اسلام آباد(اے این این)ملک کے بیشتر علاقوں میں شدید سردی کی لہر برقرار ہے، محکمہ موسمیات کا کہنا ہے کہ چوبیس گھنٹے کے دوران ملک کے بیشتر علاقوں میں موسم سرد، خشک اور جزوی ابر آلود رہنے کا امکان ہے۔گزشتہ 24 گھنٹوں کے دوران ملک کا سب سے سرد مقام استور رہا جہاں کم سے کم درجہ حرارت منفی 15 ڈگری سینٹی گریڈ ریکارڈ کیا گیا۔گلگت بلتسان کے ضلع استور میں خون کو جما دینے والی شدید سردی کی وجہ سے مختلف موسمی بیماریوں میں اضافہ بھی ہوگیا ہے۔استور میں بیماریوں میں اضافے کی وجہ سے ڈی ایچ کیو اسپتال میں مریضوں کا رش لگا رہتا ہے جس کی وجہ سے لوگوں کی مشکلات میں اضافہ ہوگیا ہے۔اسکردو میں منفی 13، بگروٹ میں منفی 11، گوپس اور مالم جبہ میں منفی 9، کوئٹہ میں منفی 8، قلات اور دیر میں منفی 6، جبکہ مری میں منفی 3 ڈگری سینٹی گریڈ ریکارڈ کیا گیا۔اسلام آباد میں کم سے کم درجہ حرارت نقطہ انجماد سے ایک ڈگری کم ریکارڈ کیا گیا، کراچی میں 14، لاہور میں 5، پشاور میں 2، مظفر آباد میں منفی ایک، فیصل آباد میں 3، ملتان میں 4 جبکہ حیدر آباد میں کم سے کم درجہ حرارت 9 ڈگری سینٹی گریڈ ریکارڈ کیا گیا۔پنجاب کے میدانی علاقوں اور بالائی سندھ میں بعض مقامات پر دھند چھانے کا بھی امکان ہے۔
