ہنوئی(ویب ڈیسک) ویت نام میں خوش بختی کی علامت سمجھے جانے والے ہاتھی کی دم کے ایک بال کی قیمت 20 امریکی ڈالر ہے۔غیر ملکی خبر رساں ادارے کے مطابق ویت نام میں ہاتھی کی دم کے بال کو ’خوش بختی‘ کی علامت سمجھا جاتا ہے، اور وہاں کے باسیوں میں یہ تاثر عام ہے کہ ہاتھی کی د±م کے بال خوش قسمتی اور دولت کی علامت ہیں جس کے پاس ہاتھی کی دم کا بال ہوگا وہ زیادہ مال دار اور خوش قسمت ہوگا۔
ویت نام میں جنگلی جانوروں کے اعضا مثلا ہرن کے سینگ، چیتے کے دانتوں اور ریچھ کی کھال کی اسمگلنگ پر پابندی ہے اس لیے بھی ہاتھی کی دم کے بال کی خریدو فروخت ایک منافع بخش کاروبار بن چکا ہے اور محض ایک بال 20 امریکی ڈالر میں فروخت ہوتا ہے۔ خواتین و مرد ہاتھی کی دموں کے بال زیورات کی تیاری میں استعمال کرتے ہیں۔دوسری جانب حیوانوں کے حقوق کے لیے کام کرنے والی ایک غیر سرکاری تنظیم ’اینیملز ایگا‘ کی رکن دیون سلاگٹر نے ہاتھی کی دم سے بال نکالنے کے عمل کو افسوس ناک قرار دیتے ہوئے کہا ہے کہ دم ہاتھی کی جسمانی صفائی کے لیے اہم ہوتی ہے دم کو کاٹنے یا اس کے بال نکالنے سے جانور معذور ہوجاتے ہیں۔این جی او کا کہنا ہے کہ ہاتھی کی دمیں زیادہ تر پڑوسی ممالک یا افریقا سے اسمگل کی جاتی ہیں،اس وقت ویت نام میں 80 پالتو اور ایک سو کے قریب جنگلی ہاتھی موجود ہیں۔

بیجنگ(ویب ڈیسک) چین کی ایک 6 سالہ ننھی منی بچی کی ویڈیو اور تصاویر نے لاکھوں کروڑوں افراد کے دلوں کو موم کردیا جب اس کی اپنے والد کی خدمت کرتے ہوئے تصاویر سوشل میڈیا پر وائرل ہوئیں۔ اس بچی کو لوگوں نے بہت سراہا ہے۔چین کے خود مختار علاقے ننگ شیا میں 6 سالہ بچی پوری ہمت سے اپنے والد کی مدد کرتی ہے جو چار سال قبل حادثے کے شکار ہوکر معذور ہوگئے تھے۔2014ءمیں 38 سالہ تیان ہائی چینگ کی زندگی اس وقت تاریک ہوگئی جب ایک حادثے کے بعد وہ چلنے پھرنے سے بالکل معذور ہوگئے جس کے بعد ان کا روزگار بھی ختم ہوگیا۔ اس کے بعد تیان کی بیوی نے اپنے بیٹوں کو ساتھ لیا اور 6 سالہ بیٹی باپ کے پاس چھوڑ گئی۔اس سے پہلے کہ باپ بیٹی کو سنبھالتا چھ سالہ بچی نے خود اپنے والد کا سہارا بنتے ہوئے گھر کی صفائی، کھانا پکانے اور والد کی خدمت کی ذمے داری اپنے سر لے لی۔ ویڈیو اور تصاویر میں ننھی بچی کو والد کے زخم صاف کرتے، پہیہ کرسی پر بٹھاتے، کھانے کھلاتے اور رات کو کتاب پڑھاتے ہوئے دیکھا جاسکتا ہے۔اپنی بچی کی اس خدمت سے تیان مایوسی سے نکل کر پرامید ہوچکے ہیں۔ اب انہیں امید ہے کہ وہ جلد کچھ بہتر ہوکر اپنی بیٹی کے کاندھوں کی ذمے داری کم کرنا چاہتے ہیں۔والد نے اپنی بیٹی کی تصاویر اور ویڈیو چینی سوشل میڈیا پر پوسٹ کیں تو شروع میں لوگوں نے خاص نوٹس نہیں لیا لیکن ایک ویڈیو وی چیٹ پلیٹ فارم پر اپ لوڈ ہونے کے بعد اس گھرانے کی شہرت پوری دنیا میں پھیل گئی۔ صارفین نے بچی کے عزم وہمت کی بہت تعریف کی ہے۔

برلن(ویب ڈیسک)جرمن کمپنی نے مشہورِ زمانہ سیگ وے جیسی ایک سواری بنائی ہے جو برقی قوت سے چلتی ہے اور اسے اسکوٹر کا نام دیا گیا ہے۔ اس کی خاص بات یہ ہے کہ اسکوٹر سیکنڈوں میں تہہ ہوجاتی ہے اور اسے سیکنڈوں میں کھول کر استعمال کیا جاسکتا ہے۔تاہم استعمال کرنے والے کو کھڑے ہوکر اسے متوازن رکھنا پڑتا ہے۔ اس ایجاد کو ’ارمو‘ کا نام دیا گیا ہے جو کسی ہوور بورڈ کی طرح کام کرتی ہے۔ اس پر سوار شخص کو رفتار بڑھانے، ا?گے بڑھنے اور بریک لگانے کے لیے اپنا وزن استعمال کرنا پڑتا ہے۔اس کی سب سے خاص بات یہ ہے کہ ارمو سیکنڈوں میں تہہ ہوکر ہاتھوں میں سماجاتی ہے اور بیٹری ایک مرتبہ چارج ہونے پر 45 منٹ تک چل سکتی ہے۔ اس کی ذیادہ سے ذیادہ رفتار 15 کلومیٹر فی گھنٹہ ہے۔ا±رمو کے ٹائروں کے اندر سخت فوم بھرا ہوا ہے تاکہ اس کا وزن کم کیا جاسکے۔ کمپنی کا دعویٰ ہے کہ پوری مشین صرف دو سیکنڈ میں مٹ کر ہاتھوں میں سما جاتی ہے جس کا وزن ساڑھے چھ کلوگرام ہے۔ اب اس بریف کس نما سواری کو ایک جگہ سے دوسری جگہ لے جایا جاسکتا ہے۔جرمنی کی کِک اسٹارٹر کمپنی نے اس پر کام شروع کردیا ہے اور اور اس کی پوری باڈی المونیم اور کاربن فائبر سے بنائی گئی ہے۔ ابتدائی طور پر اس کی قیمت تقریباً تین لاکھ پاکستانی روپوں کے برابر رکھی گئی ہے۔