دبئی(آئی این پی)پاکستان کرکٹ ٹیم کے سابق کپتان اور نامور کمنٹیٹر رمیز راجہ نے اپنے لمبے بالوں کے راز سے پردہ اٹھاتے ہوئے کہا کہ بال کم ہورہے ہیں اس لئے لمبے رکھ رہا ہوں۔دبئی کرکٹ سٹیڈیم میں میڈیا سے گفتگو کرتے ہوئے رمیز راجہ سے جب سوال کیا گیا کہ آپ کی لک میں تبدیلی آئی ہے اور آپ کا وزن بھی کم ہوا ہے جبکہ آپ لمبے بال بھی رکھ لئے ہیں اس کی کیا وجہ ہے کا جواب دیتے ہوئے سابق کپتان نے کہا کہ پتہ نہیں دیکھیں یہ کتنی دیر رہتے ہیں ، بال کم ہورہے تھے اس لئے لمبے رکھ رہا ہوں۔کوئٹہ گلیڈی ایٹرز کی فتح اور پی ایس ایل کے بارے بات کرتے ہوئے رمیز راجہ نے کہا کہ توقعات بنی ہوئی ہیں اور یہ ایک برانڈ بن چکا ہے،پوری دنیا میں یہ ایونٹ اپنی پہچان بنا چکا ہے۔انہوں نے مزید کہا کہ میں سمجھتا ہوں ایک اور نئی ٹیم آنے سے ایک اور کلر کا اضافہ ہوا ہے،اب اس لیگ کو پاکستان جانا ہے،ٹکڑوں میں جائے جیسے مرضی جائے،مگر اگلے دو سالوں میں اس کو وہاں پر لانچ ہونا ہے،کیونکہ پاکستانی کرکٹ کیلئے ترسے ہوئے ہیں ۔

جنیوا (بی این پی )مونٹی کارلو جا کر لوریس اسپورٹس ایوارڈز کی تقریب میں شرکت کریں گے ٹینس کے سب سے معمرعالمی نمبر ایک ٹینس اسٹار راجر فیڈرر آئندہ ہفتے دبئی چیمپئن شپس میں حصہ لینے سے گریزاں ہیں کیونکہ وہ اسی دوران مونٹی کارلو جا کر لوریس اسپورٹس ایوارڈز کی تقریب میں شرکت کریں گے۔ دبئی چیمپئن شپس کے ڈائریکٹر صالح تہلک نے بھی تصدیق کردی ہے کہ راجر فیڈرر ایونٹ میں شریک نہیں ہوں گے تاہم وہ دو ہزارانیس میں واپس آئے ہیں۔ راجر فیڈررایک مرتبہ پھر موناکو میں نامزدگی کے بعد لوریس ایوارڈز کی تقریب میں شرکت کیلئے پرجوش ہیں اور انہوں نے دیگر نامزد پلیئرز کو ٹوئٹر پر گڈلک بھی کہا ہے۔

دبئی (آئی این پی) پاکستانی کرکٹ ٹیم کے اوپنر فخر زمان یہ ماننے کے لیے تیار نہیں کہ اپنی بیٹنگ سے میچ ختم کرنا ان کی ذمہ داری ہے ۔ مبصرین کا یہ خیال ہے کہ فخر زمان باصلاحیت بیٹسمین ضرور ہیں لیکن وہ ٹیم کو جیت سے ہمکنار کرنے سے قبل ہی اپنی وکٹ گنوا دیتے ہیں۔فخرزمان پاکستان سپر لیگ میں لاہور قلندر کی نمائندگی کر رہے ہیں۔انھوں نے پی ایس ایل کے پہلے میچ میں ملتان سلطانز کے خلاف جارحانہ بیٹنگ کرتے ہوئے 49 رنز بنائے تھے جس میں ایک چوکا اور چار چھکے شامل تھے لیکن ان کے آٹ ہوتے ہی لاہور قلندر کی ٹیم صرف چار رنز پر سات وکٹیں گنوا کر میچ ہار گئی تھی۔فخرزمان یہ ضرور مانتے ہیں کہ جتنے بھی بڑے کھلاڑی بنتے ہیں وہ میچ کو ختم کرتے ہیں اور وہ بھی یہی کوشش کر رہے ہیں کہ اپنی اننگز کو طول دیں لیکن ساتھ ہی وہ یہ بات بھی واضح کر دیتے ہیں کہ اوپنرز کا کام اچھا اسٹارٹ دینا ہوتا ہے میچ فنش کرنا مڈل آرڈر بیٹسمینوں کی ذمہ داری ہوتی ہے۔

دبئی(آئی این پی) پاکستان سپر لیگ (پی ایس ایل)میں کوئٹہ گلیڈی ایٹرز کی نمائندگی کرنےوالے قومی کرکٹر محمد نواز کی اہلیہ کی سوشل میڈیا پر ایسی تصویر شیئر کردی جسے دیکھ کر مداح آنکھیں جھپکنا ہی بھول گئے ہیں اور دونوں کیلئے نیک خواہشات کا اظہار کرنے میں مصروف ہیں۔سماجی رابطوں کی ویب سائٹ ٹوئٹر پر شیئر کرتے ہوئے کرکٹر محمد نواز کی اہلیہ نے لکھا کہ کچھ راتوں پہلے دونوں ایک ڈنر کے موقع پر،تاہم دونوں کی تصویر سوشل میڈیا پر آتے ہی نا صرف وائرل ہوگئی بلکہ لوگوں نے دونوں کو نیک خواہشات کا ظہار کیا۔ محمد نواز کی کارکردگی کے چرچے تو پہلے ہی سوشل میڈیا پر ہو رہے تھے لیکن جیسے ہی یہ تصویر سامنے آنے کی دیر تھی کہ خوبصورت پیغامات اور دعاو ں کے ڈھیر لگ گئے۔

دبئی(آن لائن) کوئٹہ گلیڈی ایٹرز کے کپتان سرفراز احمد نے کہا ہے کہ اگر ہماری ٹیم پی ایس ایل تھری کے فائنل میں پہنچی تو ہماری ٹیم کے غیر ملکی کھلاڑی پاکستان آنے کے لیے تیار ہوجائیں گے۔ اپنے دیے گئے انٹرویو میں سرفراز احمد نے کہا کہ امید ہے ٹیم ایونٹ کے فائنل تک رسائی حاصل کرے گی اور اس بار فائنل میں پہنچے تو ہارنے کی روایت کو توڑیں گے اور فتح سے ہم کنار ہوں گے۔ انہوں نے کہا کہ اگر کوئٹہ گلیڈی ایٹرز فائنل میں جگہ بناتی ہے تو غیر ملکی کھلاڑی پاکستان آنے کے لیے رضامند ہوجائیں گے اس سلسلے میں کھلاڑیوں سے بات چیت جاری ہے۔پی ایس ایل تھری کے افتتاحی میچ میں شکست پر کپتان سرفراز احمد کا کہنا تھا کہ ایونٹ کا آغاز اچھا نہیں رہا، بولنگ اچھی رہی لیکن بیٹنگ میں بہت غلطیاں کیں اور اہم مواقع پر وکٹیں گنوائیں جس کی وجہ ڈاٹ بالز تھیں جس سے بلے بازوں پر دباو¿ بڑھا تاہم اگلے میچز میں غلطیوں پر قابو پائیں گے۔

لاہور(سپورٹس ڈیسک)پشاور زلمی کے فاسٹ بولر عمید آصف کو پاکستان س±پر لیگ کی ڈرافٹنگ میں شامل نہ ہونے کا بہت دکھ تھا۔ستم ظریفی یہ کہ جب پشاور زلمی نے اپنا 21واں کھلاڑی منتخب کیا تو اس وقت بھی عمید آصف پر نظر نہ پڑی جس پر دلبرداشتہ ہو کر انہوں نے ٹویٹ بھی کیا لیکن حسن علی کے ان فٹ ہونے پر وہ پاکستان سپر لیگ کا حصہ بن ہی گئے۔’وہ ٹوئنٹ دراصل میری فرسٹریشن تھی لیکن میں نے ہمت نہیں ہاری اور محنت جاری رکھی جس کا صلہ مجھے مل گیا۔‘عمید آصف کا پاکستان سپر لیگ میں آغاز بہت ہی متاثر کن رہا ہے۔ اپنے پہلے میچ میں انہوں نے اسلام آباد یونائیٹڈ کے خلاف چار وکٹیں حاصل کیں اور مین آف دی میچ قرار پائے۔عمید آصف نے گذشتہ سال قومی ٹی ٹوئنٹی ٹورنامنٹ میں عمدہ بولنگ کرتے ہوئے 14 وکٹیں حاصل کی تھیں جو اس ٹورنامنٹ میں کسی بھی بولر کی سب سے زیادہ وکٹیں تھیں۔عمید آصف کی عمر 33 سال ہے لیکن وہ اس بات سے اتفاق نہیں رکھتے کہ انہیں دیر سے موقع ملا ہے۔’عمر دراصل صرف ہندسے ہوتے ہیں۔ میں سیکھ رہا تھا اور جب کچھ سیکھ چکا تو پھر اللہ نے مجھے موقع دیا۔ کسی بھی کرکٹر کی طرح میری بھی یہی خواہش ہے کہ اپنے ملک کی نمائندگی کروں اور کچھ ایسی پرفارمنس دے دوں جس سے لوگ مجھے یاد رکھیں۔عمید آصف بھی ان کرکٹرز میں شامل ہیں جن کی تعلیم پر کرکٹ کا شوق حاوی ہو گیا۔’والدین نے مجھے سیالکوٹ سے لاہور اس لیے بھیجا کہ یہ کچھ پڑھ لکھ جائے گا لیکن چونکہ کرکٹ کا بہت شوق تھا اس لیے میں نے کلب کرکٹ شروع کر دی جو مجھے ڈومیسٹک کرکٹ میں لے آئی۔ میرے چچا طاہر مغل بھی سیالکوٹ کی طرف سے کھیل چکے ہیں، انہوں نے میری بہت حوصلہ افزائی کی۔‘عمید آصف کے لیے وہ لمحات نہ بھولنے والے تھے جب سال 2014 میں ڈوپنگ کی وجہ سے پاکستان کرکٹ بورڈ نے ان پر ایک سالہ پابندی عائد کر دی تھی۔’یقیناً وہ میرے لیے بہت بڑا دھچکہ تھا۔ ایمرجنسی علاج کے طور پر لی گئی ایک دوا کی وجہ سے مجھے اس صورتحال سے گزرنا پڑا تھا لیکن دل نہیں چھوڑا تھا اور پہلے سے زیادہ ہمت کے ساتھ واپس آیا۔‘عمید آصف نے پاکستان سپر لیگ کے پہلے میچ میں غیرمعمولی کارکردگی ضرور دکھائی ہے لیکن چونکہ وہ حسن علی کی جگہ ٹیم میں شامل ہوئے ہیں لہذٰا حسن علی کے فٹ ہو کر پشاور زلمی کی ٹیم میں واپس آنے کی صورت میں عمید آصف ہی کو جگہ خالی کرنی ہو گی۔