حسن سردارکو ہاکی ٹیم سے حیران کن پرفارمنس کی امید

کراچی (یواین پی) منیجر حسن سردار نے کہا ہے کہ قومی ہاکی ٹیم نوجوان اور سینئر پلیئرز کا بہترین امتزاج ہے جو ورلڈ کپ میں اپنی کارکردگی سے سب کو حیران کر دے گی۔گزشتہ روز بھوبانیشور میں میڈیا سے بات چیت کرتے ہوئے انہوں نے کہا کہ ورلڈ رینکنگ میں 13 ویں پوزیشن پر ہونے کے باوجود قومی اسکواڈ سے اچھی پرفارمنس کی امید ہے۔میگا ایونٹ کبھی بھی آسان نہیں ہوتا اور کھلاڑیوں کو اپنی ذمہ داری کا احساس کرتے ہوئے بہترین نتائج دینے کی کوشش کرنا ہوتی ہے اور انہیں توقع ہے کہ گرین شرٹس بھی قوم کی توقعات کو ٹھیس نہیں پہنچائیں گے۔ اس موقع پر گول کیپر عمران بٹ کا کہنا تھا کہ اس وقت وہ پرانے ریکارڈز کو بھول کر صرف ورلڈ کپ میں اپنی کارکردگی پر توجہ مرکوز رکھے ہوئے ہیں۔ واضح رہے کہ ماضی میں پاکستان نے چار مرتبہ ورلڈ کپ ٹائٹل اپنے نام کیا جبکہ دو بار سلور میڈلز جیتے۔ حالیہ میگا ایونٹ میں گرین شرٹس کو گروپ ڈی میں ہالینڈ، جرمنی اور ملائیشیا جیسی مضبوط ٹیموں کے ساتھ رکھا گیا ہے۔ ہاکی ورلڈ کپ کا باقاعدہ آغاز اٹھائیس نومبر کو ہو گا۔ ایک سوال پر عمران بٹ کا کہنا تھا کہ اس میں کوئی شک نہیں کہ کھلاڑیوں پر ذہنی دباو¿ بہت زیادہ ہے لیکن ہاکی فیڈریشن کی جانب سے بھرپور سپورٹ مل رہی ہے۔ صرف یہی ہدایت ہے کہ ورلڈ کپ پر توجہ رکھیں اور باقی مسائل کو پس پشت ڈال دیں۔عمران بٹ کے مطابق قومی ٹیم گزشتہ دنوں ایشین چیمپئنز ٹرافی کے فائنل میں پہنچی تھی اور کھلاڑیوں نے ثابت کیا کہ قومی ٹیم مضبوط ہے اور اہم میچوں میں کم بیک کی اہلیت رکھتی ہے۔ ایک سوال پر انہوں نے کہا کہ دو ہزار چودہ کی چیمپئنز ٹرافی میں بھارت میں جو کچھ بھی ہوا، وہ غلط تھا تاہم فیلڈ پر جارحیت دکھانا معمول کی بات ہے، امید ہے کہ آئندہ ایسا نہیں ہو گا۔