راولپنڈی(خصوصی رپورٹر)ڈسٹرکٹ ایجوکیشن اتھارٹی راولپنڈی کی جانب سے ضلع بھر کے نجی تعلیمی اداروں کے سیفٹی آڈٹ سرد خانے کی نذر ہوگیا جبکہ مکمل یا جزوی طور پر خطرناک قرار دی گئی سرکاری تعلیمی اداروں کی 143 عمارتوں میں سے بھی صرف 5 عمارتوں پر تعمیر و مرمت کا کام شروع ہوسکا باقی ماندہ عمارتوں کو صوبائی حکومت کی منظوری سے مشروط کر کے حالات کے رحم و کرم پر چھوڑ دیا گیا اکتوبر میں پشاور کے نجی سکول میں آتشزدگی سے متعدد بچوں کی اموات کے سانحہ کے بعد پنجاب حکومت نے صوبہ بھر کے نجی تعلیمی اداروں کی عمارتوں کی جانچ پڑتال کا حکم دیا تھا جس کے تحت ڈسٹرکٹ ایجوکیشن اتھارٹی راولپنڈی نے بھی ضلع کے تمام نجی و سرکاری تعلیمی اداروں کے سیفٹی آڈٹ کے احکامات جاری کئے تھے جس کے تحت کمیونیکیشن اینڈ ورکس ڈیپارٹمنٹ (سی اینڈ ڈبلیو) پنجاب نے ضلع راولپنڈی میں 143 سرکاری تعلیمی اداروں کی عمارتوں کو مکمل یا جزوی طور پر خطرناک قرار دیا تھا جبکہ نجی تعلیمی اداروں کی عمارتوں کی جانچ پڑتال کے لئے 47 سیفٹی آڈٹ ٹیمیں تشکیل دی گئی تھیں جنہوں نے اکتوبر کے آخر میں حتمی رپورٹ پیش کرنا تھی ذرائع کے مطابق اس پر تاحال کوئی پیش رفت نہیں ہو سکی ذرائع کے مطابق راولپنڈی میں بیشتر سکول ایسی کرائے کی عمارتوں میں واقع ہیں جن کے پاس کوئی بلڈنگ پلان کا نقشہ ہی موجود نہیں ہے اسی طرح آتشزدگی یا کسی ممکنہ ہنگامی صورتحال سے نمٹنے کے لئے نہ تو ان عمارتوں میں آگ بجھانے کے آلات ہیں اور نہ کوئی ایمرجنسی راستے ہیں جبکہ 70 فیصد سے زائد سکول بلڈنگ فٹنس اور ہائی جینک سرٹیفکیٹ کے معیار پر ہی پورا نہیں اترتے اس حوالے سے ڈسٹرکٹ ایجوکیشن اتھارٹی کے چیف ایگزیکٹیو افسر (سی ای او) نے رابطہ کرنے پر بتایا کہ تشکیل دی گئی 47 ٹیموں نے ضلع بھر میں 4 ہزار سکولوں کا سیفٹی آڈٹ مکمل کر لیا ہے جس میں ان تمام عمارتوں کو محفوظ قرار دے دیا گیا ہے تاہم جبکہ سی اینڈ ڈبلیو کی جانب سے خطرناک قرار دی گئی 143 سرکاری تعلیمی اداروں کی عمارتوں میں سے 40 عمارتوں کے ایسے حصے مکمل طور پر خالی کروا لئے گئے ہیں جن کی حالت انتہائی مخدوش تھی جبکہ 5 سکولوں میں نئی کمروں کی تعمیر شروع کردی گئی ہے اور باقی ماندہ کے لئے پروپوزل پنجاب حکومت کو بھجوائی گئی ہے جہاں سے منظوری کے ساتھ ہی باقی عمارتوں کا کام شروع کردیا جائے گا۔
