ملتان’ آن لائن فراڈ کی شکار خاتون کی 7 لاکھ 11 ہزار روپے کی رقم ملزمان سے برآمد’ متاثرہ کو واپس

اسلام آباد (این این آئی) نیشنل سائبر کرائم انویسٹی گیشن ایجنسی سرکل ملتان نے آن لائن فراڈ کے خلاف بڑی اور مؤثر کارروائی کرتے ہوئے متاثرہ خاتون کی 7 لاکھ 11 ہزار روپے کی مکمل رقم ملزمان سے برآمد کرکے حوالے کر دی،متاثرہ خاتون نے این سی سی آئی اے ملتان میں شکایت درج کرائی تھی کہ نامعلوم ملزمان نے جعلسازی اور دھوکہ دہی کے ذریعے اسے آن لائن فراڈ کا نشانہ بنایا اور مختلف حربوں سے اس سے 7 لاکھ 11 ہزار روپے ہتھیا لیے۔ متاثرہ خاتون کی شکایت پر این سی سی آئی اے ملتان نے فوری طور پر باقاعدہ انکوائری شروع کی،انکوائری کے دوران این سی سی آئی اے کی ٹیم نے جدید تکنیکی ذرائع اور ڈیجیٹل شواہد کی مدد سے ملزمان تک رسائی حاصل کی۔ مسلسل تفتیش اور مؤثر حکمت عملی کے نتیجے میں ملزمان سے متاثرہ خاتون کی مکمل رقم 7 لاکھ 11 ہزار روپے برآمد کر لی گئی، جو باقاعدہ قانونی کارروائی کے بعد متاثرہ خاتون کے حوالے کر دی گئی،رقم کی واپسی پر متاثرہ خاتون نے این سی سی آئی اے کی بروقت اور مؤثر کارروائی پر اطمینان کا اظہار کرتے ہوئے ادارے کا شکریہ ادا کیا،اس موقع پر ڈائریکٹر جنرل این سی سی آئی اے سید علی ناصر رضوی نے کہا کہ شہریوں کو آن لائن فراڈ سے بچانا اور متاثرین کو ان کی رقم واپس دلانا این سی سی آئی اے کی اولین ترجیح ہے۔