اسلام آباد (مانیٹرنگ ڈیسک) پاکستان میں چین کے سفیر یاوژینگ نے کہا ہے کہ بلوچستان میں متحرک بلوچ مزاحمتی تحریک اب نہ ہی پاکستان، نہ چین اور نہ ہی سی پیک کے لئے کوئی خطرہ ہے اور پاکستان میں پہلے کی نسبت امن و امان کی صورت حال کافی بہتر ہوئی ہے، میں سو فیصد پر امید ہوں کہ گوادر بندرگاہ ایک بین الاقوامی تجارتی مرکز بننے کے قریب ہے۔ بی بی سی کو خصوصی انٹرویو دیتے ہوئے پاکستان میں تعینات چینی سفیر یاژینگ کا کہنا تھا کہ چینی سفیر کا کہنا تھا کہ سی پیک منصوبے کے لیے پاکستان میں لگ بھگ 10 ہزار چینی باشندے کام کر رہے ہیں اور ان کے تحفظ کے لیے وہ پاکستان کے اقدامات سے مطمئن ہیں۔ سی پیک منصوبے میں 60 ہزار کے قریب پاکستانی بھی کام کر رہے ہیں۔ چینی سفیر کا مزید کہنا تھا کہ سی پیک اب پہلے مرحلے میں ہے، جس میں اب تک 21 منصوبوں پر کام جاری ہے جبکہ لگ بھگ 20 مزید منصوبے پائپ لائن میں ہیں، سی پیک ہمسایہ ملک افغانستان سمیت خطے کے دوسرے ممالک تک پھیلایا جائے گا۔

ملتان (رپورٹنگ ٹیم) زکریا یونیورسٹی کے موجودہ وائس چانسلر کو سالہا سال سے چلنے والے گھناﺅنے کھیل‘ اساتذہ کی بلیک میلنگ‘ ایڈمنسٹریشن کی کرپشن‘ اقرباءپروری اور تباہ حال ماحول ورثے میں ملا۔ انہوں نے نالائق اور کرپٹ سٹاف میں سے بہت سے تبدیل کئے مگر اساتذہ نے اپنی روش نہ بدلی اور یونیورسٹی میں سب سے زیادہ بگاڑ اعلیٰ سطحی سیاسی مداخلت کی وجہ سے پیدا ہوا۔ وائس چانسلر زکریا یونیورسٹی نے جس پر ہاتھ ڈالا اس کے پیچھے کوئی نہ کوئی سیاسی وڈیرہ اپنے تمام تر مفادات کے ساتھ کھڑا نظر آیا حتیٰ کہ یونیورسٹی میں گزشتہ ڈیڑھ سال سے 400سے زائد لوئر سٹاف کی اسامیاں محض انتخابی سیاست کی وجہ سے خالی پڑی ہیں اور اساتذہ کو مکمل سیاسی پشت پناہی حاصل ہے۔ توجہ طلب امر یہ ہے کہ ایس ایچ او تھانہ الپہ رانا ظہیر بابر جوکہ رکن صوبائی اسمبلی رانا محمودالحسن کے بہنوئی ہونے کے ناطے اپنی مرضی کی پوسٹنگ لیتے ہیں۔ پولیس تھانہ الپہ کے حوالے سے ملزم علی رضا قریشی کو ایک سٹوڈنٹ لیڈر اور ایک حساس ادارے کے اہلکار نے ملتان نانگا چوک سے ٹریکنگ کرکے جس وقت گرفتار کیا اس وقت اس کے پاس دو موبائل فون اور ایک ولایتی پسٹل تھا جسے وہ ہر وقت اپنے پاس رکھتا تھا۔ پولیس تھانہ الپہ کے ایس ایچ او رانا ظہیر بابر نے متاثرہ طالبہ مرجان اور اس کے والد کے سامنے دو گھنٹے تک موبائل کی تلاشی لی اور طالبہ کے مطابق وہ فلمیں ضائع کرتا رہا جبکہ دوسرا موبائل اس نے ڈی کوڈ کرنے اس لئے بھیجا کہ گھبراہٹ اور پریشانی میں ملزم علی رضا قریشی کوشش کے باوجود اس کا کوڈ یاد نہ رکھ سکا اور یہی وجہ تھی کہ چند غیراخلاقی ویڈیو کلپس روزنامہ خبریں کو بھی مل گئے جو صوبائی وزیر قانون رانا ثناءاللہ کے ذ ریعے سی پی او ملتان سرفراز احمد فلکی کو ارسال کئے گئے۔ روزنامہ خبریں کو مزید معلومات ملی ہیں کہ شعبہ کیمسٹری کے ایک پروفیسر پر بھی طالبہ کو بلیک میل کرنے کا الزام تھا تاہم وہ طالبہ شدید دباﺅ میں تعلیم ہی چھوڑ کر چلی گئی۔ یہ بھی معلوم ہوا ہے کہ ڈی وی ایم کی ایک طالبہ کو ایک پروفیسر ڈاکٹر نے ایک طالب علم ادریس کے ذریعے بلیک میل کیا کیونکہ مذکورہ طالبہ کا ریسرچ پراجیکٹ مذکورہ پروفیسر ڈاکٹر کے پاس تھا۔ مذکورہ پروفیسر ڈاکٹر نے دھمکی دی کہ اگر مذکورہ طالبہ نے ان سے علیحدگی میں ملاقات نہ کی تو وہ اسے فیل کردیں گے مگر طالبہ ڈٹی رہی اور اس نے اپنا سمسٹر ہی ڈراپ کروالیا اور اگلے سمسٹر میں اپنے تعلیمی کیریئر کے 6ماہ ضائع کرکے اگلے سمسٹر میں داخلہ لے لیا تو قواعد کے مطابق اس کے ریسرچ آفیسر بھی تبدیل ہوگئے اور مذکورہ پروفیسر ڈاکٹر کو منہ کی کھانا پڑی اور اس طرح لڑکی ڈگری بھی لے گئی اور اپنی آبرو بھی بچاگئی۔ اسی طرح کیمسٹری ڈیپارٹمنٹ ہی کی ایک طالبہ کو کلاس کا سی آر اور یونیورسٹی کا ایک انتظامی آفیسر کسی رانا صاحب کے ڈیرے پر لے گیا جس پر شور مچا مگر بات آئی گئی ہوگئی طلبہ کے ایک وفد نے روزنامہ خبریں کے دفتر آکر بتایا کہ سمسٹر سسٹم میں اساتذہ بہت مضبوط ہیں اور بلیک میل کرتے ہیں۔ عدالتیں بھی مدد نہیں کرتیں کیونکہ سسٹم 100فیصد پروفیسر کو سپورٹ کرتا ہے۔ ایک طالب علم نے کہا کہ وی سی صاحب اگر ریکارڈ چیک کریں کہ کتنی طالبات کس مضمون میں ایک سے 3نمبروں سے فیل ہوتی ہیں تو انہیں مزید کسی بھی تحقیق کی ضرورت نہ رہے گی۔ لڑکیوں کا پردہ بھی رہ جائے گا اور پروفیسر بھی بے نقاب ہوجائے گا۔ مذکورہ طالب علم نے بتایا کہ غریب گھرانوں کی لڑکیاں زیادہ بلیک میل ہوتے ہیں کہ انہیں شدید احساس ہوتا ہے کہ ان کے والدین کس مشکل سے ان کی فیس اور ہاسٹل کے اخراجات دے رہے ہیں اور اگر وہ فیل ہوگئیں تو مزید 6ماہ کے اخراجات پڑجائیں گے پھر یہ گارنٹی بھی نہیں کہ وہ پاس بھی ہوں گی یا دوبارہ فیل کردی جائیں گی لہٰذا نہ چاہتے ہوئے بھی بعض طالبات یہ کڑوا گھونٹ پی لیتی ہیں۔ اس طالب علم نے بتایا کہ زکریا یونیورسٹی کے شعبہ ابلاغیات کے ایک پروفیسر جو ان دنوں بیرون ملک ہیں‘ نے اس طرح ایک طالبہ کو بلیک میل کیا جس نے ایک اہم ادارے کے اسد نامی آفیسر کے ذریعے اپنی جان خلاصی کرائی کیونکہ اسد اور مذکورہ طالبہ کے والد کی گہری دوستی تھی اور طالبہ نے فوری طورپر فون کرکے اپنے والدکو آگاہ کردیا تھا۔ اسد نامی آفیسر کی مداخلت پر مذکورہ پروفیسر طالبہ کو فیل بھی نہ کرسکا اور وہ ڈگری لے کر چلی گئی۔ بتایا گیا ہے کہ وائس چانسلر نے یونیورسٹی انتظامیہ سے ایسی تمام درخواستیں اپنے دفتر میں منگوائی ہیں جس میں ہراسمنٹ کی شکایات تھیں۔ ذرائع کے مطابق متعدد درخواستوں کا متن تبدیل ہے اور بعض سرے سے غائب ہیں تاہم وائس چانسلر کی طرف سے ہدایات دی گئی ہیں کہ اگر کوئی طالبہ یونیورسٹی سے جابھی چکی ہے تو بھی ایک ٹیم جاکر اس سے مل کر معلومات لے اور جو بھی ملوث ہو اسے سزا دی جائے۔
متن تبدیل

اسلام آباد (آن لائن) چیف جسٹس پاکستان میاں ثاقب نثار نے کہا ہے کہ عطاءالحق قاسمی کی تقرری غیر قانونی ثابت ہوئی تو دو سال میں انکو دیئے گئے ستائیس کروڑ روپے نواز شریف سے وصول کیے جائیں گے ، جبکہ عدالت نے عطاءالحق قاسمی کی تقرری پر سابق وزیر اطلاعات پرویز رشید ، وزیراعظم کے پرنسپل سیکرٹری فواد حسن فواد ، سابق سیکرٹری انفارمیشن صباءمحسن اور عطاءالحق قاسمی سمیت دیگر کو نوٹس جاری کردیئے ہیں ،عدالت نے حکم دیا ہے کہ عطاءالحق قاسمی کی تقرری غیر قانونی ثابت ہوئی تو انکو دی گئی رقم تقرری کے ذمہ داران سے وصول کی جائے گی ، چیف جسٹس کا کہنا تھا کہ دو سال میں عطاالحق کو ستائیس کروڑ روپے دیدیا گئے پھر کہتے ہیں جوڈیشل ایکٹوازم پہڑا ہے اور اسے بند کردیں ، کیوں نہ نواز شریف کو عطاالحق قاسمی کی تقرری کرنے پر نوٹس جاری کیا جائے ، جمعہ کے روز ایم ڈی پی ٹی وی کی عدم تعیناتی اور سابق چیئرمین پی ٹی وی عطاءالحق قاسمی کی تعیناتی سے متعلق ازخود نوٹس کی سماعت چیف جسٹس میاں ثاقب نثار کی سربراہی میں دورکنی بنچ نے کی ،کیس کی سماعت شروع ہوئی توایڈیشنل اٹارنی جنرل رانا وقار اور سیکرٹری وزارت اطلاعات احمد نواز سکھیرا عدالت کے روبرو پیش ہوئے ، جسٹس ثاقب نثار نے کہا کہ سیکرٹری اطلاعات کو مخاطب کرتے ہوئے کہاکہ آپ کو عدالت میں دیکھ کر خوشی ہوئی، ہے ، عدالت میں آپ کی آمد کو کارآمد بنانے کی کوشش کریں گے ، امید ہے آپ کو کوئی مسئلہ نہیں ہوگا، ہر عہدے کے اپنے کچھ تقاضے ہیں ،یہ بتائیں سرکاری ٹی وی کے ایم ڈی کی آسامی کیوں خالی ہے؟ سرکاری وکیل نے بتایاکہ 26 فروری دوہزار سولہ سے یہ آسامی خالی ہے، 23 ستمبر دوہزار سترہ کو اشتہار دیا گیا ، چیف جسٹس نے استفسار کیاکہ ایم ڈی لگانے کی سمری ایک سال سات ماہ تک کیوں نہیں بھیجی گئی، اس کا ذمہ دار کون ہے؟ سیکرٹری اطلاعات نے کہا کہ کچھ کہنا چاہوں گا ، چیف جسٹس نے کہا کہ ہچکچاہٹ تو ہوگی کیونکہ کچھ چیزیں ایسی ہیں جو فائل کور کے اندر ہی ہوتی ہیں مگر عدالت آپ سے درخواست کرے گی کہ کھل کر بتائیں، عدالت کی درخواست بھی حکم کا درجہ رکھتی ہے ،احمد نواز سکھیرا نے بتایا کہ اس عرصے کے دوران سیکرٹری اطلاعات کے پاس سرکاری ٹی وی کے ایم ڈی کا اضافی چارج بھی تھا، اس کے بعد عطاءالحق قاسمی کو سرکاری ٹی وی کا چیئرمین لگایا گیا جنہوں نے ایم ڈی کا اضافی چارج لیا جو میرے خیال میں غیرمناسب تھا ، چیف جسٹس نے کہا کہ جب ایک چیز قانون کے مطابق نہ تھی تو اسے غیر قانونی کیوں نہیں کہتے؟ ہم عطاءالحق قاسمی کو نوٹس جاری کرکے تنخواہ ریکور کرلیں گے ، چیف جسٹس نے کہا کہ قواعد کے مطابق تو چیئرمین بورڈ اعزازی عہدہ ہے یہ تو کوئی بھی بن سکتا ہے ،تنخواہ کیا ہے؟ سرکاری وکیل نے بتایاکہ چیئرمین بورڈ اور دیگر ارکان کو ہر اجلاس میں شرکت کے پانچ ہزار ملتے ہیں ، عطاءالحق قاسمی کو 23 دسمبر دوہزار سولہ کو لگایا گیا اور 18دسمبر دوہزار سترہ کو عہدہ چھوڑا، پندرہ لاکھ روپے ٹیکس سمیت تنخواہ تھی عطاءالحق کے دور میں کل ستائیس کروڑ روپے خرچ کیے ،ستائیس کروڑ کا سنتے ہی چیف جسٹس کرسی سے چند انچ اوپر اٹھے اور ریمارکس دیے کہ پھر کہتے ہیں کہ یہ جوڈیشل ایکٹو ازم پہڑا ہے اور اسے بند کریں، رات کو ٹی وی پر کہتے ہیں کہ جوڈیشل ایکٹو ازم ہے ،عدالت کو بتایا گیا کہ ستائیس کروڑ صر ف تنخواہ کی مد میں نہیں لیے بلکہ ان کے دور میں یہ اخراجات ان کے ذریعے کیے گئے ، چیف جسٹس نے کہاکہ اخراجات ہوں تب بھی، اگر اس کا تقرر ہی قانونی نہیں ہے، دوسال میں ستائیس کروڑ اس کو دے دیے، یہ غریب ملک ہے، غریب لوگوں کے ٹیکس کا پیسہ ہے، ایک کروڑ روپے ہر ماہ اس شخص پر خرچ کیا گیا، کیوں نہ سابق وزیراعظم نوازشریف کو نوٹس بھیجیں کہ کیوں تقرر کیا، اتنا پیسہ کیوں دیا؟ کیوں نہ یہ رقم سابق وزیراعظم سے واپس لی جائے؟ سیکرٹری اطلاعات نے کہا کہ وہ اس پر تبصرہ نہیں کر سکتے، مگر یہ سب درست نہیں ہوا۔ چیف جسٹس نے کہا کہ سکھیرا صاحب، یہ آپ کا قومی فریضہ ہے، اپنے آپ سے باہر نکلیں ،ہم اٹارنی جنرل کو بلاتے ہیں، بتایا جائے کس کس کو نوٹس کریں، قاسمی کو ابھی نوٹس کرتے ہیں، کیوں نہ سابق وزیراعظم کو بھی نوٹس کریں کہ تقرر کی سمری پر دستخط انہوں نے کیے ،سرکاری وکیل رانا وقار نے کہا کہ صرف اٹارنی جنرل اور قاسمی صاحب کو نوٹس کرکے سن لیں۔ چیف جسٹس نے کہا کہ اس وقت وزیر اطلاعات کون تھا؟ قاسمی صاحب کی اہلیت کیا ہے؟۔ احمد نواز سکھیرا نے بتایاکہ وزیر پرویز رشید تھے، قاسمی صاحب لکھاری، کالم نگار اور ڈرامہ نویس ہیں ، چیف جسٹس نے کہا کہ ی مجھے تو یہ سب بھی ڈرامہ ہی لگتا ہے، جسٹس اعجازالاحسن نے کہا کہ ان دستاویزات میں کچھ اشتہارات کا بھی ذکر ہے، یہ پیسے کس مد میں ہیں؟ سیکرٹری اطلاعات نے بتایاکہ قاسمی صاحب پروگرام بھی کرتے تھے جس کا اشتہار مختلف اخبارات میں پی ٹی وی کے ساتھ معاہدے کے تحت شائع ہوتا رہا اس کی رقم شامل ہے اس پر چیف جسٹس نے کہا کہ میں نے بھی وہ پروگرام دیکھا تھا جس میں بابے بیٹھتے تھے ،اس کے بعد عدالت نے حکم نامہ لکھوایا کہ سیکرٹری اطلاعات عدالت کو عطاءالحق قاسمی کے تقرر پر مطمئن نہ کرسکے اس لیے قاسمی کا تقرر کرنے کی سمری بھیجنے والی افسر صبا محسن رضا، وزیر پرویز رشید، سیکرٹری اسٹیبلشمنٹ ندیم حسن، وزیراعظم کے پرنسپل سیکرٹری فواد حسن فواد اور عطاءالحق قاسمی کو نوٹس جاری کیا جاتا ہے کہ وہ عدالت میں اپنی پوزیشن واضح کریں کہ کیوں نہ وہ غیر قانونی طور پر خرچ کی گئی یہ رقم حکومت کے خزانے میں واپس جمع کرائیں ،اس کے بعد چیف جسٹس نے سیکرٹری اطلاعات احمد نواز سکھیرا کو مخاطب کر کے کہا کہ آپ کو ہر سماعت پر عدالت آنے کی زحمت کرنا ہوگی تاکہ ہماری معاونت کرسکیں، اللہ کرے آپ کو اسی عہدے پر لگا رہنے دیں، اگر نہ بھی رہنے دیا تو آپ کو معاونت کیلئے بلالیا کروں گا ، بعد ازاں عدالت نے فریقین نے جواب طلب کرتے ہوئے کیس کی سماعت بارہ فروری تک ملتوی کردی۔