لاہور(ویب ڈیسک)اسپیکر پنجاب اسمبلی چوہدری پرویز الہٰی کا کہنا ہے کہ پاکستان کی عالمی سطح پر تنہائی کے خاتمہ میں آرمی چیف جنرل قمر جاوید باجوہ کا کردار اہم ہے اور ان کے دوروں اور ملاقاتوں سے باہمی اعتماد کی فضا پیدا ہوچکی ہے۔لاہور میں میڈیا سے گفتگو کرتے ہوئے چوہدری پرویز الہیٰ نے کہا کہ افغانستان میں قیام امن کے لیے آرمی چیف کے دوروں کا عالمی سطح پر اعتراف کیا جا رہا ہے جب کہ کرتارپور افتتاح سے پہلی مرتبہ بھارتی قیادت سفارتی محاذ پر بیک فٹ پر نظر آ رہی ہے۔اسپیکر پنجاب اسمبلی نے کہا کہ خطے کے ممالک سے بہتر تعلقات میں آرمی چیف کی خاموش ڈپلومیسی کا عمل دخل ہے، قومی سلامتی اور یکجہتی کے لیے جنرل باجوہ کی خدمات ہمیشہ یاد رکھی جائیں گی۔

اسلام آباد(ویب ڈیسک)سابق وزیراعظم نواز شریف کے خلاف العزیزیہ اسٹیل ملز اور فلیگ شپ ریفرنس کا فیصلہ کل سنایا جائے گا جس کے لیے سیکیورٹی کے انتہائی سخت انتظامات کیے گئے ہیں۔احتساب عدالت کے جج ارشد ملک کل دونوں ریفرنسز پر محفوظ کیا گیا فیصلہ سنائیں گے اور نواز شریف بھی اس موقع پر موجود ہوں گے۔کمرہ عدالت میں مسم لیگ (ن) کے وکلا، رہنماو¿ں سمیت 15 افراد کو داخلے کی اجازت ہوگی جب کہ میڈیا پرسنز کو اپنی شناخت پاس رکھنے کی ہدایت کی گئی ہے۔پولیس کے مطابق احتساب عدالت کے اطراف پولیس کی ایک ہزار نفری تعینات کی جائے گی اور کمرہ عدالت میں نواز شریف کو کلوز پروٹیکشن یونٹ سیکیورٹی فراہم کرے گا۔پولیس کا کہنا ہے کہ شہر کے داخلی و خارجی راستوں پر ا?ج شام سے پولیس تعینات کردی جائے گی، ضرورت پڑنے پر مزید پولیس فورس تعینات کی جائے گی اور کسی بھی غیر متعلقہ شخص کو احتساب عدالت نہیں جانے دیا جائے گا۔دوسری جانب ضلعی انتظامیہ کا کہنا ہے کہ ہنگامی صورتحال سے نمٹنے کے لیے رینجرز بھی موجود رہے گی۔

اسلام آباد(ویب ڈیسک) سابق وزیر اعظم نواز شریف اور شہباز شریف کے درمیان ملاقات کے دوران احتساب عدالت کے کل کے ممکنہ فیصلے اور آئندہ کی حکمت عملی پر مشاورت کی گئی اور دونوں نے اتفاق کیا کہ سویلین بالادستی پر سمجھوتا نہیں کیا جائے گا۔ذرائع کے مطابق شریف برادران کی منسٹر انکلیو میں دونوں رہنماو¿ں کے درمیان دو گھنٹے تک ملاقات جاری رہی جس میں ملکی سیاسی صورتحال اور پارٹی امور پر مشاورت کی گئی۔ ذرائع کے مطابق ملاقات کے دوران اپوزیشن جماعتوں سے رابطوں پر غور کیا گیا اور احتساب عدالت کے کسی بھی ممکنہ فیصلے کی روشنی میں پارٹی کے لائحہ عمل پر بھی غور کیا گیا۔ ذرائع کا کہنا ہے کہ شریف برداران نے اتفاق کیا کہ احتساب عدالت کا جو بھی فیصلہ آیا اس پر قانونی راستہ اختیار کریں گے اور فیصلہ خلاف آنے پر ابتدائی مرحلے میں پارلیمنٹ کے اندر احتجاج کیا جائے گا۔ذرائع کے مطابق ملاقات میں اتفاق کیا گیا کہ آئندہ قومی اسمبلی اجلاس کےدوران دیگر اپوزیشن جماعتوں سے مشاورت کی جائے گی، آصف زرداری اور بلاول بھٹو کو اپویشن لیڈر کے چیمبر میں چائے پر مدعو کیا جائے گا اور اپویشن جماعتوں کی مشاورت سے متفقہ حکمت عملی طے کی جائے گی۔ذرائع کا کہنا ہے کہ 30 دسمبر سے ورکرز کنونشن لاہور سے عوامی رابطہ مہم کا آغاز کیا جائے گا اور عوام و پارٹی کارکنوں کو کسی بھی صورتحال کے لیے فعال کیا جائے گا جب کہ پارٹی کا ایڈوائزری بورڈ مشاورت سے آئندہ فیصلے کرے گا۔یاد رہے کہ سابق وزیراعظم نواز شریف کے خلاف العزیزیہ اسٹیل اور فلیگ شپ ریفرنس کا محفوظ فیصلہ احتساب عدالت کے جج ارشد ملک کل سنائیں گے۔ احتساب عدالت کے فیصلے کے پیش نظر اسلام آباد میں سیکیورٹی کے انتہائی سخت انتظامات کیے گئے ہیں، پولیس کے مطابق احتساب عدالت کے اطراف پولیس کی ایک ہزار نفری تعینات کی جائے گی اور کمرہ عدالت میں نواز شریف کو کلوز پروٹیکشن یونٹ سیکیورٹی فراہم کرے گا۔

پشاور(ویب ڈیسک)وفاقی وزیر شیخ رشید کا کہنا ہے کہ وزیراعظم عمران خان کو اس لیے ووٹ دیے کہ کرپٹ لوگ جیلوں میں ہوں، کرپشن کا ایسا خاتمہ کریں گے کہ لوگ یاد رکھیں گے۔پشاور میں رحمان باباایکسپریس کے افتتاح کی تقریب سے خطاب کے دوران شیخ رشید نے کہا کہ ریلوے کی زمینوں سے قبضہ ختم کرایا جائے گا، ریلوے نے کمیشن دے دے کر بہت خسارہ بھگت لیا، ٹرین چلے گی تو پاکستان کی معیشت کا پہیہ بھی گھومے گا۔شیخ رشید نے اپوزیشن لیڈر شہباز شریف کا نام لیے بغیر کہا کہ عوام نے اس لیے ووٹ نہیں دیا کہ وہ پبلک اکاو¿نٹس کمیٹی کے چیئرمین بن کر فیڈرل منسٹر والی جھنڈوں والی گاڑیوں میں پھریں، چوروں اور لٹیروں کو سزائیں نہ ملیں تو ملک کی بنیادیں ہل جائیں گی، لوگ عمران خان کے ساتھ اس لیے ہیں کہ ملک میں انقلاب اور تبدیلی آئے۔وزیر ریلوے نے کہا کہ آنے والے دنوں میں دو نان اسٹاپ ٹرینیں چلائیں گے، ہمارے پاس 15 تاریخ تک کراچی کے لیے کوئی ٹکٹ نہیں، پہلی تاریخ کو ایک ماہ کے لیے ونٹر ٹرین چلائیں گے۔شیخ رشید نے کہا کہ رحمان بابا ایکسپریس کا کرایہ راولپنڈی لاہور موٹر وے جتنا 1350 روپے رکھا گیا ہے اور یہ ٹرین 34 کے بجائے 24 گھنٹوں میں پشاور سے کراچی پہنچے گی۔وزیر ریلوے کا کہنا تھا کہ ہم نے سو دنوں میں 20 ٹرینیں چلائی ہیں جو دنیا کی تاریخ میں ریکارڈ ہے اور اس سال مزید 20 ٹرینیں اور چلائیں گے، ایم ایل ون کا فیصلہ چند ہفتوں میں ہوجائے گا جس کے تحت پشاور سے کراچی تمام ریلوے ٹریک تبدیل کیا جائے گا، ٹریک کی تبدیلی کے بعد پشاور سے کراچی ٹرین کی کم سے کم رفتار 160 کلومیٹر فی گھنٹہ ہوگی۔شیخ رشید نے کہا کہ ٹریک کی تبدیلی کے بعد پشاور تا کراچی ٹرین کی زیادہ سے زیادہ 260 کلومیٹر فی گھنٹہ ہوگی اور کراچی سے پشاور تک 8 گھنٹوں میں پہنچا جا سکے گا۔

لاہور(ویب ڈیسک) وزیراعظم کے معاون خصوصی نعیم الحق نے کہا ہے کہ جے آئی ٹی رپورٹ کے حقائق سب کے سامنے آ گئے ہیں اور ہمیں یقین ہے کہ ملکی دولت لوٹنے والوں کو سزا ضرور ملے گی۔لاہور میں تحریک انصاف کے رہنما اعجاز چوہدری کی رہائشگاہ پر پریس کانفرنس کرتے ہوئے نعیم الحق نے کہا کہ پچھلے حکمرانوں نے غریب عوام کے لیے کچھ نہیں کیا، زرداری اور نواز شریف صاحب کے مقدمات زیر سماعت ہیں، اس پر زیادہ بات نہیں کروں گا تاہم کرپٹ حکمرانوں کو عبرتناک سزا دینے تک اس نظام سے چھٹکارہ حاصل نہیں کیا جا سکتا۔وزیراعظم کے معاون خصوصی نے کہا کہ مسلم لیگ (ن) اور پیپلز پارٹی کی قیادت ارب پتی ہے، آصف زرداری اور نواز شریف نے بے دردی سے ملک کو لوٹا، ان کی ملک میں موجود جائیدادیں ضبط ہونی چاہئیں۔نعیم الحق کا کہنا تھا کہ نواز شریف کے ذہن میں ہے کہ ہر حال میں وہ یا ان کی اولاد کو اقدار میں رہنا چاہیے، ان کے ذہنوں میں اقتدار سے چمٹے رہنا ہی سیاست ہے۔انہوں نے کہا کہ ہم اپوزیشن جماعتوں کے ساتھ تعاون کی فضا پیدا کرنا چاہتے ہیں، میاں شہباز شریف کو قومی اسمبلی میں اپوزیشن لیڈر بنانا بھی اسی سلسلے کی کڑی ہے، اپوزیشن کے ساتھ مل کر قومی اسمبلی کی 38 قائمہ کمیٹیاں قائم کردیں، 20 کمیٹیوں کی سربراہی پی ٹی آئی اور 18 کی سربراہی اپوزیشن کے پاس ہوگی۔قبل از وقت انتخابات کے تاثر کو رد کرتے ہوئے نعیم الحق نے کہا کہ مڈ ٹرم الیکشن کرانے کا فی الحال کوئی پروگرام نہیں، عوام سے رابطے کو بہتر بنانے کے لیے جلسے کرنے کا سلسلہ شروع کیا جا رہا ہے، عوامی رابطہ مہم کیلئے سب سے پہلا جلسہ 27 جنوری کو میانوالی میں ہوگا۔نعیم الحق کا کہنا تھا کہ پی ٹی آئی اس وقت پنجاب کی سب سے بڑی سیاسی جماعت بن چکی ہے، نیا بلدیاتی نظام آگے بڑھنے کے لیے انقلابی قدم ثابت ہوگا۔وزیراعظم کے معاون خصوصی نے دعویٰ کیا کہ قرضوں کی ادائیگی کے مسئلے پر قابو پالیا ہے، دوست ملکوں سے ملنے والے ڈالرز سے غیر ملکی واجبات ادائیگی میں مدد ملے گی جب کہ آئی ایم ایف سے سمجھوتہ پاکستان کی شرائط پر ہوگا۔نعیم الحق کا کہنا تھا ‘بدقسمتی سے ہر ادارہ زوال کا شکار ہو چکا ہے، اسے درست کرنا ہوگا، یوٹیلیٹی اسٹورز، پوسٹ آفس، پی آئی اے اور اسٹیل ملز میں بے دردی کے ساتھ لوٹ مار کی گئی، ماضی کے حکمرانوں نے اپنی دولت میں اضافہ کیا اور غریب کے لیے کچھ نہیں کیا’۔انہوں نے کہا کہ نیا پاکستان ہاو¿سنگ سوسائٹی کے قیام کے لیے دن رات کام کیا جارہا ہے، مستحق افراد کے لیے 5 سے 10 ہزار روپے ماہانہ اقساط پر گھر بنائے جائیں گے اور اس سلسلے میں اسکیم کے تحت 7 شہروں سے 5 لاکھ درخواستیں آچکی ہیں، ملک میں 10 ہزار ڈویلپر مکانات کی تعمیر میں حصہ لیں گے۔

لاہور(ویب ڈیسک) مسلم لیگ (ن) کی رہنما مریم نواز ان دنوں خاموش ہیں اور وہ موجودہ سیاسی صورتحال کے حوالے سے ٹوئٹر پر بھی سرگرم نہیں۔ ذرائع کا کہنا ہے کہ نواز شریف کی لاہور سے اسلام آباد روانگی کے موقع پر مریم نواز نے انہیں رخصت کرتے ہوئے کہا کہ آپ کی کارکن بن کر آپ کے انصاف کے لیے کردار ادا کروں گی۔ذرائع کے مطابق مریم نواز نے والد نواز شریف کو کہا کہ آپ کو عوام سے جدا رکھنے والے فیصلے بے بنیاد مفروضوں کی پیداوار ہوتے ہیں۔یاد رہے کہ احتساب عدالت کی جانب سے کل نواز شریف کے خلاف العزیزیہ اور فلیگ شپ ریفرنس کا فیصلہ سنایا جائے گا اور اس سلسلے میں سابق وزیراعظم لاہور سے اسلام آباد پہنچ گئے۔احتساب عدالت کے جج ارشد ملک نیب ریفرنسز پر فیصلہ سنائیں گے اور نواز شریف بھی عدالت جائیں گے۔

کراچی(ویب ڈیسک) وزیر ریلوے شیخ رشید نے کراچی سے پشاور جانے والی رحمان بابا ٹرین کا افتتاح کردیا۔نئی ٹرین کی افتتاحی تقریب کراچی کے کینٹ اسٹیشن پر منعقد ہوئی جہاں ضعیف العمر مسافر اور قلی نے ٹرین کا افتتاح کیا، اس موقع پر ڈی ایس ریلوے ارشد سلام خٹک اور ڈی سی او اسحاق بلوچ بھی موجود تھے۔ریلوے حکام کے مطابق رحمان بابا کی 11 کوچز میں 700 سے زائد مسافر سفر کر رہے ہیں اور پہلی ٹرین سے چار لاکھ کی آمدنی ہوئی ہے۔ریلوے حکام کا کہنا ہے کہ رحمان بابا ٹرین میں 31 دسمبر تک ٹکٹس بک ہیں۔ یاد رہے کہ وزیر ریلوے شیخ رشید نے حکومت کے ابتدائی 100 روز کے دوران 10 نئی ٹرینیں چلانے کا اعلان کیا تھا اور انہوں نے ہدف حاصل کرنے کے بعد مزید نئی ٹرینیں چلانے کا اعلان کر رکھا ہے۔