کانگو ، بزدلی اور فرائض سے غفلت پر 66 فوجیوں کو سزائے موت

کنشاسا( آئی این پی )ڈیموکریٹک ریپبلک آف کانگو میں بزدلی، بغاوت اور احکامات ماننے سے انکار کرنے کے جرم میں کم از کم 66 فوجیوں کو سزائے موت سنا دی گئی ۔عالمی میڈیا کے مطابق یہ سزائیں مشرقی ڈی آر کانگو کے صوبے ‘شمالی کیوو’ کے علاقے ‘والی کالی’ میں ایک فوجی عدالت کی جانب سے 71 فوجیوں کے مقدمے کی سماعت کے بعد سنائی گئیں۔ اس عدالتی کارروائی کے دوران چار فوجیوں کو باعزت بری کر دیا گیا، جبکہ ایک اور فوجی کو 10 سال قید کی سزا سنائی گئی۔فوجی حکام کا کہنا ہے کہ اس ٹرائل کا بنیادی مقصد مشرقی ڈی آر کانگو میں مسلح گروہوں کے خلاف لڑنے والے فوجیوں کے درمیان نظم و ضبط کو بہتر بنانا تھا۔ یہ خطہ دہائیوں سے خانہ جنگی اور تنازعات کا شکار ہے جہاں سرکاری افواج اور ‘فرنٹ فار دی ری فائونڈیشن آف دی نیشن (ایف آر این) کے درمیان شدید لڑائی جاری ہے جو کہ ‘M23’ گروپ سمیت کئی باغی گروہوں پر مشتمل اتحاد ہے۔اطلاعات کے مطابق ان فوجیوں کو 20 اکتوبر کو والی کالی میں گرفتار کیا گیا تھا جہاں ان پر الزام عائد کیا گیا تھا کہ انہوں نے ایف آر این کے جنگجوں کے ساتھ جھڑپوں کے دوران اپنے مورچے چھوڑ دئیے تھے اور میدانِ جنگ سے فرار ہو گئے تھے۔