لاہور (مانیٹرنگ ڈیسک) چینل ۵ کے تجزیوں، تبصروں پر مشتمل پروگرام ”کالم نگار“ میں گفتگوکرتے ہوئے معروف صحافی امجد اقبال نے کہا ہے کہ شیخ رشید 100 دن میں 10 ٹرینیں چلانے میں کامیاب رہے ذرائع مواصلات بڑھنے سے ملکی ترقی میں تیزی آئی ہے۔ ریلوے کی ترقی ملکی دفاع کے حوالے سے بھی خاصی اہم ہے۔ شیخ رشید سخت محنت کر رہے ہیں انہیں فریٹ ٹرینوں کی جانب بھی زیادہ توجہ دینا چاہئے۔ چینی قونصل خانے پر حملہ کو ناکام بنانے میں ہمارے سکیورٹی اداروں نے اچھی کارکردگی کا مظاہرہ کیا۔ شہداءکے لواحقین کیلئے اچھے پیکیج کا اعلان کیا گیا چین بھی ان کیلئے فنڈ ریزنگ کر رہا ہے۔ چیف جسٹس ثاقب نثار ڈیمز کی تعمیر کیلئے محنت کر رہے ہیں۔ موبائل فون چارجز پر اگر ڈیم فنڈ کیلئے ٹیکس لگتا ہے تو اس میں کوئی مذائقہ نہیں ہے۔ سموگ پر قابو پانے کیلئے بھٹے بند کرنا اچھا اقدام ہے۔ پاکستان میں ایڈز کے ڈیڑھ لاکھ مریض ہیں سالانہ 20 ہزار کا اضافہ ہو رہا ہے جو تشویشناک ہے حکومت کو عوام کو اس مرض کے حوالے سے آگہی ہونی چاہئے سینئر صحافی میاں افضل نے کہا کہ ریلوے نظام میں ترقی سے یقینا معیشت میں بہتری آئے گی۔ چینی قونصل خانہ پر حملے کو سکیورٹی اداروں نے ناکام بنا کر اپنی اہلیت ثابت کر دی، دہشتگرد اگر اندر داخل ہو جاتے تو بڑا نقصان ہو سکتا تھا۔ ڈیم فنڈ کیلئے ٹیکس لگانے میں کوئی ہرج نہیں ہے۔ چندے سے ڈیمز بنانا مشکل ہے تاہم آگہی تو ااتی ہے۔ سموگ پر قابو پانے کیلئے بھٹے بند کئے جا رہے ہیں حکومت کو یہ بھی سوچنا چاہئے کہ ایک بھٹے پر 500 محنت کش کام کرتے ہیںوہ سب بیروزگار ہو جائیں گے۔ اصل آلودگی تو کارخانے، بھٹیاں پھیلا رہے ہیں جہاں پلاسٹک و دیگر گندی چیزیں جلائی جاتی ہیں ان کو کیوں نہیں روکا جاتا۔ ہمارے ہاں ایڈز بارے آگہی نہیں ہے، ایڈز کے مریضوں کا علاج کیا جانا چاہئے۔ امریکی و دیگر غیر ملکی خواتین جو شادی کیلئے پاکستان آتی ہیں کی مانیٹرنگ ہونی چاہئے۔ تجزیہ کار ناصر اقبال نے کہا کہ بدقسمتی سے ریلوے کے ساتھ ہر حکومت میں کھلواڑ کیا جاتا رہا۔ ریلوے کے حوالے سے مستقل پالیسیاں بنائی جانی ہی پڑیں گی، عوام سے بھی تجاویز لینا چاہئیں۔ سکیور اہلکاروں نے چینی قونصل خانے پر حملہ ناکام بنا کر ملک کو مشکل کا شکار ہونے سے بچا لیا۔ وفاقی حکومت، صوبائی حکومت، وزراءکا امداد کا اعلان خوش آئند ہے چینی حکومت بھی شہداءاور زخمیوں کیلئے فنڈ ریزگ کر رہی ہے جو تاریخ میں پہلی بار ہو رہا ہے۔ سی پیک کے دشمن ابھی مزید حملوں کی کوشش کر سکتے ہیں ان سے ہوشیار رہنا ہو گا۔ ماحول صاف رکھنا ہے تو کارخانوں اور بھٹیوں میں جلائی جانے والی گندی اشیاءکا استعمال روکنا ہو گا۔ ایڈز کا پھیلنا تشویشناک ہے۔ منشیات فروشی بھی اس مرض کے بڑھنے کی ایک بڑی وجہ ہے، عوام کو موذی مرض بارے آگہی دینی چاہئے۔ امریکی ہمارے دوست نہیں ہیں امریکی خواتین کا بڑی تعداد میں شادی کیلئے پاکستان آنا تشویشناک ہے اس کے پیچھے کوئی سازش نظر آتی ہے۔ سینئر تجزیہ کار ضمیر آفاقی نے کہا کہ 90 دن میں 10 ٹرینیں چلانے پر شیخ رشید مبارکباد کے مستحق ہیں۔ چینی قونصل خانے پر حملے کو ناکام بنانے میں نجی گارڈز نے بھی اپنا کردار ادا کیا انہیں بھی نظر انداز نہیں کرنا چاہئے دہشتگرد اندر اتنی آسانی سے کیسے داخل ہو گئے، سکیورٹی میں کمزوریوں کا بھی دیکھا جانا چاہئے۔ دنیا میں اس وقت چھوٹے ڈیمز بن رہے ہیں واٹر مینجمنٹ کی جا رہی ہے ہمیں بھی اس طرف دیکھنا چاہئے حکومت کو سموگ سمیت آلودگی پر قابو پانے کیلئے بروقت اقدامات لینے چاہئیں۔ بھٹوں پر پابندی کے باعث اینٹوں کی قیمتیں بڑھ رہی ہیں جن کے باعث تعمیراتی شعبہ متاثر ہو رہا ہے اس طرف بھی توجہ دینا ہو گی، ہسپتالوں کا فضلہ دوبارہ استعمال کیا جا رہا ہے منشیات فروشی بڑھ گئی ہے ان باتوں کے سبب ایڈز پھیل رہا ہے غیر ملکی خواتین سے ہمارے نوجوان محبت نہیں کرتے بلکہ صرف ویزا حاصل کرنے کا ایک ذریعے بناتے ہیں۔

لاہور (مانیٹرنگ ڈیسک ) چینل فائیو کے پروگرام نیوز ایٹ سیون میں گفتگو کرتے ہوئے پیپلز پارٹی کے سینئر رہنما آیت اللہ درانی نے کہاہے کہ عمران خان نے سابقہ اور ہماری حکومت کی نسبت 100دن میں کارکردگی کا مظاہرہ دکھانے کا اعلان کیا مگر حکومت کو چلانے میں 100دن کا کوئی معیار نہیں ہوتا۔ ہم نے عمران خان کی کارکردگی سے انکار نہیں کیا۔ زمینیں لینے کا اختیار صوبائی حکومتوں کو ہے۔ بلوچستان اور کے پی کے میں ایک انچ زمین براہ راست نہیں لی جاسکتی۔ شیلٹر ہومز اور 50لاکھ گھروں میں دیکھنا ہے کہ پاکستان کے غریبوں کا بھلا ہوگا یا انکے دوستوں کے کاروباری ذرائع کو بڑھایا جائے گا۔ پاکستان کے ریاستی اداروں نے حکومتی معاملات کو سنجیدہ لیا ہے اور نہ لے سکتے ہیں۔ سو دن میں ایک بوتل شراب اور ایک چھٹانک چرس رکھنے کی اجازت کا نوٹیفکیشن وزیراعظم کی جانب سے تحفہ ہے۔ پیپلزپارٹی جنوبی پنجاب کو سپورٹ کرے گی مگر اسٹیبلشمنٹ نے ماضی میں ہمارے شیڈیول کو مسترد کیا۔ پاکستان کے چین، امریکہ اور سعودی عرب سے تعلقات دور دور تک اچھے ہوتے نظر نہیں آرہے۔ قرضہ لینا خارجہ پالیسی نہیں ہے، بھیک مانگ کر ملک کو چلانا ملک کو ڈبویا جا رہا ہے۔ پاکستان جنگی کیفیت سے نکل گیا تو بات بن سکتی ہے۔ عمران خان کا یوٹرن کا بیان بے علمی ہے۔ عمران خان کو کہنا چاہئے تھا کہ سراط مستقیم پر چلوں گا، اور باقی حکومتوں کی طرح قرض لوں گا۔ عمران خان کے بیان لکھنے والے انہیں ایسے کام اس وقت نہ بتا دیں جب وہ عالم نزع میں ہوں۔ تحریک انصاف کے ایم این اے ابراہیم خان نے کہا کہ حکومت کی 100روزہ کارکردگی میں ترجیحات سیٹ کر دی گئی ہیں۔ حکومتی سیاسی نظام میں کرپشن صفر کر دی گئی ہے اور اسکے اثرات نظر آنا شروع ہوگئے ہیں۔ حکومتی اقدامات ملک و قوم کی بہتری کے لیے ہے 5سال میں اپنے وعدے پورے کریں گے۔ جنوبی پنجاب صوبہ دو تہائی اکثریت سے بنانے کے لیے لابنگ کر رہے ہیں، بہت جلد جنوبی پنجاب صوبہ بنے گا۔ سابق وزیراعظم یوسف رضا گیلانی پر 9ہزار کلو ایفی ڈرین کا کیس ہے انکے جنوبی پنجاب کے نعرے کی شفافیت کی حیثیت کیا ہوگی۔ پروگرام میں گفتگو کرتے ہوئے تجزیہ کار ائیر مارشل شاہد لطیف نے کہا کہ حکومت کی 100دن میں پالیسی کی سمت متعین ہورہی ہے۔ ایک رات میں تبدیلی نہیں آسکتی۔ امریکا جیسی قوت کو منہ توڑ جواب دینے سے بھی سمت کا اظہار ہوا۔ یہ نہیں ہوسکتا کہ امریکہ تنقید کرتا رہے اور ہم خاموش بیٹھے رہیں۔ سعودی عرب، مشرق وسطی کی سیاست کی جانب بڑا قدم ہم نے اٹھایا ہے۔ چین اور روس ملکر خطے میں کاونٹر پاور بن کر ابھر رہے ہیں۔ ہم نے پاکستان کی مالی حالت ٹھیک کرنی ہے مگر ہمیں امریکا کی ناراضگی کی پرواہ نہیں، ہم اصول پر چل رہے ہیں۔ دنیا کی جنگ کا نقشہ مالی حالت پر طے ہوتا ہے، بھارت کی ترقی کے باعث امریکا اسکے قریب ہے۔ گزشتہ روز دہشتگردی کے واقعات پر موجودہ حکومت پر کھلی تنقید کی۔ حکومت کو مسائل کو دیکھتے ہوئے تمام مسائل کا حل ایک وقت میں ڈھونڈنا ہے۔ نیشنل ایکشن پلان کے ہر نقطے پر ٹاسک فورس چاہئے، حکومتی پالیسیوں کے اندر یہ نظر نہیں آیا۔ آرمی چیف بار بار کہہ رہے ہیں کہ دہشتگردی کیخلاف جنگ ختم نہیں ہوئی۔ ایسے میں نیشنل ایکشن پلان پر عمل ضروری تھا۔ عمران خان نے کہا کہ چینی قونصلیٹ پر حملہ سرپرائز نہیں تھا۔ مگریہ سرپرائز تھا، ہمیں اطلاعات پر انٹیلی جنس ایجنسیوں کو مزید فعال کرنا چاہئے تھا۔ اندرونی مظبوطی کے بغیر کوئی بھی ملک پاکستان سے اچھے تعلقات نہیں رکھنا چاہے گا۔ افغانستان کے بغیر پاکستان میں امن نہیں ہوسکتا، اس حوالے سے افغانستان کو خارجہ پالیسی میں اہم درجہ حکومت پاکستان کی جانب سے نہیں دیا گیا۔ عمران خان نے 100دن میں دن رات محنت کی ہے، قابلیت کو صحیح سمت میں لانے کی ضرورت ہے۔ لوگ اب نتائج چاہتے ہیں۔