دبئی (اے پی پی) پاکستان کی ٹی ٹونٹی ٹیم کے مایہ ناز آل راﺅنڈر محمد حفیظ نے کہا ہے کہ وہ مکمل طور پر فٹ اور بھرپور فارم میں ہیں۔ انہوں نے کہا کہ کیویز کے خلاف پہلے میچ میں ٹیم کی فتح میں اہم کردار ادا کرنے پر وہ بہت خوش ہیں۔ انہوں نے کہاکہ وہ نیوزی لینڈ کے خلاف دوسرے میچ میں بھی اپنی عمدہ کارکردگی کی بدولت ٹیم کی فتح میں اہم کردار ادا کرینگے۔ انہوں نے کہا کہ ٹیم کا مورال بلند ہے اور ٹیم کیویز کو دوسرے میچ میں بھی کامیابی کے بعد تین میچوں کی سیریز میں 2-0 کی فیصلہ کن برتری حاصل کرگی جس کےلئے ٹیم نے بھرپور تیاری کر رکھی ہے۔ محمد حفیظ نے کہا کہ نوجوان کرکٹرز میں بڑی توانائی اور جذبہ ہے، مشکل صورتحال اور دباﺅ سے گھبراتے نہیں بلکہ اپنی صلاحیتیں منوانے کی کوشش کرتے ہیں، مضبوط حریفوں کے ساتھ سخت مقابلوں میں انہیں مزید سیکھنے اور اعتماد حاصل کرنے کا موقع ملے گا۔اپنے ایک بیان میں انہوں نے کہا کہ آسٹریلیا کے خلاف سیریز اور کیویز کے خلاف پہلے میچ میں کامیابی کے بعد ٹیم کی ٹی ٹونٹی میچز میں مسلسل فتوحات کی تعداد 7 ہوگئی ہے جو خوش آئندہ ہے۔ انہوں نے کہا کہ نوجوان کھلاڑی جس طرح پرفارم کر رہے ہیں وہ پلس پوائنٹ ہے۔ انہوں نے کہا کہ ان کی ٹیم کیویز کے خلاف بقیہ میچوں میں بھی عمدہ کارکردگی کے تسلسل کو برقرار رکھتے ہوئے مزید فتوحات حاصل کریگی۔ پاکستان نے کیویز کو پہلے ٹی ٹونٹی میچ میں سخت مقابلے کے بعد 2 رنز سے شکست دی تھی۔ محمد حفیظ نے کہا کہ کیویز کے خلاف پہلے میچ میں کھلاڑیوں نے کھیل کے تینوں شعبوں پر اچھا پرفارم کیا۔ انہوں نے امید ظاہر کی ہے کہ ان کی ٹیم کیویز کے خلاف بقیہ میچز میں بھی اپنی عمدہ کارکردگی کے تسلسل کو برقرار رکھتے ہوئے مزید فتوحات دلانے میں کردار ادا کریں گے۔
