لاہور (خصوصی رپورٹ) پنجاب کے ادارہ برائے ماحولیاتی تحفظ کے ترجمان نسیم الرحمن نے جس چیز کو پانی کی آلودگی کا سبب ٹھہرایا وہ زیادہ خطرناک ہے تاہم کوٹ اسد اللہ اس خطرے کی علامت ضرور ہے۔ نسیم الرحمن کے مطابق پنجاب کے 12 اضلاع کے نیچے فلورائیڈ کی زیادتی پائی جاتی ہے،کوٹ اسد اللہ بھی ایسی بیلٹ پر واقع ہے جہاں فلورائیڈ کا کوئی پتھر موجود ہے۔لاہور کے چند علاقوں سمیت ان میں قصور، منڈی بہاﺅالدین، میانوالی اور جنوبی پنجاب کے اضلاع شامل ہیں جہاں فلورائیڈ کی زیادتی پائی جاتی ہے۔تو کیا اس کا مطلب یہ ہے کوٹ اسد اللہ جیسے حالات پنجاب کے ان اضلاع میں بھی سامنے آ سکتے ہیں؟ نسیم الرحمن اس سے اتفاق کرتے ہیں۔جی بالکل ایسا ہو سکتا ہے، صرف ٹانگیں ہی ٹیڑھی نہیں، آلودہ پانی سے دیگر کئی بیماریاں بھی ہو سکتی ہیں، ہو سکتا ہے وہاں پہلے ہی سے یہ مسائل پائے جاتے ہوں۔تاہم ان کا کہنا تھا کوٹ اسد اللہ میں اب یہ مسئلہ نہیں ہونا چاہیے تھا کیونکہ متعلقہ اداروں نے وہاں صاف پانی پہنچانے کے لیے کام کیا تھا۔کئی برسوں سے لاہور میں دریائے راوی میں پانی کی سطح کم سے کم تر ہوتی جا رہی ہے، جس سے زیر زمین پانی کی مقدار گھٹ رہی ہے مگر وہ یقین سے نہیں کہہ سکتے۔ یہ نہیں معلوم کیا کسی سرکاری ادارے کی جانب سے اس حوالے سے تازہ تحقیق کی گئی یا سرخ جھنڈی بلند ہونے کے باوجود 20 برسوں کے دوران اس کا مسلسل معائنہ کیا گیا؟ تاہم پانچ برس سے چھوٹی عمر کے بچوں میں ہڈیاں ٹیڑھی ہونا واضح علامت ہے۔ہاں یہ خطرناک بات ہے،اگر ان بچوں میں یہ بیماری پائی جاتی ہے۔ اس کا مطلب ہے یہ نیا ہے، اس کی تصدیق ہونی چاہیے، ہم خود بھی تحقیق کریں گے،انہوں نے یہ اتفاق کیا کہ سب سے گنجان آباد صوبے کی آبادی آلودہ پانی سے ہونے والی معذوری کے خطرے سے دوچار ہے،یہ خطرہ اس وقت زیادہ بڑھ جاتا ہے جب پاکستان میں زیرِ زمین پانی کی سطح تیزی سے کم ہو رہی ہے۔زیرِ زمین پانی کی کمی سے ہر قسم کی آلودگیاں پانی میں داخل ہوتی ہیں۔ ایسا ہی ہے جیسے خالی برتن کے پیندے پر ہر قسم کا کچرا یا گند اکٹھا ہو جاتا ہے۔اس صورتحال میں سوال یہ بھی ہے اگر 20 برس میں کوٹ اسد اللہ جیسے چھوٹے گاﺅں میں مسئلہ ختم نہیں کیا جا سکا تو اتنے بڑے پیمانے پر اس کا حل کیسے ممکن ہو پائے گا؟
