لاہور (ا ین این آئی) قومی احتساب بیورو کے چیئرمین جسٹس (ر) جاوید اقبال نے وفاقی وزیر خارجہ خواجہ آصف کے خلاف مبینہ طور پر منی لانڈرنگ کی شکایت کی جانچ پڑتال کا حکم دیدیا ، خواجہ آصف کا موقف معلوم کرنے کے بعد قانون کے مطابق حتمی کارروائی کا فیصلہ کیا جائے گا ۔ ترجمان نیب کے مطابق چیئرمین نیب جسٹس (ر) جاوید اقبال نے وزیر خارجہ خواجہ آصف کے خلاف مبینہ طور پر منی لانڈرنگ کی شکایت کی جانچ پڑتال کا حکم دیا ہے ۔ نیب اس بات کو واضح کرنا چاہتا ہے کہ شکایات کی جانچ پڑتال مبینہ الزامات کی بنیاد پر شروع کی گئی ہے جو کہ حتمی نہیں ۔ ترجمان کے مطابق نیب قانون کے مطابق وفاقی وزیر خارجہ خواجہ آصف سے ان کا موقف معلوم کرے گا جس کے بعد ہی قانون کے مطابق حتمی کارروائی کا فیصلہ کیا جائے گا ۔جبکہ قومی احتساب بیورو(نیب) کے چیئرمین جسٹس (ر)جاوید اقبال نے نیشنل ہائی وے اتھارٹی کی طرف سے ملتان ۔ سکھر موٹروے کے ٹھیکہ میں مبینہ طو رپر اربوں روپے کی بے ضابطگیوں اور مبینہ بدعنوانی کی شکایت کی جانچ پڑتال ‘ گوجرانوالا سے پنجاب اسمبلی کے رکن اسمبلی سہیل ظفر کے خلاف مبینہ طور پر آمدن سے زائد اثاثوں کی شکایت کی جانچ پڑتال اور سابق وفاقی وزیر اسحاق ڈار اور عثمان سیف اللہ خان ممبر پالیسی بورڈ ایس ای سی پی(SECP) کے خلاف مبینہ طور پر ایس ای سی پی میں غیر قانونی تقرریوں کی بنیاد پر شکایت کی جانچ پڑتال کا حکم دیا ہے۔ نیب اس بات کو واضح کرنا چاہتا ہے کہ تمام شکایات کی جانچ پڑتال مبینہ الزامات کی بنیاد پر شروع کی گئی ہیں جو کہ حتمی نہیں۔ نیب تمام متعلقہ افراد سے قانون کے مطابق ان کا موقف معلوم کرے گا اور اس کے بعد ہی قانون کے مطابق حتمی کارروائی عمل میں لائی جائے گی۔
