بیونس آئرس (اے این این) ارجنٹائن میں ایک ٹی وی چینل نے بھارتی وزیراعظم نریندر مودی کو امریکی مشہور کارٹون سیریز سمپسنز کے کردار” آپو“ سے تشبیہ دیدی۔ جی 20کے سربراہی اجلاس میں شرکت کے لیے انڈیا کے وزیراعظم نریندر مودی کا جہاز جب ارجنٹائن کے شہر بیونس آئرس کے ایئر پورٹ پر لینڈ کیا تو ٹی وی چینل کرونیکا نے اس خبر کو نشر کرتے ہوئے ہیڈ لائن لگائی آپو پہنچ گئے اور اس کے ساتھ جہاز اور آپو کی تصویر کو جوڑ کر پیش کیا۔ٹی وی چینل کی جانب سے اس انداز میں خبر نشر کرنے پر سوشل میڈیا پر خاصی تنقید اور غصے کا اظہار کیا ہے اور بعض نے نسل پرستی پر مبنی فعل بھی قرار دیا ہے۔ انڈین نژاد امریکی کامک ہری کونڈابلو نے آپو کے کرادر کے بارے میں 2017میں ایک دستاویزی فلم بنائی تھی جس میں دلائل دیے گئے تھے کہ آپو کے کردار کو نسل پرستی پر مبنی قدامت پسند رائے کی بنیاد پر بنایا گیا تھا۔
