بہاولنگر (ویب ڈیسک) تحصیل چشتیاں میں ساتھی لیڈی کانسٹیبل سے مبینہ زیادتی اور ویڈیو بناکر بلیک میل کرنے کے الزام میں 2 پولیس اہلکاروں کو گرفتار کرلیا گیا۔ایف آئی آر کے مطابق تھانہ مدرسہ میں تعینات لیڈی پولیس کانسٹیبل نے الزام عائد کیا کہ ہیڈ کانسٹیبل فہیم نے اپنے ساتھی اے ایس آئی کاشف کے ہمراہ ڈیڑھ ماہ قبل انہیں زیادتی کا نشانہ بنایا اور ویڈیو بنائی لیڈی کانسٹیبل کےحوالے سے بتایا کہ ہیڈ کانسٹیبل فہیم انہیں پہلے بھی جنسی طور پر ہراساں کیا کرتا تھا، ایک دن ملزم لیڈی کانسٹیبل کو چک 15 گجیانی میں واقع ایک مکان میں ایک خاتون ملزمہ کی نگرانی کا بہانہ بنا کر لے گیا، جہاں اے ایس آئی کاشف بھی موجود تھا۔خاتون کے مطابق ملزمان نے انہیں نشہ آور اویات دے کر مبینہ طور پر زیادتی کا نشانہ بنایا اور ان کی تصاویر اور ویڈیوز بناکر انہیں بلیک میل کیا۔لیڈی کانسٹیبل کے مطابق واقعے کے بعد ہیڈ کانسٹیبل فہیم نے انہیں پیشکش کی کہ اگر وہ چاہتی ہیں کہ یہ سلسلہ رک جائے تو وہ اس سے نکاح کرلیں۔ڈی پی او بہاولنگر عطاالرحمان نے لیڈی کانسٹیبل سے زیادتی کا نوٹس لے کر واقعے میں ملوث اہلکاروں کومعطل کردیا۔دوسری جانب خاتون کی مدعیت میں گذشتہ روز ہیڈ کانسٹیبل اور اےایس آئی کے خلاف مقدمہ درج کرکے انہیں گرفتار کرلیا گیا۔

لاہور (ویب ڈیسک) پنجاب اسمبلی میں عارضی ملازمین کو مستقل کرنے کا بل منظور ہو گیا، ڈیڑھ لاکھ عارضی ملازمین فائدہ اٹھائیں گے۔اسمبلی اجلاس کے دوران حکومت نے عارضی سرکاری ملازمین کو مستقل کرنے کا بل پیش کیا جو منظور کر لیا گیا تاہم اپوزیشن نے اسے قبل از انتخابات دھاندلی قرار دیدیا۔ اپوزیشن ارکان اسمبلی معاملے پر مسلسل احتجاج کرتے رہے۔اس حوالے سے وزیر قانون رانا ثنائ اللہ کا کہنا تھا کہ اپوزیشن بے نقاب ہو گئی جو چند روز قبل عارضی ملازمین سے اظہار یکجہتی کر رہی تھی۔

اسلام آباد (ویب ڈیسک) وزیر اعظم نے مریم اورنگزیب کو وفاقی وزیر بنانے کا فیصلہ کرلیا ہے۔ وزیر اعظم کی جانب سے وزیر مملکت برائے اطلاعات مریم اورنگزیب کو وفاقی وزیر بنانے کا فیصلہ کرلیا گیا ہے۔ مریم اورنگزیب کچھ دیر بعد ایوان صدارت میں وفاقی کابینہ کے ارکان اور دیگر اعلیٰ حکام کی موجودگی میں حلف اٹھائیں گی۔ ان سے صدر مملکت ممنون حسین حلف لیں گے۔ اس سے قبل آج (جمعہ کو) ہی مشیر خزانہ مفتاح اسماعیل کو بھی وفاقی وزیر خزانہ بنایا گیا ہے۔خیال رہے کہ مسلم لیگ ن کی انتہائی متحرک رہنما مریم اورنگزیب کو ڈان لیکس کا معاملہ سامنے آنے کے بعد وفاقی وزیر اطلاعات و نشریات سینیٹر پرویز رشید کی برطرفی کے بعد وزیر مملکت برائے اطلاعات بنایا گیا تھا۔ نواز شریف کی نااہلی کے بعد وزیر اعظم شاہد خاقان عباسی کی وزارت عظمیٰ میں بھی ان کے پاس اطلاعات و نشریات کا قلمدان برقرار رہا۔

میرانشاہ(ویب ڈیسک) شمالی وزیرستان کے گاو¿ں سیدگئی میں نامعلوم افراد کے شادی کی تقریب پر دستی بم حملے میں 3 افراد جاں بحق جبکہ 34 زخمی ہو گئے۔زخمیوں میں 5 بچے بھی شامل ہیں جن کو میرانشا ہ اور بنوں ہسپتال منتقل کر دیا گیا۔ ہسپتال انتظامیہ نے 4 زخمیوں کی حالت تشویشناک بتائی ہے۔ سیکیورٹی فورسز اور پولیٹیکل انتظامیہ نے علاقہ میں سرچ آپریشن شروع کر دیا۔