لاہور (ویب ڈیسک )پاکستان کی وفاقی کابینہ کے دوسرے اجلاس میں فیصلہ کیا گیا ہے کہ صدر مملکت، وزیر اعظم اور اراکین قومی اسمبلی کے صوابدیدی فنڈز ختم کر دیے گئے ہیں۔وفاقی وزیر برائے اطلاعات فواد چوہدری نے جمعے کو پریس کانفرنس میں کابینہ میں کیے جانے والے فیصلوں کے بارے میں آگاہ کیا۔
انھوں نے صوابدیدی فنڈز کے بارے میں کہا سابق وزیر اعظم نواز شریف نے 21 ارب روپے، صدر مملکت نے آٹھ سے نو کروڑ روپے کے صوابدیدی فنڈز استعمال کیے جبکہ 30 ارب روپے اراکین قومی اسمبلی نے استعمال کیے۔وفاقی وزیر برائے اطلاعات نے کہا کہ کابینہ کے اجلاس میں یہ وزیر اعظم نے یہ فیصلہ بھی کیا ہے کہ وہ سرکاری جہاز استعمال نہیں کریں گے اور کمرشل فلائٹ سے ہی سفر کریں۔’وزیر اعظم نے یہ بھی فیصلہ کیا ہے کہ وہ دوروں میں اپنا خصوصی جہاز استعمال نہیں کریں گے۔ وہ غیر ملکی دوروں کے لیے فرسٹ کلاس میں نہیں بلکہ کلب کلاس میں سفر کیا کریں گے۔‘وفاقی کابینہ میں کیے گئے فیصلوں کے بارے میں بتاتے ہوئے ان کا کہنا تھا کہ وفاقی کابینہ نے پنجاب اور خیبر پختونخوا میں ماس ٹرانزٹ منصوبوں کا فرانزک آڈٹ کرانے کا فیصلہ کیا ہے۔’ملتان، اسلام آباد، لاہور اور اورنج لائن ٹرین منصوبوں کا فرانزک آڈٹ کرانے کی منظوری دی گئی ہے، جبکہ اگر ضرورت پڑی تو ایف آئی اے سے اس کی تحقیقات بھی کرائی جائیں گی۔’وفاقی کابینہ نے ہفتہ وار دو چھٹیاں برقرار رکھنے کا فیصلہ کیا ہے تاہم دفاتر کے اوقات کار تبدیل کر دیئے گئے ہیں۔
