لاہور (نمائندہ خصوصی) چیئرمین احتساب بیورو (نیب) جسٹس (ر) جاوید اقبال نے 19 ارب سے زیادہ مالیت کا فراڈ کرنے اور شہریوں کو لوٹنے پر ایڈن انتظامیہ کے سی ای او ڈاکٹر امجد اور اس کے تین بیٹوں کو گرفتار کرنے کے حکم دے دیا ہے رائے ونڈ روڈ پر ایڈن پیلس پر چھاپہ مارا لیکن کوئی گرفتاری عمل میں نہ آسکی۔ ایک ماہ پہلے ڈی جی نیب لاہور شہزاد سلیم نے ان کے خلاف ریفرنس دائر کیا تھا جس پر ان کی گرفتاری کا حکم دے دیا گیا ہے۔ ایڈن ہاﺅسنگ پراجیکٹ کے مالک ڈاکٹر امجد اور اس کے بیٹے ان دنوں دبئی میں رہائش پذیر ہیں جن کی گرفتاری کے لیے لائحہ عمل اختیار کیا جائے گا۔ رائے ونڈ پر واقع ایڈن پیلس ویران پڑا ہوا ہے وہاں پر صرف چوکیدار موجود ہیں جنہوں نے بتایا کہ 2 سال سے ایڈن ڈویلپرز کے مالک ڈاکٹر امجد اور ان کے بیٹے مرتضی امجد، مصطفی امجد اورانجم امجد یہاں پر نہیں رہتے وہ بیرون ملک جا چکے ہیں ۔ چوکیدار انور خان نے بتایا کہ رات کو تین گاڑیوں پر پولیس نے چھاپہ مارا جب میں ان کو بتایا کہ جو مالک ہیں وہ یہاں پر نہیں رہتے تو وہ واپس چلے گئے۔ ذرائع نے بتایا ہے کہ ان فراڈیوں نے ایڈن آباد، ایڈن ریزیڈنیشیا، ایڈن گارڈن، ایڈن گارڈن ایکسٹینشن، ایڈن لین ولاز، ڈریم ہومز، ایڈن لگژری ولاز، ایڈن سمارٹ ہومز، ایڈن گارڈن ڈریم، ایڈن میڈوز، ایڈن ولاز، ایڈن پیلس، ایڈن بلیواڑا، سمیت دیگر پراجیکٹ بنائے ان کی آڑ میں سینکڑوں اوورسیز پاکستانیوں کو لوٹ لیا گیا۔ 11 ہزار کے قریب متاثرین سے تقریباً 18 ارب 96 کروڑ روپے کی خوردبرد کی گئی۔ ایڈن انتظامیہ نے ایک طرف لوگوں کو سستے گھر دینے کی آڑ میں فراڈ کیا اور دوسری طرف اپنے پراجیکٹ پر بینک سے قرضہ لیکر تمام پراجیکٹ بینکوں میں رہن رکھ کر کروڑوں روپے کا قرضہ لے کر ہڑپ کر گئے۔
