لاہور(ویب ڈیسک) سپریم کورٹ میں ریلوے کے ڈی جی لیگل طاہر پرویز کی تقرری کے خلاف کیس کی سماعت ہوئی۔چیف جسٹس نے ہائی کورٹ کو ڈی جی لیگل کے کیس کا فیصلہ ایک ہفتے میں سنانے کا حکم دیا ہے۔میڈیا رپورٹس میں بتایا گیا کہ کمرہ عدالت میں ڈی جی لیگل اور وزیر ریلوے کے درمیان نوک جھونک ہوئی ہے۔ڈی جی لیگل طاہر پرویز نے شیخ رشید پر طنز کرتے ہوئے کہا کہ اب آپ خوش ہیں؟جس پر شیخ رشید نے چیف جسٹس سے شکایت کرتے ہوئے کہا کہ دیکھ لیں چیف صاحب آپ کے سامنے مجھ پر طنز کرتے ہیں۔
چیف جسٹس نے کہا کہ طاہر پرویز کو وزیرکی عزت کرنی چاہئیے۔چیف جسٹس نے کہا کہ آپ میرے عزیز کےد وست ہیں مگر میں قانون کے مطابق فیصلے کرتا ہوں۔چیف جسٹس نے کہا کہ شیخ رشید صاحب پنشن ، کوارٹر اور نوکریوں کی شکایت کو ہمدردیوں کی بنیاد پر دیکھیں۔طاہر پرویز نے کہا کہ میری برطرفی کے لیے قواعد و ضوابط کو مدِ نظر نہیں رکھا گیا۔چیف جسٹس نے کہا میں جانتا ہوں آپکی تعیناتی کیسے اور کہاں ہوئی۔طاہر پرویز نے کہا کل میرے متعلق جو گفتگو ہوئی اندازہ ہو گیا تھا کہ کیا سلوک ہونا ہے۔شیخ رشید نے کہا کہ طاہر پرویز کو ڈی جی لیگل ریلوے سے ہٹانے کا عدالت عالیہ نے حکم امتناع دیا ہوا ہے۔چیف جسٹس نے کہا کہ معاملہ اونچا ہوا تو بہت سے لوگ مشکل میں آجائیں گے بہتر ہے معاملی نیچا رکھیں۔اگر ہم خود ہی اصول پر نہیں چلیں گے تو پھر کیا معاملہ ہو گا۔اپنے تعلقات داروں کے خلاف قانون کے مطابق فیصلے کی مثال قائم کرنا چاہتا ہوں۔آپکا بھائی میرا برخودار ہے اور دوسرے سے بھی میرے اچھے تعلقات ہیں۔عوام جانتی ہے آپکی تعیناتی کیسے ہوئی اور کس نے کردار اد اکیا۔چیف جسٹس نے کہا کہ طاہر پرویز صاحب آپ ایک نوکری کے لیے عزت کو داو¿ پر لگا رہے ہیں۔آپکے وزیر ریلوے کے ساتھ طنز والے ریلوے پر دکھ ہوا۔شیخ رشید نے دوران سماعت چیف جسٹس کی تعریف کی اور کہا کہ آپ نے قوم پر بہت بڑا احسان کیا ہے لیکن چیف جسٹس نے شیخ رشید کو اپنی تعریف کرنے سے روک دیا۔چیف جسٹس نے کہا کہ اب مجھے کوفت ہوتی ہے جب میری کوئی تعریف کرے،شیخ رشید نے کہا کہ یہ تعریف نہیں بلکہ حقیقت ہے کہ آپ نے قوم پر احسان کیے ہیں۔سپریم کورٹ نے لاہور رجسٹری کو لاہور ہائیکورٹ کو 31دسمبر کو طاہر پرویز کیس سماعت کے لیے مقرر کرنے کا حکم دیا ہے۔
