لاہور(کرائم رپورٹر) عام انتخابات 2018ءمیں جیتنے والے امید واروں کے سپورٹرز کے خوشی میں رقص، جھوم جھوم کر سڑکوں پر نکل آئے،لیگی کارکنان بلے کو ڈرپ لگا کر جبکہ پی ٹی آئی کارکنان تبدیلی کے نعرے لگاتے ہوئے بھنگڑے ڈالتے رہے ، اس موقع پر آتشبازی اور ہوائی فائرنگ کے واقعات بھی ہوتے رہے ل، کسی قانونی کاروائی کی اطلاع موصول نہیں ہوئی ۔ بتایا گیا ہے کہ گزشتہ روز عام انتخابات 2018ءکے اختتام کے بعد غیر حتمی اور غیر سرکاری نتائج کے اعلانات سننے کے بعد سیاسی جماعتوں کے کارکنان کی جانب سے خوشی کا اظہار کر تے ہوئے پارٹی نغموں اور ڈھول کی تھاپ پر بھنگڑے ڈالنے کے ساتھ ساتھ ایک دوسرے کو چڑانے کیلئے کبھی لیگی کارکنان کی جانب سے بلے کو تو کبھی پی ٹی آئی کے کھلاڑیوں کی جانب سے شیر کو فرضی ڈرپیں لگا کر ایک دوسرے کو تنقید کا نشانہ بنایا جاتا رہا ۔ اس حوالے سے رات گئے تک شہر کے مختلف علاقوں میں سڑکیں بلاک کر کے ، ہوائی فائرنگ اور آتشبازی کر کے جشن منایا جاتارہا تاہم پولیس کی جانب سے کسی بھی پارٹی کے کارکنان کی جانب سے ہوائی فائرنگ ، ایمپلی فائر ایکٹ یا آتشبازی سمیت کسی بھی قسم کی کاروائی کی کوئی اطلاع موصول نہیں ہوئی۔
