مکہ(ویب ڈیسک)سعودی فرمانروا شاہ سلمان بن عبدالعزیز نے مکہ اور مدینہ کے درمیان تیز ترین ٹرین سروس کا افتتاح کر دیا۔پینتیس ٹرینوں پر مشتمل حرمین ایکسپریس کے ذریعے 450 کلومیٹر کا سفر 300 کلومیٹر فی گھنٹہ کی رفتار سے طے ہو گا۔حکام کے مطابق حرمین ایکسپریس میں سالانہ 6 کروڑ افراد سالانہ سفر کریں گے اور اس کا مقصد حاجیوں اور عمرہ کرنے آنے والے افراد کو ٹریفک کی بہتر سہولیات فراہم کرنا ہے۔اس ٹرین کا کمرشل آغاز آئندہ پیر سے شروع ہو جائے گا جس کے تحت مکہ اور مدینہ سے یومیہ آٹھ، آٹھ ٹرینیں چلیں گی اور سال کے آخر تک یہ تعداد 12 تک بڑھا دی جائی گی۔سعودی عرب کے وزیرِ ٹراسنسپورٹ نبی العمودی کا کہنا تھا اس تیز ترین سفر کے ذریعے مکہ اور مدینہ کے درمیان سفر مختصر اور آسان ہو جائے گا۔ان کا کہنا تھا کہ حج اور عمرہ کے دوران مسلمان مکہ اور مدینے کے درمیان بس کے ذریعے سفر کرتے ہیں جس میں 6 گھنٹے تک لگ جاتے ہیں لیکن اب یہی سفر دو گھنٹے پر محیط ہو جائے گا۔مکہ کا ریلوے اسٹیشن مسجد الحرام سے چار کلو میٹر کے فاصلے پر ہے جہاں 20000 مسافروں کو سہولت دینے کی گنجائش ہے۔حکام کے مطابق تیز ترین ریلوے لائن کا منصوبہ 6 سال کے عرصے میں دو مراحل میں مکمل ہوا اور اس کی تعمیر میں سعودی، فرانسیسی، چینی اور اسپین کی کمپبنیوں نے حصہ لیا۔

نیویارک(ویب ڈیسک) امریکی صدر ڈونلڈ ٹرمپ نے الزام عائد کیا ہے کہ شام میں خون خرابہ روس اور ایران کی وجہ سے جاری ہے۔امریکی صدر ڈونلڈ ٹرمپ کی سربراہی میں سلامتی کونسل کا ایران سے متعلق اجلاس ہوا جس سے خطاب کرتے ہوئے ان کا کہنا تھا کہ ایرانی حکومت دنیا کی سب سے بڑی دہشت گردی کی اسپانسر ہے۔انہوں نے کہا کہ ایران کیخلاف بہت سخت اقدامات کرنے ہوں گے اور امریکا یقینی بنائے گا کہ ایران کبھی جوہری ہتھیار حاصل نہ کرسکے جبکہ شام میں خون خرابہ روس اور ایران کی وجہ سے جاری ہے۔امریکی صدر کا کہنا تھا کہ ایران پر پابندیوں کی پاسداری نہ کرنے والا فرد ہو یا ادارہ سخت نتائج بھگتے گا۔ٹرمپ نے چین پر تنقید کرتے ہوئے کہا کہ چین نے 2018 کے انتخابات میں مداخلت کی کوششیں کی ہیں، چین ٹرمپ کی جیت نہیں چاہتا کیونکہ ٹرمپ نے چین کو تجارت پر چیلنج کیا ہے۔انہوں نے کہا کہ سربراہ شمالی کوریا اپنے ملک کے لیے امن و خوشحالی چاہتے ہیں اور شمالی کوریا کے ساتھ معاملات چل رہے ہیں لہٰذا جلد خوشخبری ملے گی۔دوسری جانب امریکی صدر ڈونلڈ ٹرمپ نے اسرائیلی وزیراعظم بن یامین نیتن یاہو سے اقوام متحدہ کی جنرل اسمبلی اجلاس کے موقع پر ملاقات کی۔اس موقع پر امریکی صدر کا کہنا تھا کہ اسرائیل فلسطین تنازع کا دو ریاستی حل چاہتا ہوں، دو ریاستی حل اسرائیل فلسطین تنازع میں بہترین کام کرے گا۔انہوں نے کہا کہ اسرائیل فلسطین امن معاہدہ دو تین ماہ میں کرانا چاہتا ہوں، اسرائیل اور فلسطین بھی ایسا ہی چاہیں گے۔یاد رہے کہ گزشتہ روز امریکی صدر ڈونلڈ ٹرمپ کا اقوام متحدہ کی جنرل اسمبلی اجلاس سے خطاب میں کہنا تھا کہ ایران پڑوسی ممالک کی خودمختاری کا احترام نہیں کرتا لہٰذا تمام ممالک ایران کو اس کے جارحانہ رویے پر تنہا کریں۔امریکی صدر نے کہا کہ 5 نومبر سے ایرانی تیل کی فروخت پر پابندی لگائیں گے، ایران پر پابندیاں خطے میں عدم استحکام کے لیے ایرانی فنڈنگ روکنے کی کڑی ہے۔

واشنگٹن (ویب ڈیسک) میانمر کی شمالی ریاست راخین میں روہنگیا مسلمانوں کے خلاف تشدد بدترین ، بڑے پیمانے پر اور ہر ہر جگہ کیا گیا ، اور اس کا مقصد روہنگیا مسلمانوں کو دہشت زدہ کر کے ان کے علاقوں سے نکالنا تھا۔ یہ بیان کسی مسلم ملک کی جانب سے جاری نہیں کیا گیا، کہ جس پر روہنگیا مسلمانوں کی بے جا حمایت کا الزام لگایا جا سکے، بلکہ امریکا کے سٹیٹ ڈیپارٹمنٹ نے روہنگیا مسلمانوں پر ہونے والے ظلم کی تحقیقات کے بعد جاری کیا ہے۔ اس سے آپ اندازہ کر سکتے ہیں کہ ان مظلوموں کو درحقیقت کیسے المیے سے دوچار کیا گیا ہے۔بنگلہ دیش میں رہنگیا مسلمانوں کے پناہ گزین کیمپوں میں امریکی سٹیٹ ڈیپارٹمنٹ کے تحقیق کاروں نے چند ماہ قبل ایک ہزار سے زائد روہنگیا مسلمانوں کے ساتھ بات چیت کی۔ ان تباہ حال مسلمانوں کی داستانیں اس قدر دلخراش ہیں کہ جنہیں الفاظ میں بیان کرنا مشکل ہے۔ایک 35سالہ روہنگیا مسلمان نے لرزہ خیز مظالم کا احوال بیان کرتے ہوئے بتایا کہ” ایسے ایسے ظلم ہم پر کئے گئے کہ جن کا تذکرہ کرنے کو ہمارے پاس الفاظ نہیں۔ ایک موقع ایسا بھی آیا کہ مجھے اپنے بچوں اور بوڑھی ماں میں سے کسی ایک کا انتخاب کرنے پر مجبور کر دیا گیا۔ خدا کسی انسان کو ایسی آزمائش سے دوچار نا کرے۔ “ایک 25 سالہ لڑکی نے بتایا کہ ” ملٹری اور بارڈر گارڈپولیس نے میرے پانچ سالہ بچے کو میرے سامنے ذبح کر ڈالا۔ یہ صورتحال بہت خوفناک تھی میں اپنے بچوں کو نہیں بچا سکی ان میں سے ایک کو قتل کر دیا گیا۔“پناہ گزین کیمپوں میں مقیم افراد میں سے تقریباً نصف کا کہنا تھا کہ انہوں نے اپنی آنکھوں کے سامنے میانمر کی فوج کو مسلمان خواتین کے ساتھ اجتماعی زیادتی کرتے دیکھا ہے۔ ایک ساٹھ سالہ خاتون نے بتایا کہ” ہمارے گاﺅں کی خواتین کی اُن کے گھروں میں عصمت دری کی گئی۔ پھر انہوں نے 100 کے قریب خواتین اور لڑکیوں کو گھروں سے نکال لیا اور سڑک پران کے ساتھ اجتماعی زیادتی کرتے رہے۔ پھر وہ انہیں پہاڑوں میں لے گئے اور وہاں بھی انہیں درندگی کا نشانہ بناتے رہے۔ ان درندوں نے ہر جگہ ہمارے ساتھ یہ ظلم کیا، ہم کیا کیا بتائیں اور کس کے سامنے فریاد کریں۔“

واشنگٹن (ویب ڈیسک)امریکی حکام نے بتایا ہے کہ انھوں نے ایک چینی باشندے کو امریکی انجینیئرز اور سائنسدانوں کی جاسوسی کرنے کے الزام میں گرفتار کر لیا ہے۔غیرملکی میڈیا کے مطابق 27 سالہ جی چاو قن کو امریکی شہر شکاگو سے حراست میں لیا گیا اور اس پر غیر ملکی ایجنٹ ہونے کا الزام لگایا گیا ہے۔جی چاوقن اگست 2013 میں امریکہ الیکٹریکل انجینئیرنگ کی تعلیم حاصل کرنے آئے تھے جس کے بعد انھوں نے 2015 میں ماسٹرز کی ڈگری حاصل کی اور 2016 میں امریکی فوج کے ریزروز میں شامل ہوئے تھے۔ شکاگو کی عدالت میں ان پر عائد مقدمے میں جی چاوقن پر الزام ہے کہ وہ چین کے ایک اعلیٰ انٹیلیجنس افسر کے لیے کام کر رہے تھے اور ان کی ذمہ داری تھی کہ وہ 8 مخصوص افراد کے بارے میں تفصیل فراہم کریں۔رپورٹ کے مطابق امریکی حکام کا کہنا ہے کہ انھوں نے امریکہ میں موجود چند اور چینی افراد کی بھی جاسوسی کی تھی جو بحیثیت سائنسدان اور انجینئیر کام کر رہے تھے۔ ان میں چند وہ تھے جو امریکہ کے محکمہ دفاع کے لیے کام کر رہے تھے۔جی چاوقن نے امریکی فوج کے ریزروز میں کام کرتے ہوئے خاص طور پر کہا تھا کہ وہ کسی غیر ملکی حکومت سے رابطے میں نہیں ہیں اور نہ ہی انھوں نے امریکی فوجی اہلکار کو دیے جانے والے انٹرویو میں بتایا تھا کہ ان کی چین کے خفیہ ادارے کے افسر سے کسی قسم کے روابط ہیں۔