لیڈز (اے پی پی) آئی سی سی ویمن کرکٹ چیمپئن شپ نے انگلینڈ نے نیوزی لینڈ کو پہلے ون ڈے انٹرنیشنل میچ میں یکطرفہ مقابلے کے بعد 142 رنز سے ہرا دیا، یہ انگلینڈ کی نیوزی لینڈ کے خلاف رنز کے اعتبار سے بڑی فتح ہے، ہیتھرنائٹ اور جونز نے 63، 63 رنز کی اننگز کھیل کر جبکہ لارا مارش اور نتالی سکیور نے 3، 3 وکٹیں لیکر ٹیم کی جیت میں حصہ ڈالا۔ لیڈز میں کھیلے گئے پہلے ایک روزہ میچ میں انگلینڈ ویمن ٹیم نے پہلے کھیلتے ہوئے مقررہ اوورز میں 5 وکٹوں کے نقصان پر 290 رنز کا مجموعہ ترتیب دیا، کپتان ہیتھرنائٹ اور ایمی جونز 63، 63 رنز بنا کر نمایاں رہیں، آمیلیا کیر اور لی تاہوہو نے 2، 2 وکٹیں لیں، جواب میں نیوزی لینڈ ویمن ٹیم مطلوبہ ہدف کے تعاقب میں 35.3 اوورز میں 148 رنز بنا کر آﺅٹ ہو گئی، کپتان سوزی بیٹس اور سوفی ڈیوائن نے ٹیم کو 70 رنز کا آغاز فراہم کیا تاہم دونوں اوپنرز کے آﺅٹ ہونے کے بعد کوئی بھی کھلاڑی زیادہ دیر تک وکٹ پر نہ ٹھہر سکی اور پوری ٹیم 148 رنز پر ڈھیر ہو گئی، ڈیوائن 33 اور بیٹس 28 رنز بنا کر نمایاں رہیں، لارا مارش اور نتالی سکیور نے 3، 3 کھلاڑیوں کو آﺅٹ کیا۔
