راولپنڈی(ویب ڈیسک) آرمی چیف جنرل قمر جاوید باجوہ کا کہنا ہے کہ پرامن اور مستحکم پاکستان کے قیام کے لیے پر عزم ہیں۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے نیشنل ڈیفنس یونیورسٹی میں پاک برطانیہ کانفرنس سے خطاب کے دوران ملک کی اندرونی و بیرونی سلامتی کی صورتحال پر روشنی ڈالی اور شرکاءکو خطے کی مجموعی صورتحال اور سکیورٹی چیلنجز سے آگاہ کیا۔آئی ایس پی آر کے مطابق آرمی چیف جنرل قمر جاوید باجوہ نے کانفرنس میں خطے کی معاشی ترقی کے لیے سی پیک کے کردار پر بھی روشنی ڈالی، آرمی چیف نے کانفرنس کے شرکاءکو ملک اور خطے میں امن کیلئے اپنے ویڑن سے آگاہ کرتے ہوئے کہا کہ پرامن اور مستحکم پاکستان کے قیام کے لیے پر عزم ہیں۔آئی ایس پی آر کے مطابق نیشنل ڈیفنس یونیورسٹی میں آرمی چیف سے برطانوی فوج کے کمانڈر لیفٹیننٹ جنرل پیٹرک سینڈرز نے ملاقات بھی کی جس میں علاقائی سلامتی کی صورتحال اور باہمی دلچسپی کے پیشہ ورانہ امور پر تبادلہ خیال کیا گیا۔
