لاہور(ویب ڈیسک)حال ہی میں سوشل میڈیا پر ایک پوسٹ میں دعویٰ کیا گیا کہ اداکارہ صباقمر نے پاکستان میں گرفتار بھارتی جاسوس کلبھوشن یادیوکی پر بننے والی فلم سائن کر لی ہے۔صبا قمر متعدد ڈراموں کے ساتھ ساتھ لالی وڈ اور بالی وڈ دونوں میں فلمیں بھی کر چکی ہیں۔چند روز قبل انہوں نے سوشل میڈیا پر اپنے مداحوں کو آگاہ کیا تھا کہ وہ فلم”کملی” میں کام کر رہی ہیں جو کہ آئندہ برس ریلیز ہو گی۔ لیکن سوشل میڈیا پر انٹرٹینمنٹ پاکستان کے نام سے ایک ویب سائٹ کی جانب سے کی گئی پوسٹ میں دعویٰ کیا گیا کہ صبا قمر نے گرفتار بھارتی جاسوس کلبھوشن یادیو کے گرد گھومتی ایک فلم سائن کی ہے۔

اس پر صباقمر نے لکھا کہ یہ جاننا ان کے لیے ہمیشہ دلچسپ ہوتا ہے کہ انہوں نے ایسی فلم سائن کی ہے جو ان کے علم میں نہیں ہی ہے۔انہوں نے سوشل میڈیا پر مداحوں کو مخاطب کرتے ہوئے مزید لکھا کہ جب بھی وہ کوئی فلم کریں گی تو تمام لوگوں کو اس سے آگاہ کریں گی کیونکہ وہ اسی لیے یہاں موجود ہیں۔”ابھی میں صرف “کملی”کر رہی ہوں اس لیے ریٹنگ کے حصول کے لیے جعلی خبریں پوسٹ کرنا بند کر دیں۔”اس پوسٹ کے بعد صباقمر نے پھر ردعمل دیا اوراسے مسترد کرتے ہوئے لکھا کہ ان کا موقف خبر شائع کرنے سے پہلے لیا جانا چاہیے تھا۔”آپ نے تین ذرائع سے خبر کی تصدیق کی لیکن مجھ سے نہیں۔ آپ کا دعویٰ کہ آپ نے مجھ سے خبر شائع کرنے سے پہلے رابطہ کیا بالکل غلط ہے۔”

لاہور(ویب ڈیسک)پاکستانی شائقین جلد ہی ایک اعلیٰ پولیس افسر کی جانب سے بنائی جانے والی فلم ’دال چاول‘ کو بڑے پردے پر دیکھ سکیں گے۔’دال چاول‘ کی کہانی ڈپٹی انسپکٹر جنرل (ڈی آئی جی) رینک کے پولیس افسر اکبر ناصر خان نے لکھی ہے اور انہوں نے ہی اس فلم کو پروڈیوس کیا ہے۔اکبر ناصر خان ’سیف سٹی پاکستان‘ منصوبے کے پنجاب کے انچارج ہیں اور وہ اس فلم کو بنانے سے قبل بھی پولیس کی خدمات پر متعدد مضامین تحریر کر چکے ہیں۔فن کلب پروڈکشن کے بینر تلے بنائی جانے والی ’دال چاول‘ کی ہدایات اویس خالد نے دی ہیں جب کہ اس کے گانوں میں راحت فتح علی خان، جبار عباس اور ماریہ میر جیسی گلوکاراﺅں نے اپنی آواز کا جادو جگایا ہے۔شفقت چیمہ جیسی کاسٹ پر مبنی اس فلم کی نئی کاسٹ میں نئے اداکار احمد صفیان اور مومنہ اقبال مرکزی کرداروں میں دکھائی دیں گی۔فلم کے حوالے سے ڈان سے بات کرتے ہوئے اکبر ناصر خان نے بتایا کہ فلم کی کہانی ایک پڑھے لکھے نوجوان اور اس کی جدوجہد کے گرد گھومتی ہے۔انہوں نے بتایا کہ فلم میں پولیس کو درپیش مشکلات اور پولیس کی جانب سے مشکلات کے باوجود بڑے کارنامے سر انجام دینے کو دکھایا جائے گا۔ساتھ ہی انہوں نے بتایا کہ فلم میں وطن کے لیے قربانیاں دینے والے شہید پولیس اہلکاروں کی قربانیوں کو بھی اجاگر کیا جائے گا۔فلم کے جاری کیے گئے مختصر ٹریلر سے فلم کی پوری کہانی سمجھنا مشکل ہے، تاہم اندازہ ہوتا ہے کہ فلم کی کہانی ’دال چاول‘ کا ٹھیلہ لگا کر زندگی کا گزارا کرنے والے نوجوان کی جانب سے پولیس افسر بننے کے گرد گھومتی ہے۔ٹریلر سے اندازہ ہوتا ہے کہ پولیس کم وسائل اور مشکلات کے باوجود دہشت گردوں اور مذہب کا نام استعمال کرکے منفی پروپیگنڈہ کرنے والوں کے خلاف شاندار قربانیوں کو بھی دکھایا جائے گا۔فلم کو آئندہ ماہ اکتوبر میں ریلیز کیے جانے کا امکان ہے۔

لاہور(ویب ڈیسک) عدالت نے گلوکارہ رابی پیر زادہ کو غیر قانونی طور پر اژدھا، مگرمچھ اور سانپ رکھنے کےالزام میں 27 ستمبرکو طلب کرلیا۔پنجاب وائلڈ لائف ڈیپارٹمنٹ (محکمہ تحفظ جنگلی حیات) نے 11 ستمبرکو معروف گلوکارہ واداکارہ رابی پیرزادہ کا چالان کیا تھا۔ ان پرالزام ہے کہ انہوں نے غیرقانونی طورپر اپنے گھر میں خطرناک سانپ، اڑدھا اورمگرمچھ پال رکھے ہیں۔ وائلڈلائف ڈیپارٹمنٹ نے اداکارہ کی سوشل میڈیا پرسانپوں، اژدھے اورمگرمچھ کے ساتھ تصاویر اورویڈیوز سامنے آنے کے بعد ان کے خلاف کارروائی کی تھی۔وائلڈ لائف ایکٹ 1974 ترمیم شدہ 2007 کے تحت تحفظ شدہ حشرات کو غیرقانونی طور پر اپنے گھرمیں رکھنے پراداکارہ کا چالان کیا گیا تھا، جس کے بعد ماڈل ٹاﺅن کچہری کے جوڈیشل مجسٹریٹ حارث صدیقی نے اداکارہ کو 27 ستمبرکو طلب کرلیا ہے۔وائلڈلائف کی طرف سے چالان کئے جانے پراداکارہ نے اس کارروائی کو بھارتی وزیراعظم نریندرمودی کے خلاف بیانات کا نتیجہ قراردینے کا بھی الزام لگایا تھا اورمحکمہ وائلڈلائف کو مودی کا یار کہا تھا۔ اداکارہ نے یہ بھی کہا کہ وہ 5 سال سے ان سانپوں، اژدھے اورمگرمچھ سے کھیل رہی ہیں تاہم وہ ان کی مالک نہیں ہیں یہ انہوں نے کسی کوخرید کردیئے تھے۔محکمہ وائلڈلائف کا موقف ہے کہ اداکارہ عدالت میں بتائیں کہ وہ سانپ ، اژدھا اورمگرمچھ کس کے ہیں۔ اژدھا اور مگرمچھ تحفظ شدہ جانور ہیں جن کو گھرمیں رکھنے کی اجازت نہیں۔ اداکارہ پرالزام ثابت ہونے پر 2 سے 3 سال تک قید، 20 ہزار روپے جرمانہ یا دونوں سزائیں ہوسکتی ہیں۔دوسری طرف محکمہ وائلڈلائف ابھی تک اداکارہ کے قبضے سے سانپ ، مگرمچھ اوراژدھا برآمد نہیں کرسکا ہے، وائلڈلائف حکام نے 2 مقامات پرچھاپہ مارا مگر وہاں سے کچھ بھی برآمد نہیں ہوسکا ہے۔ وائلڈ لائف حکام کا کہنا ہے اداکارہ کو عدالت میں یہ بھی بتانا ہوگا کہ یہ جانور اس نے کہاں غائب کئے ہیں۔

دبئی(ویب ڈیسک) لالی وڈ اسٹار میرا کی طبیعت اچانک بگڑ گئی جس پر انہیں اسپتال میں داخل کر لیا گیا ہے۔فلم اسٹار میرا فی الحال دبئی کے امریکن اسپتال میں داخل ہیں اور ڈاکٹرز نے اداکارہ میرا کے خون کے مختلف ٹیسٹ کیے ہے۔ ابتدائی طور پر ڈاکٹروں نے میرا کو آپریشن کا مشورہ دیا ہے لیکن شام تک ٹیسٹ کے نتائج موصول ہونے کے بعد ڈاکٹر حتمی فیصلہ کریں گے۔اطلاعات ہیں کہ فلم اسٹار میرا نے معدے میں درد کی شکایت کی تھی جب کہ اسپتال ذرائع کا کہنا ہے کہ میرا نے جلد میں بھی جلن محسوس ہونے کی شکایت کی ہے۔اداکارہ میرا نے ذرائع سے گفتگو کرتے ہوئے کہا کہ وہ چند دن پہلے ہی امریکا کے دورے سے واپس آئی ہیں۔ انھوں نے کہا کہ وہ کئی دن سے درد محسوس کررہی تھی مگر مصروفیت کے باعث بیماری پر توجہ نہ دے سکیں۔ انھوں نے پرستاروں سے درخواست کی کہ وہ ان کی صحت یابی کیلئے دعا کریں۔دبئی میں بسی پاکستانی کمیونٹی کے کئی سماجی رہنماﺅں نے اسپتال میں فلم اسٹار میرا کی عیادت کی اور جلد صحت یابی کی دعا کی۔