اسلام آباد (ویب ڈیسک ) عوامی مسلم لیگ کے سربراہ شیخ رشید احمد اہل یا نا اہل، سپریم کورٹ اپنا فیصلہ آج سنائے گی۔ تین رکنی بینچ نے لیگی رہنما شکیل اعوان کی درخواست پر فیصلہ 20 مارچ کو محفوظ کیا تھا۔تفصیلات کے مطابق شیخ رشید کی نا اہلی کے حوالے سے محفوظ شدہ فیصلہ سپریم کورٹ کا تین رکنی بینچ آج (بدھ کو) سنائے گا۔ شیخ رشید کی نااہلی کے خلاف درخواست ن لیگی رہنما شکیل اعوان نے دائر کی تھی جس میں ان پر 2013 کے انتخابات کے کاغذات نامزدگی میں اثاثے چھپانے کا الزام عائد کیا گیا تھا۔درخواست گزار نے موقف اپنایا تھا کہ شیخ رشید نے اپنی 6 کروڑ روپے کی پراپرٹی کی قیمت ایک کروڑ روپیہ بتائی جبکہ زرعی اراضی بھی کاغذات نامزدگی میں کم ظاہر کی تھی۔شیخ رشید کی نا اہلی کے کیس کی سماعت جسٹس شیخ عظمت سعید کی سربراہی میں سپریم کورٹ کے تین رکنی بینچ نے کی، بینچ میں جسٹس قاضی فائز عیسیٰ اور جسٹس سجاد علی شاہ بھی شامل ہیں۔ تین رکنی بینچ نے فیصلہ 20 مارچ کو محفوظ کیا تھا۔یاد رہے مسلم لیگ (ن) کے رہنما شکیل اعوان نے شیخ رشید نااہلی کیس کے جلد فیصلے کیلئے سپریم کورٹ میں درخواست دائرکی تھی جس میں موقف اختیار کیا گیا تھا کہ دو ماہ سے محفوظ فیصلہ نہیں سنایا جا رہا۔
