسے پاکستان نہیں لایا جا سکا۔ ذرائع کا کہنا ہے کہ اب بھی عابد باکسر کو پاکستان لانے سے بچانے کیلئے بااثر مافیا متحرک ہو چکا ہے۔
گرفتاری کا فیصلہ
